ಬೆಂಗಳೂರು: ಬದಲಾಗುತ್ತಿರುವ ಕಾಲಘಟ್ಟದಲ್ಲಿ ಆರೋಗ್ಯ ಕ್ಷೇತ್ರವೂ ಡಿಜಿಟಲೀಕರಣಗೊಳ್ಳುತ್ತಿದೆ. ಪ್ರಾಣಾಂತಿಕ ಕಾಯಿಲೆಗಳಲ್ಲಿ ಒಂದಾದ ಏಡ್ಸ್ (AIDS) ಬಗ್ಗೆ ಜನರಲ್ಲಿರುವ ಭಯ, ಹಿಂಜರಿಕೆ ಮತ್ತು ಸಾಮಾಜಿಕ ಮುಜುಗರವನ್ನು ಹೋಗಲಾಡಿಸಲು ಕೇಂದ್ರ ಸರ್ಕಾರ ಈಗ ತಂತ್ರಜ್ಞಾನದ ಮೊರೆ ಹೋಗಿದೆ. ಅದರ ಫಲವೇ ‘ಮಿಷನ್ ಏಡ್ಸ್ ಸುರಕ್ಷಾ’ (MAS) ಅಭಿಯಾನ.
ಈ ಯೋಜನೆಯಡಿ ಪರಿಚಯಿಸಲಾಗಿರುವ ‘ಕ್ಯೂಆರ್ ಕೋಡ್’ (QR Code) ವ್ಯವಸ್ಥೆಯು ಎಚ್ಐವಿ ಶಂಕೆ ಇರುವವರಿಗೆ ಒಂದು ವರದಾನವಾಗಿ ಪರಿಣಮಿಸಿದೆ.
ಏನಿದು ಮಿಷನ್ ಏಡ್ಸ್ ಸುರಕ್ಷಾ ಕ್ಯೂಆರ್ ಕೋಡ್?
ಸಾಮಾನ್ಯವಾಗಿ ಅಸುರಕ್ಷಿತ ಲೈಂಗಿಕ ಸಂಪರ್ಕ ಅಥವಾ ಎಚ್ಐವಿ ಪೀಡಿತರೊಂದಿಗೆ ನಿಕಟ ಸಂಪರ್ಕ ಹೊಂದಿರುವವರು ಪರೀಕ್ಷೆಗೆ ಒಳಗಾಗಲು ಐಸಿಟಿಸಿ (ICTC) ಕೇಂದ್ರಗಳಿಗೆ ಹೋಗಲು ಹಿಂದೇಟು ಹಾಕುತ್ತಾರೆ. ಇಂತಹವರ ನೆರವಿಗಾಗಿ ಜಿಲ್ಲಾ ಆರೋಗ್ಯ ಇಲಾಖೆಯು ಸಾರ್ವಜನಿಕ ಸ್ಥಳಗಳಲ್ಲಿ ಕ್ಯೂಆರ್ ಕೋಡ್ಗಳನ್ನು ಅಳವಡಿಸುತ್ತಿದೆ.
ವಿಶೇಷತೆಗಳೇನು?
-
ಗೋಪ್ಯತೆ: ಈ ಪದ್ಧತಿಯಲ್ಲಿ ನಿಮ್ಮ ಹೆಸರು ಅಥವಾ ವಿಳಾಸವನ್ನು ನೀಡುವ ಅಗತ್ಯವಿಲ್ಲ. ನೀವು ನೀಡುವ ಮಾಹಿತಿ ಸಂಪೂರ್ಣವಾಗಿ ಸುರಕ್ಷಿತವಾಗಿರುತ್ತದೆ.
-
ಸ್ವಯಂ ಮೌಲ್ಯಮಾಪನ: ಕೋಡ್ ಸ್ಕ್ಯಾನ್ ಮಾಡಿದಾಗ ತೆರೆದುಕೊಳ್ಳುವ ಪ್ರಶ್ನಾವಳಿಗಳಿಗೆ (ವಯಸ್ಸು, ರೋಗ ಲಕ್ಷಣಗಳು, ಜೀವನಶೈಲಿ ಇತ್ಯಾದಿ) ‘ಹೌದು’ ಅಥವಾ ‘ಇಲ್ಲ’ ಎಂದು ಉತ್ತರಿಸುವ ಮೂಲಕ ನಿಮ್ಮ ಅಪಾಯದ ಮಟ್ಟವನ್ನು (Risk Level) ನೀವೇ ಅರಿಯಬಹುದು.
-
ಸಲಹೆ ಮತ್ತು ಮಾರ್ಗದರ್ಶನ: ಮೌಲ್ಯಮಾಪನದ ನಂತರ ನಿಮಗೆ ಚಿಕಿತ್ಸೆಯ ಅಗತ್ಯವಿದೆಯೇ ಅಥವಾ ಇಲ್ಲವೇ ಎಂಬುದರ ಬಗ್ಗೆ ತಜ್ಞರ ಸಲಹೆ ಮತ್ತು ಹತ್ತಿರದ ಚಿಕಿತ್ಸಾ ಕೇಂದ್ರಗಳ ಮಾಹಿತಿ ಲಭ್ಯವಾಗುತ್ತದೆ.
ಮಾಹಿತಿ ಪಡೆಯುವುದು ಹೇಗೆ?
ಬಸ್ ನಿಲ್ದಾಣಗಳು, ಶಾಲಾ-ಕಾಲೇಜುಗಳು ಮತ್ತು ಜನನಿಬಿಡ ಪ್ರದೇಶಗಳಲ್ಲಿ ಅಂಟಿಸಲಾದ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಬಹುದು. ಅಥವಾ ನೇರವಾಗಿ ಗೂಗಲ್ನಲ್ಲಿ www.breakfreeindia.org ವೆಬ್ಸೈಟ್ಗೆ ಭೇಟಿ ನೀಡುವ ಮೂಲಕವೂ ಮಾಹಿತಿ ಪಡೆಯಬಹುದು. ಇಲ್ಲಿ ‘ನೋ ಯುವರ್ ಹೆಚ್ಐವಿ ಸ್ಟೇಟಸ್’ (Know your HIV status) ಆಯ್ಕೆಯಡಿ ಉಚಿತ ಸಮಾಲೋಚನೆ ಪಡೆಯಲು ಅವಕಾಶವಿದೆ.
ಅಭಿಯಾನದ ಗುರಿ – 2026
ಮಿಷನ್ ಏಡ್ಸ್ ಸುರಕ್ಷಾ-2026 ಅಭಿಯಾನವು ಮುಖ್ಯವಾಗಿ ಈ ಕೆಳಗಿನ ಗುರಿಗಳನ್ನು ಹೊಂದಿದೆ:
-
ಶೇ. 95 ರಷ್ಟು ಸೋಂಕಿತರನ್ನು ಪತ್ತೆ ಹಚ್ಚುವುದು.
-
ಸೋಂಕು ದೃಢಪಟ್ಟವರಿಗೆ ತಕ್ಷಣ ಚಿಕಿತ್ಸೆ ಒದಗಿಸುವುದು.
-
ತಾಯಿಯಿಂದ ಮಗುವಿಗೆ ಹರಡುವ ಸೋಂಕನ್ನು ಸಂಪೂರ್ಣವಾಗಿ ತಡೆಗಟ್ಟುವುದು.
ಎಚ್ಐವಿ ಎನ್ನುವುದು ಕೇವಲ ಕಾಯಿಲೆಯಲ್ಲ, ಅದು ಸಾಮಾಜಿಕ ಪಿಡುಗಾಗದಂತೆ ತಡೆಯುವುದು ನಮ್ಮೆಲ್ಲರ ಜವಾಬ್ದಾರಿ. ಮುಜುಗರ ಬಿಟ್ಟು ತಂತ್ರಜ್ಞಾನದ ನೆರವಿನೊಂದಿಗೆ ಮುನ್ನೆಚ್ಚರಿಕೆ ವಹಿಸುವುದು ಸುಕ್ಷೇಮ. ನಿಮಗೇನಾದರೂ ಅನುಮಾನವಿದ್ದರೆ, ಕೂಡಲೇ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿ ಅಥವಾ ಸರ್ಕಾರಿ ಆಸ್ಪತ್ರೆಯ ಐಸಿಟಿಸಿ ಕೇಂದ್ರಕ್ಕೆ ಭೇಟಿ ನೀಡಿ.
ಬೆಂಗಳೂರು ಜನತೆ ಗಮನಕ್ಕೆ: ಮೇ.16ರಿಂದ ಪ್ರತಿ ಶನಿವಾರ ‘ನನ್ನ ಇ-ಖಾತಾ ಅಭಿಯಾನ’ ಆರಂಭ
