‘ದಿ ಲ್ಯಾನ್ಸೆಟ್ ಅಬ್ಸ್ಟೆಟ್ರಿಕ್ಸ್, ಗೈನೆಕಾಲಜಿ ಮತ್ತು ವುಮೆನ್ಸ್ ಹೆಲ್ತ್’ (The Lancet Obstetrics, Gynaecology & Women’s Health) ನಿಯತಕಾಲಿಕೆಯಲ್ಲಿ ಪ್ರಕಟವಾದ ಹೊಸ ಅಧ್ಯಯನದ ಪ್ರಕಾರ, 40 ವರ್ಷಕ್ಕಿಂತ ಮೊದಲು ಮೆನೋಪಾಸ್ (ಋತುಬಂಧ ಅಥವಾ ಮುಟ್ಟು ನಿಲ್ಲುವಿಕೆ) ತಲುಪುವ ಮಹಿಳೆಯರಲ್ಲಿ ಹೃದಯಾಘಾತ ಮತ್ತು ಸ್ಟ್ರೋಕ್ನಂತಹ ಗಂಭೀರ ಹೃದಯ ಸಂಬಂಧಿ ಕಾಯಿಲೆಗಳು ಕಾಣಿಸಿಕೊಳ್ಳುವ ಸಾಧ್ಯತೆ ಗಣನೀಯವಾಗಿ ಹೆಚ್ಚಾಗಿರುತ್ತದೆ.
26 ದೇಶಗಳ 1,11,600 ಕ್ಕೂ ಹೆಚ್ಚು ಮಹಿಳೆಯರ ದತ್ತಾಂಶವನ್ನು (ಡೇಟಾ) ಬಳಸಿ ಸಂಶೋಧಕರು ಈ ಅಧ್ಯಯನ ನಡೆಸಿದ್ದು, 40 ರಿಂದ 44 ವರ್ಷಗಳ ನಡುವೆ ಆರಂಭಿಕ ಮೆನೋಪಾಸ್ (early menopause) ಅನುಭವಿಸುವ ಮಹಿಳೆಯರು, ಸುಮಾರು 45 ನೇ ವಯಸ್ಸಿನಲ್ಲಿ ಮೆನೋಪಾಸ್ ತಲುಪುವ ಮಹಿಳೆಯರಿಗಿಂತ ಶೇಕಡಾ 30 ರಿಂದ 40 ರಷ್ಟು ಹೆಚ್ಚಿನ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ಎದುರಿಸುತ್ತಾರೆ ಎಂದು ಕಂಡುಕೊಂಡಿದ್ದಾರೆ.
ಭಾರತಕ್ಕೆ ಸಂಬಂಧಿಸಿದ ಸಂಶೋಧನಾ ಫಲಿತಾಂಶಗಳು ವಿಶೇಷವಾಗಿ ಗಮನಾರ್ಹವಾಗಿವೆ. ಈ ಅಧ್ಯಯನಕ್ಕೆ ಒಳಪಟ್ಟ 7,872 ಭಾರತೀಯ ಮಹಿಳೆಯರಲ್ಲಿ 1,445 (ಶೇಕಡಾ 18.4) ಮಹಿಳೆಯರು ಅಕಾಲಿಕ ಮೆನೋಪಾಸ್ (premature menopause – 40 ವರ್ಷಕ್ಕಿಂತ ಮೊದಲು) ಅನುಭವಿಸಿದ್ದರು. ಭಾರತೀಯ ಮಹಿಳೆಯರಲ್ಲಿ ಮೆನೋಪಾಸ್ನ ಸರಾಸರಿ ವಯಸ್ಸು 44.6 ವರ್ಷಗಳಾಗಿದ್ದರೆ, 1,991 ಮಹಿಳೆಯರು (ಶೇಕಡಾ 25.3) ಆರಂಭಿಕ ಮೆನೋಪಾಸ್ (early menopause) ಅನುಭವಿಸಿದ್ದರು. ಒಟ್ಟಾರೆಯಾಗಿ, 3,436 ಮಹಿಳೆಯರು (ಶೇಕಡಾ 43.6) ಅಕಾಲಿಕ ಅಥವಾ ಆರಂಭಿಕ ಮೆನೋಪಾಸ್ ಎರಡರಲ್ಲೊಂದನ್ನು ಅನುಭವಿಸಿದ್ದಾರೆ.
ಕಡಿಮೆ ಮತ್ತು ಮಧ್ಯಮ ಆದಾಯವಿರುವ ದೇಶಗಳ (LMICs), ವಿಶೇಷವಾಗಿ ದಕ್ಷಿಣ ಏಷ್ಯಾದ ಮಹಿಳೆಯರು ಶ್ರೀಮಂತ ದೇಶಗಳ ಮಹಿಳೆಯರಿಗಿಂತ ಬೇಗನೆ ಮೆನೋಪಾಸ್ ತಲುಪುತ್ತಾರೆ ಎಂದೂ ಈ ಅಧ್ಯಯನವು ಪತ್ತೆಹಚ್ಚಿದೆ.
ಈ ಸಂಶೋಧನೆಯು ಭಾರತೀಯ ಮಹಿಳೆಯರಿಗೆ ಏಕೆ ಮುಖ್ಯವಾಗಿದೆ?
ಈ ಅಧ್ಯಯನದಲ್ಲಿ ಭಾಗಿಯಾಗದ, ಪಿಎಚ್ಎಫ್ಐ ಇನ್ಸ್ಟಿಟ್ಯೂಟ್ ಆಫ್ ಪಬ್ಲಿಕ್ ಹೆಲ್ತ್ ಸೈನ್ಸಸ್ನ (PHFI Institute of Public Health Sciences) ಚಾನ್ಸಲರ್ ಆದ ಡಾ. ಕೆ. ಶ್ರೀನಾಥ್ ರೆಡ್ಡಿ ಅವರು ಮಾತನಾಡಿ, “ಮೆನೋಪಾಸ್ಗಿಂತ ಮೊದಲು ಮಹಿಳೆಯರ ದೇಹದಲ್ಲಿ ಉತ್ಪತ್ತಿಯಾಗುವ ಸ್ತ್ರೀ ಹಾರ್ಮೋನ್ಗಳು ರಕ್ತದ ಲಿಪಿಡ್ಗಳು (ಕೊಬ್ಬು), ದೇಹದ ಕೊಬ್ಬಿನ ಹಂಚಿಕೆ, ಇನ್ಫ್ಲಮೇಟರಿ ಮಾರ್ಕರ್ಗಳು ಮತ್ತು ರಕ್ತನಾಳಗಳ ಕ್ರಿಯಾಶೀಲತೆಯ ಮೇಲೆ ಧನಾತ್ಮಕ ಪರಿಣಾಮ ಬೀರುತ್ತವೆ. ಹೀಗಾಗಿ ಅವು ಹೃದಯ ಮತ್ತು ರಕ್ತನಾಳಗಳ ಕಾಯಿಲೆಗಳ ವಿರುದ್ಧ ರಕ್ಷಣಾ ಕವಚವಾಗಿ ಕಾರ್ಯನಿರ್ವಹಿಸುತ್ತವೆ. ಆದರೆ ಮೆನೋಪಾಸ್ ನಂತರ ಈ ರಕ್ಷಣೆ ಇಲ್ಲದಂತಾಗುತ್ತದೆ ಮತ್ತು ಹೃದಯಾಘಾತದ ಅಪಾಯವು ಪುರುಷರಲ್ಲಿ ಕಂಡುಬರುವ ಮಟ್ಟಕ್ಕೆ ಹೆಚ್ಚಾಗುತ್ತದೆ” ಎಂದು ತಿಳಿಸಿದ್ದಾರೆ.
’ಪ್ಯೂರ್’ (PURE) ಅಧ್ಯಯನವು ಕಂಡುಕೊಂಡದ್ದೇನು?
ಈ ಸಂಶೋಧನಾ ಫಲಿತಾಂಶಗಳು ‘ಪ್ರಾಸ್ಪೆಕ್ಟಿವ್ ಅರ್ಬನ್ ರೂರಲ್ ಎಪಿಡೆಮಿಯೋಲಾಜಿಕ್’ (PURE) ಅಧ್ಯಯನವನ್ನು ಆಧರಿಸಿವೆ. ಇದು 28 ದೇಶಗಳ 35-70 ವರ್ಷ ವಯಸ್ಸಿನ 1,25,073 ಮಹಿಳೆಯರನ್ನು ಒಳಗೊಂಡ ಬಹುರಾಷ್ಟ್ರೀಯ ಕೋಹೋರ್ಟ್ ಅಧ್ಯಯನವಾಗಿದ್ದು, ಮೆನೋಪಾಸ್ ವಯಸ್ಸು ಮತ್ತು ಹೃದಯಾಘಾತ (Myocardial infarction), ಸ್ಟ್ರೋಕ್ ಹಾಗೂ ಹಾರ್ಟ್ ಫೈಲ್ಯೂರ್ ಸೇರಿದಂತೆ ಹೃದಯ ಸಂಬಂಧಿ ತೊಂದರೆಗಳ ನಡುವಿನ ಸಂಬಂಧವನ್ನು ಮೌಲ್ಯಮಾಪನ ಮಾಡಿದೆ.
ಸಂಶೋಧಕರು ಮಧುಮೇಹ ಮತ್ತು ಅಧಿಕ ರಕ್ತದೊತ್ತಡದ ವೈದ್ಯಕೀಯ ಇತಿಹಾಸವನ್ನು ಸಂಗ್ರಹಿಸಿದ್ದು, ಇಂಟರ್ಹಾರ್ಟ್ (INTERHEART) ಸ್ಕೋರ್ ಬಳಸಿ ಹೃದಯ ಸಂಬಂಧಿ ಅಪಾಯದ ಅಂಶಗಳನ್ನು ಮೌಲ್ಯಮಾಪನ ಮಾಡಿದ್ದಾರೆ. ಈ ಸ್ಕೋರ್ ಧೂಮಪಾನ, ಲಿಪಿಡ್ ಮಟ್ಟಗಳು, ಅಧಿಕ ರಕ್ತದೊತ್ತಡ, ಮಧುಮೇಹ, ಬೊಜ್ಜು, ಆಹಾರ ಪದ್ಧತಿ, ದೈಹಿಕ ಚಟುವಟಿಕೆ, ಮದ್ಯಪಾನ ಮತ್ತು ಮಾನಸಿಕ-ಸಾಮಾಜಿಕ ಅಂಶಗಳನ್ನು ಒಳಗೊಂಡಿರುತ್ತದೆ. ಇಂಟರ್ಹಾರ್ಟ್ ಸ್ಕೋರ್ ಸುಲಭವಾಗಿ ಅಳೆಯಬಹುದಾದ ಮತ್ತು ಬದಲಾಯಿಸಬಹುದಾದ ಅಪಾಯದ ಅಂಶಗಳನ್ನು ಒಳಗೊಂಡಿದ್ದು, ಜಾಗತಿಕವಾಗಿ ಎಲ್ಲಾ ಪ್ರದೇಶಗಳು ಮತ್ತು ಜನಾಂಗೀಯ ಗುಂಪುಗಳಲ್ಲಿ ಕಂಡುಬರುವ ಶೇಕಡಾ 90 ಕ್ಕಿಂತ ಹೆಚ್ಚು ಹೃದಯಾಘಾತದ ಅಪಾಯಗಳಿಗೆ ಇವೇ ಕಾರಣವಾಗಿವೆ.
ಮೆನೋಪಾಸ್ ತಲುಪಿದ್ದ 60,669 ಮಹಿಳೆಯರಲ್ಲಿ, 5,750 (ಶೇಕಡಾ 9.5) ಮಹಿಳೆಯರು ಅಕಾಲಿಕ ಮೆನೋಪಾಸ್ ಮತ್ತು 9,262 (ಶೇಕಡಾ 15.3) ಮಹಿಳೆಯರು ಆರಂಭಿಕ ಮೆನೋಪಾಸ್ ಅನುಭವಿಸಿದ್ದರು. ಉಳಿದ 45,657 (ಶೇಕಡಾ 75.3) ಮಹಿಳೆಯರು ಸಾಮಾನ್ಯ ವಯಸ್ಸಿನಲ್ಲಿ ಮೆನೋಪಾಸ್ ತಲುಪಿದ್ದರು.
ಎಲ್ಲಾ ದೇಶಗಳ ಒಟ್ಟಾರೆ ಮೆನೋಪಾಸ್ ಸರಾಸರಿ ವಯಸ್ಸು 47.4 ವರ್ಷಗಳಾಗಿತ್ತು. ಆದರೆ, ದಕ್ಷಿಣ ಏಷ್ಯಾದ ಮಹಿಳೆಯರಲ್ಲಿ ಇದು ಗಣನೀಯವಾಗಿ ಕಡಿಮೆ ಅಂದರೆ 44.7 ವರ್ಷಗಳಾಗಿದ್ದರೆ, ಕಡಿಮೆ ಆದಾಯದ ದೇಶಗಳ ಮಹಿಳೆಯರಲ್ಲಿ 44.8 ವರ್ಷಗಳಾಗಿತ್ತು. ಇದಕ್ಕೆ ವ್ಯತಿರಿಕ್ತವಾಗಿ, ಯುರೋಪಿಯನ್ ಮಹಿಳೆಯರಲ್ಲಿ ಸರಾಸರಿ ವಯಸ್ಸು 47.8 ವರ್ಷ ಮತ್ತು ಹೆಚ್ಚಿನ ಆದಾಯದ ದೇಶಗಳಲ್ಲಿ 48 ವರ್ಷಗಳಾಗಿತ್ತು.
”ಈ ಅಕಾಲಿಕ ಅಥವಾ ಆರಂಭಿಕ ಮೆನೋಪಾಸ್ ಮಹಿಳೆಯರ ಮುಂದಿನ ಜೀವನದಲ್ಲಿ ಹೃದಯಾಘಾತ ಮತ್ತು ಸ್ಟ್ರೋಕ್ ಸೇರಿದಂತೆ ಗಂಭೀರ ಹೃದಯ ಸಂಬಂಧಿ ಕಾಯಿಲೆಗಳು ಬರುವ ಸಾಧ್ಯತೆಗಳನ್ನು ಹೆಚ್ಚಿಸಬಹುದು” ಎಂದು ಆಸ್ಟ್ರೇಲಿಯಾದ ಸಿಡ್ನಿ ವಿಶ್ವವಿದ್ಯಾಲಯದ ವೆಸ್ಟ್ಮೀಡ್ ಅಪ್ಲೈಡ್ ರಿಸರ್ಚ್ ಸೆಂಟರ್ನ ಮತ್ತು ಈ ಅಧ್ಯಯನದ ಪ್ರಮುಖ ಲೇಖಕರಾದ ಡಾ. ಸಿಮೋನ್ ಮಾರ್ಷ್ನರ್ ಹೇಳಿದ್ದಾರೆ.
ಪರೋಕ್ಷ ಧೂಮಪಾನವೂ (Second-hand smoke) ಮೆನೋಪಾಸ್ ಅನ್ನು ಬೇಗ ತರಬಹುದು
ಡಾ. ರೆಡ್ಡಿ ಅವರ ಪ್ರಕಾರ, ಕಡಿಮೆ ಮತ್ತು ಮಧ್ಯಮ ಆದಾಯದ ದೇಶಗಳಲ್ಲಿ ಹೆಚ್ಚಾಗುತ್ತಿರುವ ಹಲವಾರು ಅಂಶಗಳು ಅಕಾಲಿಕ ಮೆನೋಪಾಸ್ಗೆ ಕಾರಣವಾಗಬಹುದು. ಮಾನಸಿಕ ಒತ್ತಡ, ತಂಬಾಕು ಬಳಕೆ (ವಿಶೇಷವಾಗಿ ಧೂಮಪಾನ), ಸಂಸ್ಕರಿಸಿದ ಕಾರ್ಬೋಹೈಡ್ರೇಟ್ಗಳು ಹೆಚ್ಚಿರುವ ಹಾಗೂ ದ್ವಿದಳ ಧಾನ್ಯಗಳು ಮತ್ತು ಹಣ್ಣುಗಳು ಕಡಿಮೆಯಿರುವ ಅನಾರೋಗ್ಯಕರ ಆಹಾರ ಪದ್ಧತಿ, ಅಪೂರ್ಣ ನಿದ್ದೆ ಮತ್ತು ಅತಿ ಕಡಿಮೆ ಅಥವಾ ಅತಿಯಾದ ದೈಹಿಕ ಚಟುವಟಿಕೆಗಳು ಬೇಗನೆ ಮೆನೋಪಾಸ್ ಆಗುವ ಸಾಧ್ಯತೆಯನ್ನು ಹೆಚ್ಚಿಸುತ್ತವೆ.
ಇದರೊಂದಿಗೆ, ಎಂಡೋಕ್ರೈನ್ ವ್ಯವಸ್ಥೆಗೆ ಅಡ್ಡಿಪಡಿಸುವ (endocrine disruptors) ಪರಿಸರ ಮಾಲಿನ್ಯಕಾರಕಗಳು ಹಾಗೂ ಜಾಗತಿಕ ತಾಪಮಾನ ಏರಿಕೆಗೆ ಸಂಬಂಧಿಸಿದ ಅತಿಯಾದ ಉಷ್ಣತೆಯು ಅಂಡಾಶಯದ ವಯಸ್ಸಾಗುವಿಕೆಯನ್ನು ಚುರುಕುಗೊಳಿಸಬಹುದು ಮತ್ತು ಮುಂಚಿತವಾಗಿಯೇ ಮೆನೋಪಾಸ್ ಆಗುವ ಅಪಾಯವನ್ನು ಹೆಚ್ಚಿಸಬಹುದು ಎಂದು ಅವರು ತಿಳಿಸಿದ್ದಾರೆ. ಮಧುಮೇಹ ಕೂಡ ಅಕಾಲಿಕ ಮೆನೋಪಾಸ್ಗೆ ಕಾರಣವಾಗುವ ಸಾಧ್ಯತೆಯಿರುತ್ತದೆ.
”ಪುರುಷರು ಮಾಡುವ ಧೂಮಪಾನದಿಂದ ಹೊರಬರುವ ಹೊಗೆಯನ್ನು ಪರೋಕ್ಷವಾಗಿ ಸೇವಿಸುವುದರಿಂದಲೂ (Passive smoking) ಮಹಿಳೆಯರಲ್ಲಿ ಬೇಗನೆ ಮೆನೋಪಾಸ್ ಆಗಬಹುದು” ಎಂದು ಡಾ. ರೆಡ್ಡಿ ಹೇಳಿದ್ದಾರೆ. “ಆಹಾರ ಮತ್ತು ಪರಿಸರದ ಪ್ರಭಾವಗಳಿಗೆ ಸೂಕ್ಷ್ಮವಾಗಿ ಸ್ಪಂದಿಸುವ ನ್ಯೂರೋ-ಎಂಡೋಕ್ರೈನ್ ಆಕ್ಸಿಸ್ ಮತ್ತು ಗಟ್-ಬ್ರೈನ್ ಆಕ್ಸಿಸ್ (ಮೆದುಳು ಮತ್ತು ಕರುಳಿನ ನಡುವಿನ ಸಂಪರ್ಕ) ಮೆನೋಪಾಸ್ನ ಸಮಯವನ್ನು ಬದಲಾಯಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.”
ಭಾರತದಂತಹ ದೇಶಗಳಲ್ಲಿ ಕಾರ್ಡಿಯೋಮೆಟಬಾಲಿಕ್ (ಹೃದಯ ಮತ್ತು ಚಯಾಪಚಯ ಸಂಬಂಧಿ) ಕಾಯಿಲೆಗಳು ಹೆಚ್ಚಾಗುತ್ತಿರುವ ಬೆನ್ನಲ್ಲೇ, ಇಂತಹ ಹಾನಿಕಾರಕ ಪರಿಸರಗಳು ಸಹ ಸಾಮಾನ್ಯವಾಗುತ್ತಿವೆ ಎಂದು ಅವರು ಗಮನಿಸಿದ್ದಾರೆ. ಅದೇ ಸಮಯದಲ್ಲಿ, ಪರಿಧಮನಿಯ ಹೃದಯ ಕಾಯಿಲೆಯ (coronary heart disease) ಅಪಾಯದಲ್ಲಿ ಪುರುಷರು ಮತ್ತು ಮಹಿಳೆಯರ ನಡುವಿನ ವ್ಯತ್ಯಾಸವು ಕಡಿಮೆಯಾಗುತ್ತಿದೆ.
”ಪೂರಕ ಸಾರ್ವಜನಿಕ ನೀತಿಗಳ ಮೂಲಕ ಉತ್ತೇಜಿಸಲ್ಪಡುವ ಆರೋಗ್ಯ ರಕ್ಷಣಾತ್ಮಕ ವೈಯಕ್ತಿಕ ನಡವಳಿಕೆಗಳಿಂದ ಇಂತಹ ಅನೇಕ ಅಪಾಯಗಳನ್ನು ಬದಲಾಯಿಸಬಹುದು. ಸಾಮಾಜಿಕ-ಪರಿಸರ ಒತ್ತಡಗಳ ದಾಳಿಗೆ ಸಿಲುಕಿ ಮಹಿಳೆಯರು ಅಕಾಲಿಕವಾಗಿ ವಯಸ್ಸಾಗದಂತೆ ತಡೆದರೆ, ಅವರ ಹೃದಯವು ಹೃದಯಾಘಾತದಿಂದ ಸುರಕ್ಷಿತವಾಗಿರುತ್ತದೆ. ಇದು ಮಹಿಳೆಯರ ಆರೋಗ್ಯದ ಕಡೆಗೆ ಇಡೀ ಸಮಾಜವು ವಿಶಾಲವಾದ ಬದ್ಧತೆಯನ್ನು ಪ್ರದರ್ಶಿಸಬೇಕಾದ ಅಗತ್ಯವನ್ನು ಒತ್ತಿಹೇಳುತ್ತದೆ” ಎಂದು ಡಾ. ರೆಡ್ಡಿ ತಿಳಿಸಿದ್ದಾರೆ.
ಸಾರ್ವಜನಿಕ ಆರೋಗ್ಯದ ದೃಷ್ಟಿಯಿಂದ ಒಂದು ಉತ್ತಮ ಅವಕಾಶ
ಈ ಅಧ್ಯಯನದಲ್ಲಿ ಭಾಗಿಯಾಗದ, ಸಾರ್ವಜನಿಕ ಆರೋಗ್ಯ ತಜ್ಞೆ ಮತ್ತು ‘ಮೆನ್ಸ್ಟ್ರುವಲ್ ಹೆಲ್ತ್ ಆಕ್ಷನ್ ಫಾರ್ ಇಂಪ್ಯಾಕ್ಟ್’ನ (Menstrual Health Action for Impact) ಸಹ-ಸ್ಥಾಪಕಿಯಾದ ಅರುಂಧತಿ ಮುರಳಿಧರನ್ ಅವರು ಮಾತನಾಡಿ, ಭಾರತದಲ್ಲಿ ರಕ್ತಹೀನತೆಯ ಹೆಚ್ಚಿನ ಪ್ರಮಾಣ, ಬಾಲ್ಯವಿವಾಹ, ಸರಣಿ ಗರ್ಭಧಾರಣೆಗಳು ಮತ್ತು ಪೌಷ್ಟಿಕಾಂಶದ ಕೊರತೆಯಂತಹ ಅಂಶಗಳು ಮೆನೋಪಾಸ್ನ ಸಮಯದ ಮೇಲೆ ಪ್ರಭಾವ ಬೀರಬಹುದು ಎಂದು ಕೆಲವು ಸಂಶೋಧನೆಗಳು ಸೂಚಿಸುತ್ತವೆಯಾದರೂ, ಇದಕ್ಕೆ ಸಂಬಂಧಿಸಿದ ಪುರಾವೆಗಳು ಇನ್ನು ಸೀಮಿತವಾಗಿವೆ ಎಂದು ಹೇಳಿದ್ದಾರೆ.
”ಈ ವ್ಯತ್ಯಾಸಗಳಿಗೆ ಕಾರಣವೇನು ಮತ್ತು ಭಾರತದ ಒಳಗೆ ವಿವಿಧ ಆದಾಯದ ಗುಂಪುಗಳು ಹಾಗೂ ಪ್ರದೇಶಗಳ ನಡುವೆ ಮೆನೋಪಾಸ್ನ ಮಾದರಿಗಳು ಹೇಗೆ ಬದಲಾಗುತ್ತವೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ನಮಗೆ ಹೆಚ್ಚಿನ ಕ್ಲಿನಿಕಲ್ ಸಂಶೋಧನೆಗಳ ಅಗತ್ಯವಿದೆ” ಎಂದು ಅವರು ತಿಳಿಸಿದ್ದಾರೆ.
ಭಾರತವು ಈಗಾಗಲೇ ಮಧುಮೇಹ, ಅಧಿಕ ರಕ್ತದೊತ್ತಡ ಮತ್ತು ಕ್ಯಾನ್ಸರ್ನಂತಹ ಸಾಂಕ್ರಾಮಿಕವಲ್ಲದ ಕಾಯಿಲೆಗಳ (NCDs) ಮೇಲೆ ಗಮನ ಹರಿಸುವ ಬಲವಾದ ಸಾರ್ವಜನಿಕ ಆರೋಗ್ಯ ಕಾರ್ಯಕ್ರಮಗಳನ್ನು ಹೊಂದಿದೆ ಎಂದು ಮುರಳಿಧರನ್ ಪಾಯಿಂಟ್ ಮಾಡಿದ್ದಾರೆ. ಆದಾಗ್ಯೂ, ಆರೋಗ್ಯ ಸೇವೆ ಒದಗಿಸುವವರು ಈ ಕಾಯಿಲೆಗಳನ್ನು ಮೌಲ್ಯಮಾಪನ ಮಾಡುವಾಗ ಮಹಿಳೆಯರ ವಯಸ್ಸು ಮತ್ತು ಮೆನೋಪಾಸ್ನ ಇತಿಹಾಸವನ್ನು ವಾಡಿಕೆಯಾಗಿ ಪರಿಗಣಿಸುತ್ತಾರೆಯೇ ಎಂಬ ಬಗ್ಗೆ ಮಾಹಿತಿಯ ಕೊರತೆಯಿದೆ.
”ಇದು ನಮಗೊಂದು ಉತ್ತಮ ಅವಕಾಶವನ್ನು ಒದಗಿಸುತ್ತದೆ. ಮೆನೋಪಾಸ್ ಸ್ಕ್ರೀನಿಂಗ್ (ತಪಾಸಣೆ) ಮತ್ತು ಜಾಗೃತಿಯನ್ನು ಮಧುಮೇಹ, ಹೃದಯ ರಕ್ತನಾಳದ ಕಾಯಿಲೆ ಹಾಗೂ ಅಧಿಕ ರಕ್ತದೊತ್ತಡದ ಪ್ರಸ್ತುತ ಚಾಲ್ತಿಯಲ್ಲಿರುವ ಕಾರ್ಯಕ್ರಮಗಳೊಂದಿಗೆ ಸಂಯೋಜಿಸಬಹುದು. ಇದು ಮೆನೋಪಾಸ್ ಸ್ಥಿತ್ಯಂತರದ ಅವಧಿಯಲ್ಲಿ ಹೆಚ್ಚಿನ ಅಪಾಯವನ್ನು ಎದುರಿಸಬಹುದಾದ ಮಹಿಳೆಯರನ್ನು ಗುರುತಿಸಲು ಸಹಾಯ ಮಾಡುತ್ತದೆ. ಇದರ ಉದ್ದೇಶ ಕೇವಲ ಮೆನೋಪಾಸ್ನ ರೋಗಲಕ್ಷಣಗಳನ್ನು ನಿರ್ವಹಿಸುವುದು ಮಾತ್ರವಲ್ಲ, ಮಹಿಳೆಯರು ಆರೋಗ್ಯಕರವಾಗಿ ವಯಸ್ಸಾಗುವಂತೆ ಬೆಂಬಲಿಸುವುದೂ ಆಗಿದೆ” ಎಂದು ಅವರು ಹೇಳಿದ್ದಾರೆ.
