ಬೆಂಗಳೂರು: ಪ್ರಸ್ತುತ ನಡೆಯುತ್ತಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ಮಹಾಸಮರವು ಲೀಗ್ ಹಂತದ ಅಂತ್ಯಕ್ಕೆ ಬಂದು ತಲುಪಿದೆ. ಟಾಪ್-4 ಸ್ಥಾನ ಗಿಟ್ಟಿಸಿಕೊಂಡು ಯಾವ ತಂಡಗಳು ಪ್ಲೇಆಫ್ ಪ್ರವೇಶಿಸಲಿವೆ ಎಂಬ ಕುತೂಹಲ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಆದರೆ, ಲೀಗ್ನ ಮೊದಲಾರ್ಧದಲ್ಲಿ ಅಜೇಯರಾಗಿ ಮೆರೆದಿದ್ದ ಪಂಜಾಬ್ ಕಿಂಗ್ಸ್ (PBKS) ತಂಡದ ಸದ್ಯದ ಪರಿಸ್ಥಿತಿ ಮಾತ್ರ ‘ನಗಬೇಕೋ ಅಥವಾ ಅಳಬೇಕೋ’ ಎನ್ನುವಂತಾಗಿದೆ.
ಸುಮ್ಮನೆ ಕೂರದೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವನ್ನು ಕೆಣಕಿದ ಪಂಜಾಬ್ ಕಿಂಗ್ಸ್, ಆ ಬಳಿಕ ಒಂದೇ ಒಂದು ಪಂದ್ಯವನ್ನೂ ಗೆಲ್ಲಲಾಗದೆ ಮಕಾಡೆ ಮಲಗಿದೆ!
ಅಜೇಯ ಹಾದಿಯಲ್ಲಿತ್ತು ಪಂಜಾಬ್ ಕಿಂಗ್ಸ್!
ಟೂರ್ನಿಯ ಮೊದಲಾರ್ಧದಲ್ಲಿ ಪಂಜಾಬ್ ಕಿಂಗ್ಸ್ ಅಕ್ಷರಶಃ ಅಬ್ಬರಿಸಿತ್ತು. ಆಡಿದ ಮೊದಲ 7 ಪಂದ್ಯಗಳಲ್ಲಿ ತಂಡ ಒಂದೂ ಸೋಲನ್ನು ಕಂಡಿರಲಿಲ್ಲ. ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧದ ಪಂದ್ಯ ಮಳೆಯಿಂದ ರದ್ದಾಗಿದ್ದರಿಂದ 1 ಅಂಕ ಹಾಗೂ ಉಳಿದ 6 ಪಂದ್ಯಗಳಲ್ಲಿ ಭರ್ಜರಿ ಗೆಲುವು ಸಾಧಿಸಿ, ಒಟ್ಟು 13 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಸಿಂಹಾಸನ ಏರಿ ಕುಳಿತಿತ್ತು. “ಇನ್ನೊಂದು ಎರಡು ಪಂದ್ಯ ಗೆದ್ದರೆ ಸಾಕು, ಪಂಜಾಬ್ ಆರಾಮಾಗಿ ಪ್ಲೇಆಫ್ ತಲುಪಲಿದೆ” ಎಂದು ಕ್ರಿಕೆಟ್ ಪಂಡಿತರು ಭವಿಷ್ಯ ನುಡಿದಿದ್ದರು. ಆದರೆ ವಿಧಿ ಆಟವೇ ಬೇರೆಯಾಗಿತ್ತು.
ಸುಮ್ಮನಿರಲಾರದೆ ಇರುವೆ ಬಿಟ್ಟುಕೊಂಡ ಅಡ್ಮಿನ್!
ರಾಜಸ್ಥಾನ್ ರಾಯಲ್ಸ್ ವಿರುದ್ಧದ 8ನೇ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ತಂಡದ ಸೋಶಿಯಲ್ ಮೀಡಿಯಾ ಅಡ್ಮಿನ್ ಮಾಡಿದ ಒಂದು ಟ್ವೀಟ್ ಇಡೀ ತಂಡದ ಹಣೆಬರಹವನ್ನೇ ಬದಲಿಸಿತು. ಪಂದ್ಯದ ವೇಳೆ ಮೊದಲು ಬ್ಯಾಟಿಂಗ್ ಮಾಡಿದ ಪಂಜಾಬ್ 4.3 ಓವರ್ಗಳಲ್ಲಿ 49 ರನ್ ದಾಟಿದ ತಕ್ಷಣ, ಅಡ್ಮಿನ್ ಅತಿರೇಕದ ಉತ್ಸಾಹದಲ್ಲಿ ಆರ್ಸಿಬಿ ಐಪಿಎಲ್ ಇತಿಹಾಸದಲ್ಲಿ ದಾಖಲಿಸಿರುವ ಅತಿ ಕಡಿಮೆ ಮೊತ್ತವಾದ (49 ರನ್) ರನ್ನನ್ನು ಉಲ್ಲೇಖಿಸಿ ಟ್ರೋಲ್ ಮಾಡಿದ್ದ. “ನಿಮ್ ಥರ ನಾವು 49ಕ್ಕೆ ಆಲ್ಔಟ್ ಆಗಿಲ್ಲ” ಎಂಬ ಧಾಟಿಯಲ್ಲಿ ಕೆಣಕಿದ್ದ.
ಇದರಿಂದ ಕೆರಳಿದ ಆರ್ಸಿಬಿ ಅಭಿಮಾನಿಗಳು ಪಂಜಾಬ್ ಅಡ್ಮಿನ್ಗೆ ಸಾಮಾಜಿಕ ಜಾಲತಾಣದಲ್ಲೇ ಹಿಗ್ಗಾಮುಗ್ಗಾ ಕ್ಲಾಸ್ ತೆಗೆದುಕೊಂಡಿದ್ದರು. ಆ ಪಂದ್ಯದಲ್ಲಿ ಪಂಜಾಬ್ 222 ರನ್ಗಳ ಬೃಹತ್ ಮೊತ್ತ ಕಲೆಹಾಕಿದರೂ, ರಾಜಸ್ಥಾನ್ ಆ ಮೊತ್ತವನ್ನು ಯಶಸ್ವಿಯಾಗಿ ಚೇಸ್ ಮಾಡಿ ಪಂಜಾಬ್ಗೆ ಮೊದಲ ಸೋಲಿನ ರುಚಿ ತೋರಿಸಿತು.
ಅಂದು ಬಿದ್ದ ಪಂಜಾಬ್, ಇಂದು ಎದ್ದಿಲ್ಲ!
ಆರ್ಸಿಬಿಗೆ ಶಾಪ ಹಾಕಿದ ಬೆನ್ನಲ್ಲೇ ಪಂಜಾಬ್ ಕಿಂಗ್ಸ್ ತಂಡದ ಗ್ರಹಚಾರವೇ ಬದಲಾದಂತಿದೆ. ರಾಜಸ್ಥಾನ್ ವಿರುದ್ಧ ಸೋತ ಬಳಿಕ ಪಂಜಾಬ್ ಚೇತರಿಸಿಕೊಳ್ಳಲೇ ಇಲ್ಲ.
ಗುಜರಾತ್ ಟೈಟನ್ಸ್ ವಿರುದ್ಧ ಸೋಲು
ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಸೋಲು
ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸೋಲು
ಮುಂಬೈ ಇಂಡಿಯನ್ಸ್ ವಿರುದ್ಧ ಸೋಲು
ಮೇ 17ರಂದು ನಡೆದ ಪಂದ್ಯದಲ್ಲಿ ಅದೇ ಆರ್ಸಿಬಿ ವಿರುದ್ಧ 23 ರನ್ಗಳ ಹೀನಾಯ ಸೋಲು!
ಹೀಗೆ ಸತತವಾಗಿ 6 ಪಂದ್ಯಗಳಲ್ಲಿ ಸೋಲುವ ಮೂಲಕ ಪಂಜಾಬ್ ತಂಡ ಹಿನಾಯ ಸ್ಥಿತಿ ತಲುಪಿದೆ. ಆರ್ಸಿಬಿಯನ್ನು ಅನಗತ್ಯವಾಗಿ ಟ್ರೋಲ್ ಮಾಡಲು ಹೋಗಿ ಸದ್ಯ ಸೋತು ಸುಣ್ಣವಾಗಿದೆ.
ಪ್ಲೇಆಫ್ ಕನಸು ನುಚ್ಚುನೂರು?
ಸದ್ಯ ಪಂಜಾಬ್ ಕಿಂಗ್ಸ್ಗೆ ಲೀಗ್ ಹಂತದಲ್ಲಿ ಇನ್ನು ಕೇವಲ ಒಂದೇ ಒಂದು ಪಂದ್ಯ ಬಾಕಿ ಉಳಿದಿದೆ. ಆ ಪಂದ್ಯವನ್ನು ಭಾರಿ ರನ್ ರೇಟ್ನಿಂದ ಗೆದ್ದರೂ ಸಹ, ಇತರ ತಂಡಗಳ ಫಲಿತಾಂಶದ ಮೇಲೆ ಅವಲಂಬಿತವಾಗಬೇಕಿರುವುದರಿಂದ ಪಂಜಾಬ್ ಪ್ಲೇಆಫ್ ಪ್ರವೇಶಿಸುವುದು ಬಹುತೇಕ ಅಸಾಧ್ಯ ಎನ್ನಲಾಗುತ್ತಿದೆ.
Bye Bye Punjab👋
As a cuban kid always said, here we meet once again in the next IPL😭 https://t.co/pNZXwR7RcI pic.twitter.com/pmwqS6AXQd
— Sree Harsha (@AapathBandhava) May 17, 2026
