ನವದೆಹಲಿ: ವಿಶ್ವದಾದ್ಯಂತ ಭಾರಿ ಸದ್ದು ಮಾಡುತ್ತಿರುವ ‘GLP-1’ (ಸೆಮಗ್ಲುಟೈಡ್ನಂತಹ) ತೂಕ ಇಳಿಸುವ ಔಷಧಗಳ ಅನಧಿಕೃತ ಮಾರಾಟ ಮತ್ತು ದುರುಪಯೋಗದ ವಿರುದ್ಧ ಕೇಂದ್ರ ಸರ್ಕಾರವು ಈಗ ಯುದ್ಧ ಸಾರಿದೆ. ದೇಶದ ವಿವಿಧ ಭಾಗಗಳಲ್ಲಿರುವ ಆನ್ಲೈನ್ ಫಾರ್ಮಸಿಗಳು, ಸಗಟು ಮಾರಾಟಗಾರರು ಮತ್ತು ವೆಲ್ನೆಸ್ ಕ್ಲಿನಿಕ್ಗಳ ಮೇಲೆ ಔಷಧ ನಿಯಂತ್ರಣ ಮಂಡಳಿಯು (CDSCO) ಏಕಕಾಲಕ್ಕೆ ದಾಳಿ ನಡೆಸಿ, ಕಠಿಣ ಎಚ್ಚರಿಕೆ ನೀಡಿದೆ.
ಈ ಔಷಧಗಳನ್ನು ವೈದ್ಯರ ಸಲಹೆಯಿಲ್ಲದೆ ಬಳಸುವುದರಿಂದ ಗಂಭೀರ ಆರೋಗ್ಯ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಇರುವುದರಿಂದ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ.
ಡ್ರಗ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ (DCGI) ನೇತೃತ್ವದಲ್ಲಿ ದೇಶಾದ್ಯಂತ 49ಕ್ಕೂ ಹೆಚ್ಚು ಸ್ಥಳಗಳಲ್ಲಿ ತಪಾಸಣೆ ನಡೆಸಲಾಗಿದೆ. ಅಕ್ರಮವಾಗಿ ಈ ಔಷಧಗಳನ್ನು ಸಂಗ್ರಹಿಸಿಟ್ಟಿದ್ದ ಮತ್ತು ಕೆವೈಸಿ ಇಲ್ಲದೆ ಮಾರಾಟ ಮಾಡುತ್ತಿದ್ದ ಸಂಸ್ಥೆಗಳಿಗೆ ನೋಟಿಸ್ ಜಾರಿ ಮಾಡಲಾಗಿದೆ.
ಔಷಧ ಕಂಪನಿಗಳು ಸೆಲೆಬ್ರಿಟಿಗಳು ಅಥವಾ ಇನ್ಫ್ಲುಯೆನ್ಸರ್ ಮೂಲಕ ಪರೋಕ್ಷವಾಗಿ ತೂಕ ಇಳಿಸುವ ಮಾತ್ರೆಗಳ ಪ್ರಚಾರ ಮಾಡುವುದನ್ನು ಸರ್ಕಾರ ಕಟ್ಟುನಿಟ್ಟಾಗಿ ನಿಷೇಧಿಸಿದೆ. ಇಂತಹ ಜಾಹೀರಾತುಗಳು ಜನರನ್ನು ದಾರಿತಪ್ಪಿಸುತ್ತವೆ ಎಂದು ಸರ್ಕಾರ ಅಭಿಪ್ರಾಯಪಟ್ಟಿದೆ.
ಜೆನೆರಿಕ್ ಔಷಧಗಳ ಅಬ್ಬರ: ಇತ್ತೀಚೆಗಷ್ಟೇ ಈ ಔಷಧಗಳ ಪೇಟೆಂಟ್ ಅವಧಿ ಮುಗಿದಿರುವುದರಿಂದ ಮಾರುಕಟ್ಟೆಗೆ ಅಗ್ಗದ ದರದ ಜೆನೆರಿಕ್ ಆವೃತ್ತಿಗಳು ಲಗ್ಗೆ ಇಟ್ಟಿವೆ. ಇದು ದುರುಪಯೋಗಕ್ಕೆ ಹೆಚ್ಚಿನ ಅವಕಾಶ ನೀಡುತ್ತಿದೆ ಎಂಬ ಆತಂಕ ತಜ್ಞರಲ್ಲಿದೆ.
ನಿಯಮ ಉಲ್ಲಂಘಿಸುವ ಫಾರ್ಮಸಿಗಳ ಪರವಾನಗಿ ರದ್ದುಪಡಿಸುವುದು ಮಾತ್ರವಲ್ಲದೆ, ದಂಡ ಮತ್ತು ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಎಚ್ಚರಿಸಿದೆ.
