ವಾಷಿಂಗ್ಟನ್: “ಇರಾನ್ ಪ್ರತಿದಿನ 500 ಮಿಲಿಯನ್ ಡಾಲರ್ (ಸುಮಾರು 4,200 ಕೋಟಿ ರೂ.) ಗಳಿಕೆ ಮಾಡಲು ನಾವು ಬಿಡುವುದಿಲ್ಲ” ಎಂದು ಗುಡುಗಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಹಾರ್ಮುಜ್ ಜಲಸಂಧಿಯ ಮೇಲಿನ ಸೇನಾ ದಿಗ್ಬಂಧನವನ್ನು ಮುಂದುವರಿಸುವುದಾಗಿ ಶಪಥ ಮಾಡಿದ್ದಾರೆ. ಇದರಿಂದಾಗಿ ತೈಲ ರಫ್ತು ಆರಂಭಿಸುವ ಇರಾನ್ ಆಸೆಗಳಿಗೆ ತಣ್ಣೀರು ಎರಚಿದಂತಾಗಿದೆ.
ಜಾಗತಿಕ ತೈಲ ಪೂರೈಕೆಗೆ ಅತ್ಯಂತ ಪ್ರಮುಖವಾದ ‘ಹಾರ್ಮುಜ್ ಜಲಸಂಧಿ’ಯನ್ನು (Strait of Hormuz) ವಾಣಿಜ್ಯ ಉದ್ದೇಶಗಳಿಗಾಗಿ ಮುಕ್ತಗೊಳಿಸಲು ಇರಾನ್ ಮುಂದಾಗಿತ್ತು. ಇದರಿಂದ ಪ್ರತಿದಿನ 500 ಮಿಲಿಯನ್ ಡಾಲರ್ ಆದಾಯ ಗಳಿಸುವ ಲೆಕ್ಕಾಚಾರ ಇರಾನ್ಗಿತ್ತು.
ಇರಾನ್ನ ಈ ಪ್ರಸ್ತಾವನೆಯನ್ನು ತಿರಸ್ಕರಿಸಿದ ಟ್ರಂಪ್, “ಬಂಧನದಲ್ಲಿರುವ ನಮ್ಮ ಹಡಗುಗಳು ಮತ್ತು ನಾಗರಿಕರನ್ನು ಬಿಡುಗಡೆ ಮಾಡದ ಹೊರತು ಹಾಗೂ ಭಯೋತ್ಪಾದನೆಗೆ ನೀಡುತ್ತಿರುವ ಬೆಂಬಲ ನಿಲ್ಲಿಸದ ಹೊರತು ಈ ಆರ್ಥಿಕ ದಿಗ್ಬಂಧನ ಮುಂದುವರಿಯಲಿದೆ” ಎಂದು ಸ್ಪಷ್ಟಪಡಿಸಿದ್ದಾರೆ.
ಅಮೆರಿಕದ ಈ ಕಠಿಣ ನಿಲುವಿನಿಂದಾಗಿ ಇರಾನ್ನ ಆರ್ಥಿಕತೆ ಮತ್ತಷ್ಟು ಹದಗೆಡುವ ಸಾಧ್ಯತೆಯಿದೆ. ತೈಲ ರಫ್ತು ಸ್ಥಗಿತಗೊಂಡಿರುವುದು ಇರಾನ್ ಮೇಲೆ ಭಾರಿ ಒತ್ತಡ ಹೇರುತ್ತಿದೆ.
