ಒಟಾವಾ: ಜಗತ್ತನ್ನು ಕೋವಿಡ್ ಭೀತಿ ಕಾಡಿದ ಬೆನ್ನಲ್ಲೇ, ಇದೀಗ ಮತ್ತೊಂದು ಮಾರಕ ವೈರಸ್ ಆತಂಕ ಸೃಷ್ಟಿಸುತ್ತಿದೆ. ಕೆನಡಾದಲ್ಲಿ ಮೊದಲ ಬಾರಿಗೆ ‘ಹಂಟಾವೈರಸ್’ (Hantavirus) ಪ್ರಕರಣ ಅಧಿಕೃತವಾಗಿ ದೃಢಪಟ್ಟಿದೆ. ಇತ್ತೀಚೆಗೆ ‘ಎಂವಿ ಹೊಂಡಿಯಸ್’ (MV Hondius) ಎಂಬ ಐಷಾರಾಮಿ ಕ್ರೂಸ್ ಹಡಗಿನಲ್ಲಿ ಪ್ರಯಾಣಿಸಿ ಮರಳಿದ್ದ ವ್ಯಕ್ತಿಯೊಬ್ಬರಲ್ಲಿ ಈ ಸೋಂಕು ಕಾಣಿಸಿಕೊಂಡಿದೆ ಎಂದು ಕೆನಡಾದ ಆರೋಗ್ಯ ಇಲಾಖೆ ಖಚಿತಪಡಿಸಿದೆ.
ಏನಿದು ಹಡಗಿನ ಲಿಂಕ್?
’ಎಂವಿ ಹೊಂಡಿಯಸ್’ ಪ್ರವಾಸಿ ಹಡಗಿನಲ್ಲಿ ಇತ್ತೀಚೆಗೆ ಹಂಟಾವೈರಸ್ ಭಾರಿ ಪ್ರಮಾಣದಲ್ಲಿ ಹರಡಿಕೊಂಡಿತ್ತು. ಆ ಹಡಗಿನಲ್ಲಿದ್ದ ನಾಲ್ಕು ಮಂದಿ ಕೆನಡಾ ಪ್ರಜೆಗಳನ್ನು ತಾಯ್ನಾಡಿಗೆ ಕರೆತಂದು, ಬ್ರಿಟಿಷ್ ಕೊಲಂಬಿಯಾದಲ್ಲಿ ಕಟ್ಟುನಿಟ್ಟಿನ ಕ್ವಾರಂಟೈನ್ನಲ್ಲಿ ಇಡಲಾಗಿತ್ತು.
- ಇವರ ಪೈಕಿ ಯುಕೋನ್ ಪ್ರಾಂತ್ಯದ ೭೦ ವರ್ಷದ ವೃದ್ಧರೊಬ್ಬರಿಗೆ ತಲೆನೋವು ಮತ್ತು ಜ್ವರ ಕಾಣಿಸಿಕೊಂಡಿದ್ದು, ಪರೀಕ್ಷಿಸಿದಾಗ ‘ಆಂಡಿಸ್ ಸ್ಟ್ರೈನ್’ (Andes strain) ಮಾದರಿಯ ಹಂಟಾವೈರಸ್ ಇರುವುದು ಪತ್ತೆಯಾಗಿದೆ.
- ಸದ್ಯ ಸೋಂಕಿತ ವ್ಯಕ್ತಿಯನ್ನು ವಿಕ್ಟೋರಿಯಾ ಆಸ್ಪತ್ರೆಯ ಐಸೊಲೇಷನ್ ವಾರ್ಡ್ನಲ್ಲಿ ಇಟ್ಟು ತೀವ್ರ ನಿಗಾದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಅವರ ಪತ್ನಿಗೂ ಸಣ್ಣ ಪ್ರಮಾಣದ ಲಕ್ಷಣಗಳಿದ್ದು, ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದೆ.
ಜಾಗತಿಕ ಮಟ್ಟದಲ್ಲಿ ಹೆಚ್ಚಿದ ಆತಂಕ
ವಿಶ್ವ ಆರೋಗ್ಯ ಸಂಸ್ಥೆ (WHO) ನೀಡಿರುವ ಮಾಹಿತಿ ಪ್ರಕಾರ, ಈ ಪ್ರವಾಸಿ ಹಡಗಿನಲ್ಲಿದ್ದ ಪ್ರಯಾಣಿಕರ ಪೈಕಿ ಈಗಾಗಲೇ ಸುಮಾರು ೧೧ಕ್ಕೂ ಹೆಚ್ಚು ಜನರಿಗೆ ಸೋಂಕು ತಗುಲಿದ್ದು, ಡಚ್ ದಂಪತಿ ಸೇರಿದಂತೆ ಮೂವರು ಸಾವನ್ನಪ್ಪಿದ್ದಾರೆ. ಇದು ಅಮೆರಿಕ, ಫ್ರಾನ್ಸ್ ಮತ್ತು ಕೆನಡಾ ಸೇರಿದಂತೆ ಹಲವು ದೇಶಗಳಿಗೆ ಆತಂಕ ತಂದಿಟ್ಟಿದೆ.
ಹಂಟಾವೈರಸ್ ಎಷ್ಟು ಅಪಾಯಕಾರಿ?
ಗಮನಿಸಬೇಕಾದ ಅಂಶ: ಸಾಮಾನ್ಯವಾಗಿ ಹಂಟಾವೈರಸ್ ಇಲಿ ಮತ್ತು ಹೆಗ್ಗಣಗಳ ಮೂತ್ರ, ಮಲ ಹಾಗೂ ಲಾಲಾರಸದ ಮೂಲಕ ಹರಡುತ್ತದೆ. ಆದರೆ ಈಗ ಪತ್ತೆಯಾಗಿರುವ ‘ಆಂಡಿಸ್’ ತಳಿಯ ಹಂಟಾವೈರಸ್, ಮನುಷ್ಯರಿಂದ ಮನುಷ್ಯರಿಗೂ ಹರಡುವ ಸಾಮರ್ಥ್ಯ ಹೊಂದಿದೆ ಎಂದು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.
