ಹೈದರಾಬಾದ್: ಅನೈತಿಕ ಸಂಬಂಧಕ್ಕೆ ಕಣ್ಣಾಲಿಗಳಂತಿದ್ದ ಆರು ವರ್ಷದ ಮಗಳೇ ಅಡ್ಡಿಯಾಗಿದ್ದಾಳೆಂಬ ಕಾರಣಕ್ಕೆ, ಹೆತ್ತ ತಾಯಿಯೇ ಮಗಳನ್ನೇ ನೀರಿನ ಟ್ಯಾಂಕ್ಗೆ ಹಾಕಿ ಅತ್ಯಂತ ಕ್ರೂರವಾಗಿ ಕೊಲೆ ಮಾಡಿರುವ ಭೀಕರ ಘಟನೆ ಹೈದರಾಬಾದ್ನ ಅಲ್ವಾಲ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಬೆಳಕಿಗೆ ಬಂದಿದೆ.
ಓಲ್ಡ್ ಅಲ್ವಾಲ್ನ ಅಂಬೇಡ್ಕರ್ ನಗರದ ನಿವಾಸಿ ಯಾದಗಿರಿ ಎಂಬುವವರಿಗೆ ಇಬ್ಬರು ಪುತ್ರಿಯರಿದ್ದಾರೆ. ಅವರ ಕಿರಿಯ ಮಗಳು ರೇಖಾಗೆ 2020 ರಲ್ಲಿ ರಾಜು ಎಂಬುವವರ ಜೊತೆ ವಿವಾಹವಾಗಿತ್ತು. ಆದರೆ, ಮದುವೆಗೆ ಮುಂಚಿತವಾಗಿಯೇ ರೇಖಾ ಗರ್ಭಿಣಿಯಾಗಿದ್ದ ವಿಷಯ ಪತಿ ರಾಜುಗೆ ತಿಳಿದಿತ್ತು. ಮದುವೆಯ ನಂತರ ದಂಪತಿಗೆ ಹೆಣ್ಣು ಮಗು ಜನಿಸಿದ್ದು, ಆಕೆಗೆ ತನ್ವಿಕಾ (6 ವರ್ಷ) ಎಂದು ಹೆಸರಿಡಲಾಗಿತ್ತು. ಆದರೆ, ಮದುವೆಗೂ ಮುನ್ನವೇ ಗರ್ಭಿಣಿಯಾಗಿದ್ದ ವಿಷಯವಾಗಿ ದಂಪತಿ ನಡುವೆ ನಿರಂತರ ಜಗಳ ನಡೆಯುತ್ತಿತ್ತು. ಈ ಮನಸ್ತಾಪದಿಂದಾಗಿ ಇಬ್ಬರೂ ದೂರ ಇರಲಾರಂಭಿಸಿದ್ದರು.
ಈ ನಡುವೆ, ರೇಖಾ ತಂದೆ ಯಾದಗಿರಿ ತಮ್ಮ ಸ್ವಂತ ಮನೆಯನ್ನು ಮಾರಿ ಓಲ್ಡ್ ಅಲ್ವಾಲ್ಗೆ ವಾಸ್ತವ್ಯ ಬದಲಾಯಿಸಿದ್ದರು. ಅಲ್ಲಿ ರೇಖಾಗೆ ತನಗಿಂತ ವಯಸ್ಸಿನಲ್ಲಿ ಚಿಕ್ಕವನಾದ ಸಾಯಿ (21) ಎಂಬ ಯುವಕನ ಪರಿಚಯವಾಗಿತ್ತು. ಸ್ಥಳೀಯ ಕಿರಾಣಿ ಅಂಗಡಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಸಾಯಿ ಜೊತೆಗಿನ ರೇಖಾ ಪರಿಚಯ, ದಿನಕಳೆದಂತೆ ಅಕ್ರಮ ಸಂಬಂಧಕ್ಕೆ ತಿರುಗಿತ್ತು.
ಸಾಯಿ ಪ್ರೀತಿಯಲ್ಲಿ ಮುಳುಗಿದ್ದ ರೇಖಾ, ತನ್ನನ್ನು ಮದುವೆಯಾಗುವಂತೆ ಆತನ ಮೇಲೆ ಒತ್ತಡ ಹೇರಲಾರಂಭಿಸಿದಳು. ಆದರೆ ಸಾಯಿ, “ನಿನಗೆ ಈಗಾಗಲೇ 6 ವರ್ಷದ ಮಗಳಿದ್ದಾಳೆ, ಆಕೆ ಇರುವಾಗ ನಾನು ನಿನ್ನನ್ನು ಹೇಗೆ ಮದುವೆಯಾಗಲಿ?” ಎಂದು ನಿರಾಕರಿಸಿ, ರೇಖಾಳಿಂದ ದೂರವಿರಲು ಪ್ರಯತ್ನಿಸಿದ್ದಾನೆ.
ಇತ್ತೀಚೆಗೆ ಯಾದಗಿರಿ ಕುಟುಂಬ ಮತ್ತೆ ಅಂಬೇಡ್ಕರ್ ನಗರದ ಬಾಡಿಗೆ ಮನೆಗೆ ಶಿಫ್ಟ್ ಆಗಿತ್ತು. ಆದರೂ ರೇಖಾ ಮಾತ್ರ ಸಾಯಿ ಧ್ಯಾನದಲ್ಲೇ ಇದ್ದಳು. ತನ್ನ ಪ್ರಿಯಕರ ತನ್ನನ್ನು ಮದುವೆಯಾಗದೇ ದೂರ ಇಡಲು ಮಗಳು ತನ್ವಿಕಾಳೇ ಕಾರಣ ಎಂದು ಬಲವಾಗಿ ನಂಬಿದ ರೇಖಾ, ಮಗಳನ್ನು ಇಲ್ಲದಂತೆ ಮಾಡಲು ಕ್ರೂರ ಯೋಜನೆ ರೂಪಿಸಿದಳು.
ಶನಿವಾರ ತಡರಾತ್ರಿ ಎಲ್ಲರೂ ಮಲಗಿದ್ದಾಗ, ರೇಖಾ ತನ್ನ 6 ವರ್ಷದ ಮಗಳು ತನ್ವಿಕಾಳನ್ನು ಮನೆಯ ಮೇಲ್ಛಾವಣಿಗೆ ಕರೆದೊಯ್ದಿದ್ದಾಳೆ. ಅಲ್ಲಿನ ನೀರಿನ ಟ್ಯಾಂಕ್ ಮುಚ್ಚಳವನ್ನು ತೆಗೆದು, ಮಗುವನ್ನು ಜೀವಂತವಾಗಿ ಟ್ಯಾಂಕ್ ಒಳಗಡೆ ತಳ್ಳಿದ್ದಾಳೆ. ಅಷ್ಟಕ್ಕೇ ನಿಲ್ಲದೆ, ಟ್ಯಾಂಕ್ ಮುಚ್ಚಳವನ್ನು ಗಟ್ಟಿಯಾಗಿ ಬಂದ್ ಮಾಡಿ, ಬೋರ್ವೆಲ್ ನೀರನ್ನು ಆನ್ ಮಾಡಿ ಟ್ಯಾಂಕ್ ಸಂಪೂರ್ಣ ತುಂಬುವಂತೆ ಮಾಡಿದ್ದಾಳೆ. ಮಗು ಉಸಿರುಗಟ್ಟಿ ಟ್ಯಾಂಕ್ ಒಳಗಡೆಯೇ ಮೃತಪಟ್ಟಿದೆ.
ಮಗಳನ್ನು ಕೊಂದ ನಂತರ ರೇಖಾ ತನಗೇನೂ ತಿಳಿಯದಂತೆ ನಾಟಕವಾಡಿದ್ದಾಳೆ. ಮಗಳು ಕಾಣೆಯಾಗಿದ್ದಾಳೆ ಎಂದು ಶನಿವಾರ ರಾತ್ರಿಯಿಂದಲೇ ಮನೆಯವರನ್ನು ಮತ್ತು ನೆರೆಹೊರೆಯವರನ್ನು ನಂಬಿಸಲು ಯತ್ನಿಸಿದ್ದಾಳೆ. ಆದರೆ, ಭಾನುವಾರ ಸಂಜೆ ರೇಖಾ ಸಹೋದರಿ ಶ್ವೇತಾ ಮನೆಯ ಮೇಲಿನ ನೀರಿನ ಟ್ಯಾಂಕ್ ನಲ್ಲಿ ತನ್ವಿಕಾಳ ಶವ ತೇಲುತ್ತಿರುವುದನ್ನು ನೋಡಿ ದಿಗ್ಭ್ರಮೆಗೊಂಡಿದ್ದಾರೆ. ತಕ್ಷಣ ಅವರು ಅಲ್ವಾಲ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ಪೊಲೀಸರು ಆರಂಭದಲ್ಲಿ ಅನುಮಾನಾಸ್ಪದ ಸಾವು ಎಂದು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದರು. ಆದರೆ, ಆ ಪ್ರದೇಶದ ಸಿಸಿಟಿವಿ (CCTV) ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ, ಶನಿವಾರ ರಾತ್ರಿ ರೇಖಾ ತನ್ನ ಮಗಳನ್ನು ಬಲವಂತವಾಗಿ ಮೇಲ್ಛಾವಣಿಗೆ ಕರೆದೊಯ್ಯುತ್ತಿರುವುದು ಸ್ಪಷ್ಟವಾಗಿ ದಾಖಲಾಗಿತ್ತು. ಇದರಿಂದ ಅನುಮಾನಗೊಂಡ ಪೊಲೀಸರು ರೇಖಾಳನ್ನು ತಮ್ಮದೇ ಶೈಲಿಯಲ್ಲಿ ವಿಚಾರಣೆಗೆ ಒಳಪಡಿಸಿದಾಗ ಅಸಲಿ ಸತ್ಯ ಹೊರಬಿದ್ದಿದೆ. ಪ್ರಿಯಕರನಿಗಾಗಿ ತಾನೇ ಮಗಳನ್ನು ನೀರಿನ ಟ್ಯಾಂಕ್ಗೆ ಹಾಕಿ ಕೊಂದಿರುವುದಾಗಿ ಆಕೆ ಒಪ್ಪಿಕೊಂಡಿದ್ದಾಳೆ.
ಪ್ರಸ್ತುತ ಅಲ್ವಾಲ್ ಪೊಲೀಸರು ಹೆತ್ತ ಮಗಳನ್ನೇ ಕೊಂದ ತಾಯಿ ರೇಖಾ ಹಾಗೂ ಈ ಅಪರಾಧಕ್ಕೆ ಪರೋಕ್ಷವಾಗಿ ಕಾರಣನಾದ ಪ್ರಿಯಕರ ಸಾಯಿ ಇಬ್ಬರನ್ನೂ ಬಂಧಿಸಿ, ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ. ಹೆತ್ತ ತಾಯಿಯೇ ಯಮನಾಗಿ ಬದಲಾದ ಈ ಘಟನೆ ಸ್ಥಳೀಯವಾಗಿ ತೀವ್ರ ಸಂಚಲನ ಮೂಡಿಸಿದೆ.
