ಬೆಂಗಳೂರು : ಐಪಿಎಲ್ ಪಂದ್ಯದ ವೇಳೆ ಆಸ್ಟ್ರೇಲಿಯಾದ ಆಟಗಾರ ಟ್ರಾವಿಸ್ ಹೆಡ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ನಡುವೆ ಮೈದಾನದಲ್ಲಿ ನಡೆದ ಮಾತಿನ ಚಕಮಕಿ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಮಟ್ಟದ ವಿವಾದಕ್ಕೆ ಕಾರಣವಾಗಿದೆ. ಪಂದ್ಯದ ಬಳಿಕ ವಿರಾಟ್ ಕೊಹ್ಲಿ ಅಭಿಮಾನಿಗಳು ಟ್ರಾವಿಸ್ ಹೆಡ್ ಹಾಗೂ ಅವರ ಪತ್ನಿ ಜೆಸ್ಸಿಕಾ ಅವರನ್ನು ಟಾರ್ಗೆಟ್ ಮಾಡಿ ತೀವ್ರವಾಗಿ ನಿಂದಿಸುತ್ತಿದ್ದಾರೆ.
ಸನ್ ರೈಸರ್ಸ್ ಹೈದರಾಬಾದ್ (SRH) ಮತ್ತು ಆರ್ಸಿಬಿ ನಡುವಿನ ಪಂದ್ಯದ ವೇಳೆ ಕೊಹ್ಲಿ ಮತ್ತು ಹೆಡ್ ನಡುವೆ ತೀವ್ರ ಮಾತಿನ ಚಕಮಕಿ ನಡೆದಿತ್ತು. ಕೊಹ್ಲಿ ಬ್ಯಾಟಿಂಗ್ ಮಾಡುವಾಗ ಹೆಡ್ ಜೊತೆ ಆಕ್ರೋಶದಿಂದ ಮಾತನಾಡಿದ್ದರು. ಅಂತಿಮವಾಗಿ ಈ ಪಂದ್ಯವನ್ನು ಎಸ್ಆರ್ಹೆಚ್ ಜಯಿಸಿತು. ಪಂದ್ಯ ಮುಗಿದ ನಂತರ ಟ್ರಾವಿಸ್ ಹೆಡ್ ಅವರು ಕೊಹ್ಲಿ ಕಡೆಗೆ ಹಸ್ತಲಾಘವ (Handshake) ಮಾಡಲು ಕೈ ಚಾಚಿದರೂ, ಕೊಹ್ಲಿ ಅದನ್ನು ನಿರ್ಲಕ್ಷಿಸಿ ಮುಂದೆ ಸಾಗಿದ್ದರು ಎನ್ನಲಾಗಿದೆ.
“ನನ್ನ ಕುಟುಂಬದವರನ್ನು ಬಿಡುತ್ತಿಲ್ಲ” – ಜೆಸ್ಸಿಕಾ ಅಳಲು
ಈ ಘಟನೆಯ ನಂತರ ಕೊಹ್ಲಿ ಅಭಿಮಾನಿಗಳು ಟ್ರಾವಿಸ್ ಹೆಡ್ ಅವರ ಇನ್ಸ್ಟಾಗ್ರಾಮ್ ಹಾಗೂ ಅವರ ಪತ್ನಿ ಜೆಸ್ಸಿಕಾ ಅವರ ಖಾತೆಗಳ ಮೇಲೆ ಮುಗಿಬಿದ್ದಿದ್ದಾರೆ. ಈ ಬಗ್ಗೆ ಆಸ್ಟ್ರೇಲಿಯಾದ ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯಿಸಿರುವ ಜೆಸ್ಸಿಕಾ ಹೆಡ್, ತಮ್ಮ ನೋವನ್ನು ಹಂಚಿಕೊಂಡಿದ್ದಾರೆ.
“ನಾನು ಬೆಳಗ್ಗೆ ಎದ್ದು ಸೋಶಿಯಲ್ ಮೀಡಿಯಾ ನೋಡಿದಾಗ ಕಮೆಂಟ್ಗಳ ಸುರಿಮಳೆಯೇ ಆಗಿತ್ತು. ನಾವು ಚೆನ್ನಾಗಿದ್ದೇವೆ, ಆದರೆ ಕಿಡಿಗೇಡಿಗಳು ಈಗ ನನ್ನ ಸ್ನೇಹಿತರು ಮತ್ತು ಕುಟುಂಬದವರನ್ನೂ ಬಿಡದೆ ಅವರ ಮೇಲೂ ಸಾಮಾಜಿಕ ಜಾಲತಾಣಗಳಲ್ಲಿ ದಾಳಿ ಮಾಡುತ್ತಿದ್ದಾರೆ,” ಎಂದು ಜೆಸ್ಸಿಕಾ ಬೇಸರ ವ್ಯಕ್ತಪಡಿಸಿದ್ದಾರೆ.
ಕ್ರೀಡೆ ಮತ್ತು ಮಾನಸಿಕ ಆರೋಗ್ಯದ ಬಗ್ಗೆ ಕಿವಿಮಾತು
ಕ್ರೀಡಾಭಿಮಾನದ ಹೆಸರಿನಲ್ಲಿ ನಡೆಯುತ್ತಿರುವ ಈ ನಿಂದನೆಗಳ ಬಗ್ಗೆ ಮಾತನಾಡಿದ ಅವರು, “ಪ್ರಸ್ತುತ ಎಲ್ಲಾ ಕ್ರೀಡೆಗಳಲ್ಲೂ ಮಾನಸಿಕ ಆರೋಗ್ಯ, ಪರಸ್ಪರ ಗೌರವ ಮತ್ತು ನಾವು ಇತರರೊಂದಿಗೆ ಮಾತನಾಡುವ ವಿಧಾನದ ಬಗ್ಗೆ ಗಂಭೀರ ಚರ್ಚೆಯ ಅಗತ್ಯವಿದೆ ಎಂದು ನಾನು ಭಾವಿಸುತ್ತೇನೆ. ಕ್ರೀಡೆಯಲ್ಲಿ ಆವೇಗ, ಜಿದ್ದಾಜಿದ್ದಿ ಇರುವುದು ಸಹಜ. ಆದರೆ ಆಟದ ಹಿಂದೆ ನಿಜವಾದ ಮನುಷ್ಯರು ಮತ್ತು ಅವರ ಕುಟುಂಬಗಳು ಇರುತ್ತವೆ ಎಂಬುದನ್ನು ಎಲ್ಲರೂ ನೆನಪಿನಲ್ಲಿಡಬೇಕು,” ಎಂದು ಜೆಸ್ಸಿಕಾ ಕಿವಿಮಾತು ಹೇಳಿದ್ದಾರೆ.
ಇದು ಮೊದಲ ಬಾರಿಯೇನಲ್ಲ!
ಟ್ರಾವಿಸ್ ಹೆಡ್ ಮತ್ತು ಜೆಸ್ಸಿಕಾ ಅವರಿಗೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಂದ ಈ ರೀತಿಯ ನಿಂದನೆ ಎದುರಾಗುತ್ತಿರುವುದು ಇದೇ ಮೊದಲಲ್ಲ.
2023ರ ವಿಶ್ವಕಪ್ ಫೈನಲ್: 2023ರ ಏಕದಿನ ವಿಶ್ವಕಪ್ ಫೈನಲ್ನಲ್ಲಿ ಟ್ರಾವಿಸ್ ಹೆಡ್ ಭರ್ಜರಿ ಶತಕ ಬಾರಿಸಿ ಭಾರತದ ವಿಶ್ವಕಪ್ ಕನಸನ್ನು ಭಂಗಗೊಳಿಸಿದ್ದರು. ಅಹಮದಾಬಾದ್ ಕ್ರೀಡಾಂಗಣದಲ್ಲಿ ಭಾರತ ಸೋತ ಬಳಿಕವೂ ಹೆಡ್ ದಂಪತಿಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರವಾಗಿ ನಿಂದಿಸಲಾಗಿತ್ತು.
“ವಿಶ್ವಕಪ್ ಮುಗಿದ ನಂತರ ನಡೆದ ನಿಂದನೆಯ ಘಟನೆಗಳು ಈಗ ಮತ್ತೆ ಮರುಕಳಿಸಿದಂತೆ ಭಾಸವಾಗುತ್ತಿದೆ,” ಎಂದು ಜೆಸ್ಸಿಕಾ ಬೇಸರದಿಂದ ಹೇಳಿದ್ದಾರೆ.
ಮೈದಾನದ ಜಿದ್ದಾಜಿದ್ದನ್ನು ಮೈದಾನಕ್ಕಷ್ಟೇ ಸೀಮಿತಗೊಳಿಸದೆ, ಆಟಗಾರರ ಕುಟುಂಬದವರನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಎಳೆಯುತ್ತಿರುವುದಕ್ಕೆ ಕ್ರೀಡಾ ವಲಯದಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ.
🚨 Travis Head's wife exposed Virat Kohli fans:
It feels like a repeat of the abuse that happened after the World Cup. I woke up to my social media blowing up. We are fine, but people are attacking my friends and family.
I think that, across all sports at the moment, there’s an… pic.twitter.com/zMXVoV8hsb
— Indian Cricket Ministry (@ICM_News45) May 25, 2026
