ಜೆರುಸಲೆಮ್: ಇಸ್ರೇಲ್ ರಕ್ಷಣಾ ಪಡೆ (IDF) ಗಾಜಾದ ಉತ್ತರ ಭಾಗದಲ್ಲಿ ಹಮಾಸ್ನ ಇಬ್ಬರು “ಉನ್ನತ” ಕಾರ್ಯಾಚರಣೆದಾರರ ಮೇಲೆ ದಾಳಿ ನಡೆಸಿದೆ ಎಂದು ತಿಳಿಸಿದ್ದು, ಈ ಕುರಿತ ಹೆಚ್ಚಿನ ವಿವರಗಳನ್ನು ಶೀಘ್ರವೇ ಹಂಚಿಕೊಳ್ಳುವುದಾಗಿ ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ.
ಏತನ್ಮಧ್ಯೆ, ಪ್ಯಾಲೇಸ್ಟಿನಿಯನ್ ರೆಡ್ ಕ್ರೆಸೆಂಟ್ ಸೊಸೈಟಿಯನ್ನು ಉಲ್ಲೇಖಿಸಿ ಅಲ್ ಜಜೀರಾ ವರದಿ ಮಾಡಿರುವಂತೆ, ಮಧ್ಯ ಗಾಜಾ ನಗರದ ವಸತಿ ಗೃಹವೊಂದರ ಮೇಲೆ ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಕನಿಷ್ಠ ನಾಲ್ವರು ಪ್ಯಾಲೇಸ್ಟಿನಿಯನ್ನರು ಮೃತಪಟ್ಟಿದ್ದಾರೆ ಮತ್ತು 15 ಮಂದಿ ಗಾಯಗೊಂಡಿದ್ದಾರೆ.
ಈ ಬೆಳವಣಿಗೆಯು, ಅಕ್ಟೋಬರ್ 7ರ ಹತ್ಯಾಕಾಂಡದ ರೂವಾರಿಗಳಲ್ಲಿ ಒಬ್ಬರಾದ ಮತ್ತು ಹಮಾಸ್ ಉಗ್ರ ಸಂಘಟನೆಯ ಮಿಲಿಟರಿ ವಿಭಾಗದ ಹೊಸ ನಾಯಕರಾಗಿದ್ದ ಮುಹಮ್ಮದ್ ಒದೇಹ್ ಅವರನ್ನು ಇಸ್ರೇಲ್ ವಾಯುಪಡೆ ಹತ್ಯೆ ಮಾಡಿದ ಬೆನ್ನಲ್ಲೇ ನಡೆದಿದೆ.
”ಈ ಕಾರ್ಯಾಚರಣೆಯನ್ನು ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ರಕ್ಷಣಾ ಸಚಿವ ಇಸ್ರೇಲ್ ಕಾಟ್ಜ್ ಅವರ ಸೂಚನೆಯ ಮೇರೆಗೆ ನಡೆಸಲಾಗಿದೆ” ಎಂದು ಇಸ್ರೇಲ್ ಪ್ರಧಾನಿ ಕಚೇರಿ (PMO) ‘ಎಕ್ಸ್’ (X) ನಲ್ಲಿ ಪೋಸ್ಟ್ ಮಾಡಿದೆ.
ಒದೇಹ್ ಅಕ್ಟೋಬರ್ 7ರ ಹತ್ಯಾಕಾಂಡದ ಸಂದರ್ಭದಲ್ಲಿ ಹಮಾಸ್ನ ಗುಪ್ತಚರ ವಿಭಾಗದ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸಿದ್ದರು. ಎರಡು ವಾರಗಳ ಹಿಂದೆ ಐಡಿಎಫ್ ನಡೆಸಿದ ದಾಳಿಯಲ್ಲಿ ಹತ್ಯೆಯಾದ ಇಜ್ ಅಲ್-ದಿನ್ ಅಲ್-ಹಡ್ಡಾದ್ ಅವರ ಸ್ಥಾನಕ್ಕೆ ಇವರನ್ನು ಸುಮಾರು ಒಂದು ವಾರದ ಹಿಂದೆಯಷ್ಟೇ ನೇಮಕ ಮಾಡಲಾಗಿತ್ತು. ಒದೇಹ್ ಅವರು ಅನೇಕ ಇಸ್ರೇಲಿ ನಾಗರಿಕರು ಮತ್ತು ಐಡಿಎಫ್ ಸೈನಿಕರ ಹತ್ಯೆ, ಅಪಹರಣ ಮತ್ತು ಗಾಯಗಳಿಗೆ ಕಾರಣರಾಗಿದ್ದರು.
ಬೆಂಜಮಿನ್ ನೆತನ್ಯಾಹು ಕೂಡ ಈ ವಿಷಯವನ್ನು ‘ಎಕ್ಸ್’ ನಲ್ಲಿ ದೃಢಪಡಿಸಿದ್ದು, ಅಕ್ಟೋಬರ್ 7, 2023ರ ಹತ್ಯಾಕಾಂಡದಲ್ಲಿ ಭಾಗಿಯಾದ ಪ್ರತಿಯೊಬ್ಬರನ್ನು ನಿರ್ಮೂಲನೆ ಮಾಡುವುದಾಗಿ ಪ್ರತಿಜ್ಞೆ ಮಾಡಿದ್ದಾರೆ.
”ನಾವು ಇದೀಗ ಹಮಾಸ್ನ ಮಿಲಿಟರಿ ವಿಭಾಗದ ನಾಯಕ ಮತ್ತು ಅಕ್ಟೋಬರ್ 7ರ ಹತ್ಯಾಕಾಂಡದ ರೂವಾರಿಗಳಲ್ಲಿ ಒಬ್ಬರಾದ ಮುಹಮ್ಮದ್ ಒದೇಹ್ ಅವರನ್ನು ಹೊಡೆದುರುಳಿಸಿದ್ದೇವೆ. ನಾವು ಅವರೆಲ್ಲರನ್ನು ತಲುಪುತ್ತೇವೆ (ಹತ್ಯೆ ಮಾಡುತ್ತೇವೆ)” ಎಂದು ಅವರು ಹೇಳಿದ್ದಾರೆ.
ಇದೇ ವೇಳೆ, ಇಸ್ರೇಲ್ ಸೇನೆಯು ಲೆಬನಾನ್ನಲ್ಲಿ ಹಿಜ್ಬುಲ್ಲಾ ಬಳಸುತ್ತಿದ್ದ ಮಿಲಿಟರಿ ರಚನೆಗಳು, ಕಮಾಂಡ್ ಸೆಂಟರ್ಗಳು ಮತ್ತು ಲಾಂಚ್ ಸೈಟ್ಗಳ ಮೇಲೆ ದಾಳಿ ನಡೆಸಿರುವುದಾಗಿ ತಿಳಿಸಿದೆ. ವಾರದ ಆರಂಭದಿಂದಲೂ ಇಸ್ರೇಲಿ ಪಡೆಗಳು ಹಿಜ್ಬುಲ್ಲಾದ 550 ಗುರಿಗಳ ಮೇಲೆ ದಾಳಿ ನಡೆಸಿವೆ ಎಂದು ಸೇನೆ ಸೇರ್ಪಡೆಗೊಳಿಸಿದೆ.
