ಪುಣೆಯ ದಂಪತಿಯೊಬ್ಬರ ವಿಚ್ಛೇದನ ಪ್ರಕರಣಕ್ಕೆ ಸಂಬಂಧಿಸಿದ ಸಾಮಾಜಿಕ ಜಾಲತಾಣದ ಪೋಸ್ಟ್ ಒಂದರ ಮಾಹಿತಿಯು ಆನ್ಲೈನ್ನಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ತಿಂಗಳಿಗೆ 1.4 ಲಕ್ಷ ರೂಪಾಯಿಗೂ ಹೆಚ್ಚು ಗಳಿಸುವ ದುಡಿಯುವ ಮಹಿಳೆಗೆ, ಮಾಸಿಕ 1.35 ಲಕ್ಷ ರೂಪಾಯಿ ಜೀವನಾಂಶವನ್ನು ನ್ಯಾಯಾಲಯ ಮಂಜೂರು ಮಾಡಿದೆ ಎಂಬುದು ಈ ಚರ್ಚೆಯ ವಿಷಯ.
’ಎಕ್ಸ್’ (X) ವೇದಿಕೆಯಲ್ಲಿ ಹಂಚಿಕೊಳ್ಳಲಾದ ಈ ಪೋಸ್ಟ್ ಪ್ರಕಾರ, ಪುಣೆಯ ಈ ದಂಪತಿ ಇಬ್ಬರೂ ಉದ್ಯೋಗಿಗಳಾಗಿದ್ದು, ಮದುವೆಯಾದ ಕೇವಲ ಆರು ತಿಂಗಳಲ್ಲಿಯೇ ಗಂಭೀರ ವೈವಾಹಿಕ ಸಮಸ್ಯೆಗಳಿಂದಾಗಿ ಬೇರ್ಪಡಲು ನಿರ್ಧರಿಸಿದರು. ವೈರಲ್ ಪೋಸ್ಟ್ನಲ್ಲಿ ಉಲ್ಲೇಖಿಸಲಾದ ವಿವರಗಳ ಪ್ರಕಾರ, ಪತಿಯು ತಿಂಗಳಿಗೆ 2,79,499 ರೂಪಾಯಿಗಳ ಕೈತುಂಬಾ ಸಂಬಳವನ್ನು ಪಡೆಯುತ್ತಿದ್ದರೆ, ಪತ್ನಿಯು ಮಾಸಿಕ 1,41,436 ರೂಪಾಯಿಗಳನ್ನು ಗಳಿಸುತ್ತಿದ್ದರು.
ಪತಿಯು ತನ್ನ ಹೆತ್ತವರ ಆರ್ಥಿಕ ಜವಾಬ್ದಾರಿಯನ್ನೂ ಹೊತ್ತಿದ್ದಾರೆ ಎಂದು ಪೋಸ್ಟ್ನಲ್ಲಿ ತಿಳಿಸಲಾಗಿದೆ. ಪತ್ನಿಯು ಸ್ವತಃ ಗಣನೀಯ ಆದಾಯವನ್ನು ಹೊಂದಿದ್ದರೂ, ಮದುವೆಯ ಸಂದರ್ಭದಲ್ಲಿ ತಾವು ಅನುಭವಿಸಿದ ಜೀವನಶೈಲಿಯನ್ನೇ ಮುಂದುವರಿಸಲು ತಮಗೆ ಹಕ್ಕಿದೆ ಎಂದು ಅವರು ನ್ಯಾಯಾಲಯದಲ್ಲಿ ವಾದಿಸಿದ್ದರು ಎಂದು ಹೇಳಲಾಗಿದೆ.
ಇದರ ಪರಿಣಾಮವಾಗಿ, ನ್ಯಾಯಾಲಯವು ಪತಿಗೆ ಮಾಸಿಕ 1,35,000 ರೂಪಾಯಿಗಳನ್ನು ಜೀವನಾಂಶವಾಗಿ ಪಾವತಿಸುವಂತೆ ನಿರ್ದೇಶಿಸಿದೆ ಎಂದು ವರದಿಯಾಗಿದೆ.ಈ ಪೋಸ್ಟ್ನಲ್ಲಿ ಹಂಚಿಕೊಂಡ ಅಂಕಿಅಂಶಗಳ ಪ್ರಕಾರ, ಜೀವನಾಂಶ ಪಡೆದ ನಂತರ ಪತ್ನಿಯ ಒಟ್ಟು ಮಾಸಿಕ ಆದಾಯವು 2,76,436 ರೂಪಾಯಿಗಳಿಗೆ ಏರಿಕೆಯಾಗುತ್ತದೆ. ಮತ್ತೊಂದೆಡೆ, ಪತಿಯ ಉಳಿಕೆ ಮಾಸಿಕ ಆದಾಯವು 1,44,499 ರೂಪಾಯಿಗಳಿಗೆ ಇಳಿಯುತ್ತದೆ.
ಈ ವ್ಯವಸ್ಥೆಯ ತೆರಿಗೆ ಪರಿಣಾಮಗಳನ್ನು ಸಹ ಪೋಸ್ಟ್ನಲ್ಲಿ ಎತ್ತಿ ತೋರಿಸಲಾಗಿದೆ. ಆದಾಯ ತೆರಿಗೆ ನಿಯಮಗಳ ಅಡಿಯಲ್ಲಿ ಜೀವನಾಂಶ ಪಾವತಿಗಳನ್ನು ವೈಯಕ್ತಿಕ ವೆಚ್ಚಗಳೆಂದು ಪರಿಗಣಿಸಲಾಗುವುದರಿಂದ, ಪತಿಯು ಜೀವನಾಂಶದ ಮೊತ್ತದ ಮೇಲೆ ಯಾವುದೇ ತೆರಿಗೆ ವಿನಾಯಿತಿಯನ್ನು ಪಡೆಯಲು ಅರ್ಹರಲ್ಲ ಎಂದು ಅದು ಹೇಳಿದೆ.
ಪರಿಣಾಮವಾಗಿ, ಅವರು ಜೀವನಾಂಶವಾಗಿ ಪಾವತಿಸುವ ಮೊತ್ತವನ್ನೂ ಒಳಗೊಂಡಂತೆ ತಮ್ಮ ಸಂಪೂರ್ಣ ಸಂಬಳದ ಮೇಲೆ ಆದಾಯ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ. “ಐಟಿಡಿ (ಆದಾಯ ತೆರಿಗೆ ಇಲಾಖೆ) ಗೆ ಲಾಭ” ಎಂಬ ಟೀಕೆಯೊಂದಿಗೆ ಪೋಸ್ಟ್ ಕೊನೆಗೊಂಡಿದೆ.
ಕಾಮೆಂಟ್ ವಿಭಾಗದಲ್ಲಿ, ಎಕ್ಸ್ ಬಳಕೆದಾರರಾದ @Naliniskitchen ಅವರು ಈ ಮಾಹಿತಿಯನ್ನು ‘ಗ್ರೇಪ್ವೈನ್’ (ಅನಧಿಕೃತ ಮೂಲ) ನಿಂದ ಪಡೆಯಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ, ಸಾಮಾಜಿಕ ಜಾಲತಾಣ ಬಳಕೆದಾರರು ತಮ್ಮ ತೀವ್ರ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ:
”ಆರು ತಿಂಗಳ ಕಾಲ ಅನುಭವಿಸಿದ ಜೀವನಶೈಲಿಗೆ ಅರ್ಹರು ಎಂಬುದು ಯಾವ ರೀತಿಯ ಹಕ್ಕು? ಜೀವನಾಂಶವು ಆರ್ಥಿಕ ಬೆಂಬಲಕ್ಕಾಗಿ ಇರಬೇಕೇ ಹೊರತು ಜೀವನಶೈಲಿಯ ಬೆಂಬಲಕ್ಕಾಗಿ ಅಲ್ಲ. ಆರ್ಥಿಕ ಬೆಂಬಲವು ಯಾವಾಗ ಜೀವನಶೈಲಿಯ ಬೆಂಬಲವಾಯಿತು? ಒಂದು ವೇಳೆ ಯಾರಾದರೂ ತಮ್ಮ ಜೀವನಶೈಲಿಯನ್ನು ಕೆಳಮಟ್ಟಕ್ಕೆ ಇಳಿಸಿಕೊಂಡರೆ, ಇದು ಅವರಿಗೂ ಅನ್ವಯಿಸುತ್ತದೆಯೇ?” ಎಂದು ಒಬ್ಬ ಬಳಕೆದಾರರು ಪ್ರಶ್ನಿಸಿದ್ದಾರೆ.
”ನಾನು ಇಂತಹ ಮೂರ್ಖತನದ ತೀರ್ಪನ್ನು ನೋಡಿಲ್ಲ. ಪತಿಯು ಒಂದು ರೂಪಾಯಿಯನ್ನೂ ನೀಡಬಾರದು. ಇತ್ತೀಚಿನ ದಿನಗಳಲ್ಲಿ ವಿದ್ಯೆಯಿಲ್ಲದ ಮೂರ್ಖರು ನ್ಯಾಯಾಧೀಶರಾಗುತ್ತಿದ್ದಾರೆ. ಅಂತಹ ನ್ಯಾಯಮೂರ್ತಿಗಳಿಗೆ ನಾಚಿಕೆಯಾಗಲಿ!” ಎಂದು ಮತ್ತೊಬ್ಬರು ಟೀಕಿಸಿದ್ದಾರೆ.
ಮತ್ತೊಬ್ಬ ಬಳಕೆದಾರರು ಜೀವನಾಂಶದ ಮೊತ್ತದ ಹಿಂದಿನ ತರ್ಕವನ್ನು ಪ್ರಶ್ನಿಸಿ, “ಅವಳು ಈಗಾಗಲೇ ಸಂಪಾದಿಸುತ್ತಿರುವಾಗ, ಅರ್ಧ ಸಂಬಳವನ್ನು ಪಡೆಯುವುದರಲ್ಲಿ ಅರ್ಥವಿಲ್ಲ.. ಇದು ಅನ್ಯಾಯ” ಎಂದು ಬರೆದಿದ್ದಾರೆ.
