ನವದೆಹಲಿ: ಭಾರತೀಯ ನಾಗರಿಕರು ವಿದೇಶಗಳಿಗೆ ಪ್ರಯಾಣಿಸುವಾಗ ಹೊಸದಾಗಿ ‘ವಿದೇಶ ಪ್ರಯಾಣ ತೆರಿಗೆ’ (Foreign Travel Tax) ವಿಧಿಸಲಾಗುತ್ತಿದೆ ಎಂಬ ವದಂತಿಗಳನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಬಲವಾಗಿ ತಳ್ಳಿಹಾಕಿದ್ದಾರೆ. ಈ ಸುದ್ದಿಯಲ್ಲಿ “ನಯಾಪೈಸೆ ಸತ್ಯಾಂಶವೂ ಇಲ್ಲ” (Not an iota of truth) ಎಂದು ಹೇಳುವ ಮೂಲಕ ಪ್ರಧಾನಿ, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದ ಎಲ್ಲಾ ಊಹಾಪೋಹಗಳಿಗೆ ತೆರೆ ಎಳೆದಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಸರ್ಕಾರವು ವಿದೇಶಿ ಪ್ರವಾಸ ಕೈಗೊಳ್ಳುವವರ ಮೇಲೆ ಹೆಚ್ಚುವರಿ ತೆರಿಗೆ ಹೇರಲು ಸಿದ್ಧತೆ ನಡೆಸುತ್ತಿದೆ ಎಂಬ ಸುದ್ದಿಗಳು ನಾಗರಿಕರಲ್ಲಿ ಭಾರಿ ಗೊಂದಲ ಮೂಡಿಸಿದ್ದವು. ಈ ಹಿನ್ನೆಲೆಯಲ್ಲಿ ಪ್ರಧಾನಿ ಮೋದಿ ಅವರೇ ನೇರವಾಗಿ ಈ ಕುರಿತು ಸ್ಪಷ್ಟನೆ ನೀಡಿದ್ದಾರೆ.
ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಈ ವದಂತಿಗಳ ಕುರಿತು ಉತ್ತರಿಸಿದ ಪ್ರಧಾನಿ ಮೋದಿ, “ಇದು ಸಾರ್ವಜನಿಕರಲ್ಲಿ ಅನಗತ್ಯ ಆತಂಕ ಸೃಷ್ಟಿಸಲು ಹರಿಬಿಟ್ಟಿರುವ ಸಂಪೂರ್ಣ ಸುಳ್ಳು ಸುದ್ದಿ. ನಾಗರಿಕರ ವಿದೇಶ ಪ್ರವಾಸದ ಮೇಲೆ ಹೊಸದಾಗಿ ಯಾವುದೇ ರೀತಿಯ ಹೆಚ್ಚುವರಿ ತೆರಿಗೆ ವಿಧಿಸುವ ಯೋಜನೆ ಸರ್ಕಾರದ ಮುಂದೆ ಇಲ್ಲ. ಇಂತಹ ವದಂತಿಗಳನ್ನು ಸಾರ್ವಜನಿಕರು ನಂಬಬಾರದು,” ಎಂದು ಕಡಖಂಡಿತವಾಗಿ ಹೇಳಿದ್ದಾರೆ.
ಮಧ್ಯಮ ವರ್ಗಕ್ಕೆ ನೆಮ್ಮದಿಯ ಸುದ್ದಿ
ಪ್ರವಾಸೋದ್ಯಮಕ್ಕೆ ಆತಂಕ ಇತ್ತು: ಉದ್ಯೋಗ, ಶಿಕ್ಷಣ ಮತ್ತು ಪ್ರವಾಸಕ್ಕಾಗಿ ವಿದೇಶಗಳಿಗೆ ತೆರಳುವ ಮಧ್ಯಮ ವರ್ಗದ ಜನರಿಗೆ ಈ ವದಂತಿಗಳು ಭಾರಿ ಆತಂಕ ಮೂಡಿಸಿದ್ದವು. ತೆರಿಗೆ ಹೆಚ್ಚಾದರೆ ವಿಮಾನ ಟಿಕೆಟ್ ಹಾಗೂ ಪ್ರವಾಸದ ವೆಚ್ಚ ದುಬಾರಿಯಾಗಬಹುದು ಎಂಬ ಭೀತಿ ಇತ್ತು.
ಪ್ರಧಾನಿ ಅವರ ಅಧಿಕೃತ ಸ್ಪಷ್ಟನೆಯಿಂದಾಗಿ ಸದ್ಯ ಪ್ರವಾಸೋದ್ಯಮ ವಲಯ, ಉದ್ಯಮಿಗಳು ಹಾಗೂ ವಿದೇಶಕ್ಕೆ ಹಾರಲು ಸಿದ್ಧತೆ ನಡೆಸುತ್ತಿದ್ದ ಸಾಮಾನ್ಯ ನಾಗರಿಕರು ನಿಟ್ಟುಸಿರು ಬಿಡುವಂತಾಗಿದೆ.
