ಅಡುಗೆ ಅನಿಲ (LPG) ಸಿಲಿಂಡರ್ ವಿತರಣೆಯ ಸಮಯದಲ್ಲಿ ಡೆಲಿವರಿ ಬಾಯ್ಗಳು ನಿಗದಿತ ಮೊತ್ತಕ್ಕಿಂತ ಹೆಚ್ಚಿನ ಹಣವನ್ನು ‘ಸೇವಾ ಶುಲ್ಕ’ ಅಥವಾ ‘ಟಿಪ್ಸ್’ ಹೆಸರಿನಲ್ಲಿ ಕೇಳುವುದು ಸಾಮಾನ್ಯವಾಗಿದೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಗ್ಯಾಸ್ ಬಿಕ್ಕಟ್ಟಿನ ನೆಪವೊಡ್ಡಿ ಗ್ರಾಹಕರಿಂದ ಸುಲಿಗೆ ಮಾಡುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಒಂದು ವೇಳೆ ನಿಮ್ಮ ಬಳಿಯೂ ಯಾರಾದರೂ ರಸೀದಿಯಲ್ಲಿರುವ ಮೊತ್ತಕ್ಕಿಂತ ಒಂದು ರೂಪಾಯಿ ಹೆಚ್ಚು ಕೇಳಿದರೂ, ಅದು ಕಾನೂನುಬಾಹಿರ. ಇಂತಹ ಸಂದರ್ಭದಲ್ಲಿ ಗ್ರಾಹಕರು ಏನು ಮಾಡಬೇಕು? ದೂರು ನೀಡುವುದು ಹೇಗೆ? ಎಂಬ ಮಾಹಿತಿ ಇಲ್ಲಿದೆ.
ಹೆಚ್ಚುವರಿ ಹಣ ಕೇಳುವುದು ಕಾನೂನುಬಾಹಿರ
ಗ್ಯಾಸ್ ಏಜೆನ್ಸಿಗಳು ಸ್ಪಷ್ಟಪಡಿಸಿರುವಂತೆ, ಗ್ರಾಹಕರು ಕೇವಲ ಸಿಲಿಂಡರ್ ರೀಫಿಲ್ ರಸೀದಿಯಲ್ಲಿ ನಮೂದಿಸಲಾದ ಮೊತ್ತವನ್ನು ಮಾತ್ರ ಪಾವತಿಸಬೇಕು. ಈ ಮೊತ್ತದಲ್ಲಿ ಈಗಾಗಲೇ ವಿತರಣಾ ಶುಲ್ಕ (Delivery Charge) ಸೇರಿರುತ್ತದೆ. ಆದ್ದರಿಂದ ಡೆಲಿವರಿ ಬಾಯ್ಗೆ ಪ್ರತ್ಯೇಕವಾಗಿ ಯಾವುದೇ ಹಣ ನೀಡುವ ಅಗತ್ಯವಿಲ್ಲ.
ದೂರು ನೀಡಲು ಅಧಿಕೃತ ಸಹಾಯವಾಣಿ ಸಂಖ್ಯೆಗಳು:
ಒಂದು ವೇಳೆ ಡೆಲಿವರಿ ಬಾಯ್ ಹಣಕ್ಕಾಗಿ ಒತ್ತಾಯಿಸಿದರೆ, ಕೂಡಲೇ ಈ ಕೆಳಗಿನ ಟೋಲ್-ಫ್ರೀ ಸಂಖ್ಯೆಗಳಿಗೆ ಕರೆ ಮಾಡಿ ದೂರು ಸಲ್ಲಿಸಬಹುದು:
ಇಂಡೇನ್ ಗ್ಯಾಸ್ (Indane): 1800-2333-555 ಅಥವಾ 7718955555
ಎಚ್ಪಿ ಗ್ಯಾಸ್ (HP Gas): 1800-2333-555 ಅಥವಾ 9493602222
ಭಾರತ್ ಗ್ಯಾಸ್ (Bharat Gas): 1800-22-4344 ಅಥವಾ 7715012345
ಈ ಸಂಖ್ಯೆಗಳು ದಿನದ 24 ಗಂಟೆಯೂ ಲಭ್ಯವಿದ್ದು, ನಿಮ್ಮ ದೂರು ದಾಖಲಾದ ತಕ್ಷಣ ಏಜೆನ್ಸಿಯ ಮೇಲೆ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ.
ಆನ್ಲೈನ್ ಮೂಲಕ ದೂರು ಸಲ್ಲಿಸಿ:
ಡಿಜಿಟಲ್ ಮಾಧ್ಯಮದ ಮೂಲಕ ದೂರು ನೀಡುವುದು ಹೆಚ್ಚು ಪರಿಣಾಮಕಾರಿ. ಇಂಡೇನ್ ಗ್ರಾಹಕರು ‘IndianOil One’ ಆಪ್ ಮತ್ತು ಭಾರತ್ ಗ್ಯಾಸ್ ಗ್ರಾಹಕರು ‘Hello BPCL’ ಆಪ್ ಬಳಸಬಹುದು. ದೂರು ನೀಡುವಾಗ ಡೆಲಿವರಿ ಬಾಯ್ ಹೆಸರು ಮತ್ತು ಗ್ಯಾಸ್ ಏಜೆನ್ಸಿಯ ಕೋಡ್ ಅನ್ನು ನಮೂದಿಸುವುದು ಮರೆಯಬೇಡಿ.
ಕನ್ಸ್ಯೂಮರ್ ಫೋರಂ ಮೊರೆ ಹೋಗಿ:
ಗ್ಯಾಸ್ ಏಜೆನ್ಸಿಯು ನಿಮ್ಮ ದೂರನ್ನು ನಿರ್ಲಕ್ಷಿಸಿದರೆ, ನೀವು ‘ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ’ (1915) ಗೆ ಕರೆ ಮಾಡಬಹುದು. ಅಲ್ಲದೆ, ಸಾಮಾಜಿಕ ಜಾಲತಾಣಗಳಲ್ಲಿ ಪೆಟ್ರೋಲಿಯಂ ಸಚಿವಾಲಯವನ್ನು ಟ್ಯಾಗ್ ಮಾಡುವ ಮೂಲಕವೂ ನಿಮ್ಮ ಸಮಸ್ಯೆಯನ್ನು ಸರ್ಕಾರದ ಗಮನಕ್ಕೆ ತರಬಹುದು.
ಗಮನಿಸಿ: ಸುಮ್ಮನೆ ಹೆಚ್ಚುವರಿ ಹಣ ನೀಡುವುದು ಭ್ರಷ್ಟಾಚಾರಕ್ಕೆ ಪ್ರೋತ್ಸಾಹ ನೀಡಿದಂತೆ. ಜಾಗೃತ ಗ್ರಾಹಕರಾಗಿ, ರಸೀದಿಯನ್ನು ಪಡೆದುಕೊಳ್ಳಿ ಮತ್ತು ಸಾಧ್ಯವಾದಷ್ಟು ಡಿಜಿಟಲ್ ಪಾವತಿ ವಿಧಾನಗಳನ್ನು ಬಳಸಿ.
