ಪೋಲೆಂಡ್ನ ಮಹಿಳಾ ವೈದ್ಯೆಯೊಬ್ಬರ ಹಳೆಯ ಮನೆಯ ತೋಟದಲ್ಲಿ 34 ಮಾನವ ಭ್ರೂಣಗಳು ಹೂತುಹಾಕಿದ ಸ್ಥಿತಿಯಲ್ಲಿ ಪತ್ತೆಯಾದ ನಂತರ ಆಕೆಯನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಅಧಿಕಾರಿಗಳು ಸೋಮವಾರ ತಿಳಿಸಿದ್ದಾರೆ.
ಯಾವುದೇ ಕ್ರಿಮಿನಲ್ ಹಿನ್ನೆಲೆ ಹೊಂದಿರದ 57 ವರ್ಷದ ವೈದ್ಯಕೀಯ ರೋಗಶಾಸ್ತ್ರಜ್ಞೆ (Medical Pathologist) ಮ್ಯಾಗ್ಡಲೇನಾ ಹೆಚ್. ಎಂದು ಗುರುತಿಸಲಾದ ಈ ವೈದ್ಯೆ, ಮನೆಯಲ್ಲಿ ಪ್ರಯೋಗಗಳನ್ನು ನಡೆಸಲು ಈ ಭ್ರೂಣಗಳನ್ನು ಬಳಸಿರುವ ಶಂಕೆ ಇದ್ದು, ಪ್ರಸ್ತುತ ಆಕೆ ಗರಿಷ್ಠ 12 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ಎದುರಿಸಬೇಕಾಗಬಹುದು.
ಯುರೋಪ್ನಲ್ಲೇ ಅತ್ಯಂತ ಕಠಿಣ ಗರ್ಭಪಾತ ನಿಯಮಗಳನ್ನು ಹೊಂದಿರುವ ದೇಶ ಎಂದು ಹೆಸರಾಗಿರುವ, ಪ್ರಮುಖವಾಗಿ ಕ್ಯಾಥೋಲಿಕ್ ಧರ್ಮೀಯರೇ ಹೆಚ್ಚಿರುವ ಪೋಲೆಂಡ್ನಲ್ಲಿ ಈ ಪ್ರಕರಣವು ವ್ಯಾಪಕ ವಿವಾದವನ್ನು ಹುಟ್ಟುಹಾಕಿದೆ. ಹುಟ್ಟದ ಮಕ್ಕಳ ಅವಶೇಷಗಳನ್ನು ಪಡೆಯಲು ಈ ವೈದ್ಯೆಗೆ ಹೇಗೆ ಸಾಧ್ಯವಾಯಿತು ಎಂದು ಅನೇಕ ಜನರು ಪ್ರಶ್ನಿಸುತ್ತಿದ್ದಾರೆ. ಆದಾಗ್ಯೂ, ಈ ಭ್ರೂಣಗಳು ಅಕ್ರಮ ಗರ್ಭಪಾತಗಳಿಗೆ ಸಂಬಂಧಿಸಿವೆ ಎಂಬುದಕ್ಕೆ ತನಿಖಾಧಿಕಾರಿಗಳಿಗೆ ಇದುವರೆಗೆ ಯಾವುದೇ ಪುರಾವೆಗಳು ಸಿಕ್ಕಿಲ್ಲ ಎಂದು ಪ್ರಾಸಿಕ್ಯೂಟರ್ ಕಚೇರಿಯ ವಕ್ತಾರರು ತಿಳಿಸಿದ್ದಾರೆ.
ಮಾನವ ದೇಹದ ಅವಶೇಷಗಳಿಗೆ ಅಪಚಾರ ಎಸಗಿರುವುದು, ವೈದ್ಯಕೀಯ ತ್ಯಾಜ್ಯವನ್ನು ಸೂಕ್ತವಲ್ಲದ ರೀತಿಯಲ್ಲಿ ವಿಲೇವಾರಿ ಮಾಡಿರುವುದು ಮತ್ತು ಅನಧಿಕೃತ ಸ್ಥಳದಲ್ಲಿ ಅಪಾಯಕಾರಿ ವಸ್ತುಗಳನ್ನು ಬಿಟ್ಟುಹೋಗಿರುವುದು ವೈದ್ಯೆಯ ಮೇಲಿರುವ ಆರೋಪಗಳಾಗಿವೆ. ಕಳೆದ ವಾರ, ಆಕೆಯ ಆಗ್ನೇಯ ಭಾಗದ ಲುಟೋರಿಜ್ (Lutoryz) ಗ್ರಾಮದ ಮಾಜಿ ನಿವಾಸದಲ್ಲಿ ನಿರ್ಮಾಣ ಕಾಮಗಾರಿಯ ಸಂದರ್ಭದಲ್ಲಿ ವೈದ್ಯಕೀಯ ತ್ಯಾಜ್ಯ ಪತ್ತೆಯಾದ ನಂತರ ಅಧಿಕಾರಿಗಳು ತನಿಖೆಯನ್ನು ಪ್ರಾರಂಭಿಸಿದ್ದರು.
ಸಂಶೋಧನಾ ಉದ್ದೇಶಗಳಿಗಾಗಿ ಬಳಸಲಾದ ಭ್ರೂಣಗಳು
ಡಜನ್ಗಟ್ಟಲೆ ಪೊಲೀಸ್ ಅಧಿಕಾರಿಗಳು, ಶ್ವಾನದಳ ಮತ್ತು ಅತ್ಯಾಧುನಿಕ ರೇಡಾರ್ (Ground-penetrating radar) ತಂತ್ರಜ್ಞಾನವನ್ನು ಒಳಗೊಂಡ ಬೃಹತ್ ಶೋಧ ಕಾರ್ಯಾಚರಣೆಯು, ಆಸ್ತಿಯ ತೋಟದಲ್ಲಿ ಕನಿಷ್ಠ 34 ಭ್ರೂಣಗಳನ್ನು ಹೂತಿಟ್ಟಿರುವುದನ್ನು ಪತ್ತೆಹಚ್ಚಲು ಕಾರಣವಾಯಿತು. ರ್ಜೆಸ್ಜೋವ್ (Rzeszów) ಜಿಲ್ಲಾ ಪ್ರಾಸಿಕ್ಯೂಟರ್ ಕಚೇರಿಯ ವಕ್ತಾರ ಕ್ರ್ಜಿಸ್ಜ್ಟೋಫ್ ಸೀಚನೋವ್ಸ್ಕಿ ಅವರ ಪ್ರಕಾರ, ಬಂಧಿತ ಮಹಿಳೆಯು ಈ ಜೈವಿಕ ವಸ್ತುಗಳನ್ನು ಸಂಶೋಧನಾ ಉದ್ದೇಶಗಳಿಗಾಗಿ ಬಳಸಿರುವ ಸಾಧ್ಯತೆಯಿದೆ.
AFP ಸಂಸ್ಥೆಯು ಪೋಲೆಂಡ್ನ ‘ರೇಡಿಯೋ ಎಸ್ಕಾ’ವನ್ನು ಉಲ್ಲೇಖಿಸಿ ವರದಿ ಮಾಡಿರುವ ಪ್ರಕಾರ, ಮ್ಯಾಗ್ಡಲೇನಾ ಹೆಚ್. ಅವರು ಕೋವಿಡ್-19 ಜಾಗತಿಕ ಸಾಂಕ್ರಾಮಿಕದ ಸಮಯದಲ್ಲಿ ತಾನು ಕೆಲಸ ಮಾಡುತ್ತಿದ್ದ ರ್ಜೆಸ್ಜೋವ್ನ ಆಸ್ಪತ್ರೆಯಿಂದ ಈ ಭ್ರೂಣಗಳನ್ನು ತನ್ನ ಮನೆಯಲ್ಲೇ ಪ್ರಯೋಗಗಳನ್ನು ನಡೆಸಲು ಯಾರಿಗೂ ತಿಳಿಸದೆ ಸಾಗಿಸಿದ್ದರು. ಶೋಧ ಕಾರ್ಯದ ಸಮಯದಲ್ಲಿ ಮೃತದೇಹಗಳ ಜೊತೆಗೆ ಹತ್ತಾರು ಸಾವಿರ ಮೈಕ್ರೋಸ್ಕೋಪ್ ಸ್ಲೈಡ್ಗಳು, “ದಾಖಲೆಗಳ ಕೆಲವು ಭಾಗಗಳು” ಮತ್ತು ಪ್ಯಾರಾಫಿನ್ ಬ್ಲಾಕ್ಗಳು ಸಹ ಪತ್ತೆಯಾಗಿವೆ.
ವೈದ್ಯೆಯನ್ನು ಶುಕ್ರವಾರ ಬಂಧಿಸಲಾಗಿದ್ದು, ಮೂರು ತಿಂಗಳ ಅವಧಿಗೆ ನ್ಯಾಯಾಂಗ ಬಂಧನದಲ್ಲಿಡಲಾಗಿದೆ. ನ್ಯಾಯಾಲಯದ ವಿಚಾರಣೆಯ ಸಂದರ್ಭದಲ್ಲಿ ಆಕೆ ತನ್ನ ಮೇಲಿನ ಆರೋಪಗಳನ್ನು ನಿರಾಕರಿಸಿದ್ದಾಳೆ. ಆದರೆ ತನ್ನ ಆಸ್ತಿಯಲ್ಲಿ ಪತ್ತೆಯಾದ ಮಾನವ ಭ್ರೂಣಗಳನ್ನು ಮತ್ತು ಇತರ ವೈದ್ಯಕೀಯ ತ್ಯಾಜ್ಯವನ್ನು ತಾನೇ ಸಾಗಿಸಿ ಹೂತುಹಾಕಿದ್ದಾಗಿ ಒಪ್ಪಿಕೊಂಡಿದ್ದಾಳೆ ಎಂದು ಪ್ರಾಸಿಕ್ಯೂಟರ್ ವಕ್ತಾರರು ತಿಳಿಸಿದ್ದಾರೆ. ತನಿಖಾಧಿಕಾರಿಗಳು ಇನ್ನೂ ಭ್ರೂಣಗಳ ಗುರುತನ್ನು ಪತ್ತೆಹಚ್ಚಿಲ್ಲ. ಪೋಲೆಂಡ್ನ ಗೌಪ್ಯತೆ ನಿಯಮಗಳ ಪ್ರಕಾರ ಸರ್ನೇಮ್ (ಮನೆಹೆಸರು) ಬಹಿರಂಗಪಡಿಸದ ಮ್ಯಾಗ್ಡಲೇನಾ ಹೆಚ್., ಈ ಕೃತ್ಯದಲ್ಲಿ ಸ್ವತಂತ್ರವಾಗಿ ಕಾರ್ಯನಿರ್ವಹಿಸಿದ್ದಾಳೋ ಅಥವಾ ಇತರರ ಪಾಲ್ಗೊಳ್ಳುವಿಕೆ ಇದೆಯೇ ಎಂಬುದನ್ನು ಅಧಿಕಾರಿಗಳು ಇನ್ನೂ ಪರಿಶೀಲಿಸುತ್ತಿದ್ದಾರೆ.
