​’ಭಾರತದ ಪರಮಾಣು ಪಯಣದ ಐತಿಹಾಸಿಕ ಘಟ್ಟ’: ಕಲ್ಪಾಕ್ಕಂ ರಿಯಾಕ್ಟರ್ ಸಾಧನೆಗೆ ಪ್ರಧಾನಿ ಮೋದಿ ಶ್ಲಾಘನೆ!

ನವದೆಹಲಿ: ತಮಿಳುನಾಡಿನ ಕಲ್ಪಾಕ್ಕಂನಲ್ಲಿರುವ ದೇಶದ ಮೊದಲ ಸ್ವದೇಶಿ ನಿರ್ಮಿತ ‘ಪ್ರೊಟೊಟೈಪ್ ಫಾಸ್ಟ್ ಬ್ರೀಡರ್ ರಿಯಾಕ್ಟರ್’ (PFBR) ಯಶಸ್ವಿಯಾಗಿ ‘ಕ್ರಿಟಿಕಾಲಿಟಿ’ (ಸ್ಥಿರ ಪರಮಾಣು ಸರಣಿ ಕ್ರಿಯೆ) ತಲುಪಿರುವುದನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಇದನ್ನು ಭಾರತದ ಇಂಧನ ಸ್ವಾವಲಂಬನೆಯ ಹಾದಿಯಲ್ಲಿನ ಒಂದು “ನಿರ್ಣಾಯಕ ಮತ್ತು ಐತಿಹಾಸಿಕ ಹೆಜ್ಜೆ” ಎಂದು ಅವರು ಬಣ್ಣಿಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಹಂಚಿಕೊಂಡಿರುವ ಪ್ರಧಾನಿ, “ನಮ್ಮ ಪರಮಾಣು ವಿಜ್ಞಾನಿಗಳ ಕಠಿಣ ಪರಿಶ್ರಮಕ್ಕೆ ಸಂದ ಜಯವಿದು. ಕಲ್ಪಾಕ್ಕಂನ ಈ ಸಾಧನೆಯು 21ನೇ ಶತಮಾನದ ಭಾರತದ ತಾಂತ್ರಿಕ ಶಕ್ತಿಯನ್ನು ಜಗತ್ತಿಗೆ ಸಾರಿದೆ,” ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.

ಈ ರಿಯಾಕ್ಟರ್ ಪರಮಾಣು ಇಂಧನವನ್ನು ಬಳಸುವ ಜೊತೆಗೆ ಹೊಸ ಇಂಧನವನ್ನೂ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಇದು ಭಾರತದ ಮೂರು ಹಂತದ ಪರಮಾಣು ಕಾರ್ಯಕ್ರಮದ ಎರಡನೇ ಹಂತದ ಯಶಸ್ವಿ ಆರಂಭವನ್ನು ಸೂಚಿಸುತ್ತದೆ.

 ಈ ತಂತ್ರಜ್ಞಾನದ ಯಶಸ್ಸಿನಿಂದಾಗಿ ಭವಿಷ್ಯದಲ್ಲಿ ಭಾರತವು ತನ್ನಲ್ಲಿ ಹೇರಳವಾಗಿರುವ ‘ಥೋರಿಯಂ’ ನಿಕ್ಷೇಪವನ್ನು ಬಳಸಿ ಸಾವಿರಾರು ವರ್ಷಗಳ ಕಾಲ ಶುದ್ಧ ಮತ್ತು ಅಗ್ಗದ ವಿದ್ಯುತ್ ಪಡೆಯುವ ಕನಸು ನನಸಾಗುವತ್ತ ದಾಪುಗಾಲು ಇಟ್ಟಿದೆ.

ಈ ರಿಯಾಕ್ಟರ್ ಅನ್ನು ಸಂಪೂರ್ಣವಾಗಿ ಭಾರತದಲ್ಲೇ ವಿನ್ಯಾಸಗೊಳಿಸಿ ನಿರ್ಮಿಸಲಾಗಿದ್ದು, 200ಕ್ಕೂ ಹೆಚ್ಚು ದೇಶೀಯ ಕೈಗಾರಿಕೆಗಳು ಈ ಯೋಜನೆಯಲ್ಲಿ ಭಾಗಿಯಾಗಿವೆ. ಇದು ‘ಮೇಕ್ ಇನ್ ಇಂಡಿಯಾ’ ಅಭಿಯಾನಕ್ಕೆ ಸಂದ ದೊಡ್ಡ ಗೌರವವಾಗಿದೆ.