ದುಬೈ: ಗಲ್ಫ್ ರಾಷ್ಟ್ರಗಳಲ್ಲಿ ಹೆಚ್ಚುತ್ತಿರುವ ರಾಜತಾಂತ್ರಿಕ ಸಂಘರ್ಷಗಳ ನಡುವೆಯೇ, ಇರಾನ್ ತನ್ನ ನಿಯಂತ್ರಣದಲ್ಲಿರುವ ‘ಹಾರ್ಮುಜ್ ಜಲಸಂಧಿ’ಯ (Strait of Hormuz) ಮೂಲಕ ಇಂಧನ ಸಾಗಾಟಕ್ಕೆ ಅನುವು ಮಾಡಿಕೊಡಲು ಪಾಕಿಸ್ತಾನ ಮತ್ತು ಇರಾಕ್ ದೇಶಗಳೊಂದಿಗೆ ಪ್ರತ್ಯೇಕ ಒಪ್ಪಂದ ಮಾಡಿಕೊಂಡಿದೆ. ಈ ಬೆಳವಣಿಗೆಯು ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಇರಾನ್ನ ಪ್ರಾಬಲ್ಯವನ್ನು ಮತ್ತಷ್ಟು ಹೆಚ್ಚಿಸಿದೆ.
ವಿಶ್ವದ ಅತಿ ದೊಡ್ಡ ತೈಲ ಸಾರಿಗೆ ಮಾರ್ಗವಾಗಿರುವ ಹಾರ್ಮುಜ್ ಜಲಸಂಧಿಯನ್ನು ಇರಾನ್ ನಿಯಂತ್ರಿಸುತ್ತಿದೆ. ಈಗ ಮಾಡಿಕೊಂಡಿರುವ ಒಪ್ಪಂದದ ಪ್ರಕಾರ, ಇರಾಕ್ನ ಕಚ್ಚಾ ತೈಲ ಮತ್ತು ಪಾಕಿಸ್ತಾನಕ್ಕೆ ಪೂರೈಕೆಯಾಗುವ ಎಲ್ಎನ್ಜಿ (LNG) ಅನಿಲದ ಹಡಗುಗಳಿಗೆ ಇರಾನ್ ಸುರಕ್ಷಿತ ಹಾದಿಯನ್ನು ಕಲ್ಪಿಸಲಿದೆ.
ಈ ಹಿಂದೆ ಜಲಸಂಧಿಯನ್ನು ಸಂಪೂರ್ಣವಾಗಿ ಬಂದ್ ಮಾಡುವುದಾಗಿ ಎಚ್ಚರಿಸಿದ್ದ ಇರಾನ್, ಈಗ ತನ್ನ ಧೋರಣೆ ಬದಲಿಸಿದೆ. ಯಾರಿಗೆ ಪ್ರವೇಶ ನೀಡಬೇಕು ಮತ್ತು ಯಾರನ್ನು ತಡೆಯಬೇಕು ಎಂಬ ‘ನಿಯಂತ್ರಿತ ಪ್ರವೇಶ’ (Controlled Access) ವ್ಯವಸ್ಥೆಯನ್ನು ಜಾರಿಗೆ ತಂದಿದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಇರಾಕ್ನ ಬಜೆಟ್ನ ಶೇ. 95ರಷ್ಟು ಆದಾಯ ತೈಲದಿಂದಲೇ ಬರುತ್ತದೆ. ಹಾಗೆಯೇ ಪಾಕಿಸ್ತಾನವು ತನ್ನ ವಿದ್ಯುತ್ ಉತ್ಪಾದನೆಗೆ ಗಲ್ಫ್ ರಾಷ್ಟ್ರಗಳ ಅನಿಲವನ್ನು ಅವಲಂಬಿಸಿದೆ. ಈ ಇಂಧನ ಭದ್ರತೆಗಾಗಿ ಎರಡೂ ರಾಷ್ಟ್ರಗಳು ಇರಾನ್ನೊಂದಿಗೆ ಮಾತುಕತೆ ನಡೆಸಿ ಈ ಒಪ್ಪಂದಕ್ಕೆ ಬಂದಿವೆ.
