ನವದೆಹಲಿ: ದೇಶಾದ್ಯಂತ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರಿಕೆಯ ವಿರುದ್ಧ ಗಿಗ್ ಕಾರ್ಮಿಕರು (Gig Workers) ಬೃಹತ್ ಆಂದೋಲನಕ್ಕೆ ಮುಂದಾಗಿದ್ದಾರೆ. ಇಂದು, ಮೇ 16ರ ಶನಿವಾರ ಮಧ್ಯಾಹ್ನ 12 ಗಂಟೆಯಿಂದ ಸಂಜೆ 5 ಗಂಟೆಯವರೆಗೆ ಲಕ್ಷಾಂತರ ಡೆಲಿವರಿ ಪಾರ್ಟ್ನರ್ಗಳು ಮತ್ತು ಕ್ಯಾಬ್ ಚಾಲಕರು ಆ್ಯಪ್ಗಳಿಂದ ಲಾಗ್ ಆಫ್ (Log Off) ಮಾಡುವ ಮೂಲಕ ಮುಷ್ಕರ ನಡೆಸಲಿದ್ದಾರೆ.
ಗಿಗ್ ಅಂಡ್ ಪ್ಲಾಟ್ಫಾರ್ಮ್ ಸರ್ವಿಸ್ ವರ್ಕರ್ಸ್ ಯೂನಿಯನ್’ (GIPSU) ನೇತೃತ್ವದಲ್ಲಿ ಈ ಮುಷ್ಕರ ನಡೆಯುತ್ತಿದ್ದು, Swiggy, Zomato, Blinkit, Zepto, Ola, Uber ಮತ್ತು Rapido ಸಂಸ್ಥೆಗಳ ಸೇವೆಗಳು ಶನಿವಾರ ದೊಡ್ಡ ಮಟ್ಟದಲ್ಲಿ ಸ್ಥಗಿತಗೊಳ್ಳಲಿವೆ.
ಮುಷ್ಕರಕ್ಕೆ ಕಾರಣವೇನು? ಇಂಧನ ದರ ಏರಿಕೆಯ ಬಿಸಿ!
ಮೇ 15ರಂದು ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಪ್ರತಿ ಲೀಟರ್ಗೆ ₹3 ರಷ್ಟು ಏರಿಕೆಯಾಗಿದೆ. ಜಾಗತಿಕ ಇಂಧನ ಬೆಲೆ ಏರಿಕೆಯ ಹೊರೆಯನ್ನು ತೈಲ ಕಂಪನಿಗಳು ಗ್ರಾಹಕರ ಮೇಲೆ ಹಾಕಿವೆ. ಇದರಿಂದಾಗಿ ದ್ವಿಚಕ್ರ ವಾಹನಗಳನ್ನೇ ನೆಚ್ಚಿಕೊಂಡಿರುವ ಡೆಲಿವರಿ ಬಾಯ್ಸ್ ಮತ್ತು ಕ್ಯಾಬ್ ಚಾಲಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ದಿನದ ದುಡಿಮೆ ಶೂನ್ಯ: ಒಬ್ಬ ಡೆಲಿವರಿ ಪಾರ್ಟ್ನರ್ ದಿನಕ್ಕೆ ಸರಾಸರಿ 50-70 ಕಿಲೋಮೀಟರ್ ವಾಹನ ಚಲಾಯಿಸಬೇಕಾಗುತ್ತದೆ.
ಹೆಚ್ಚುತ್ತಿರುವ ವೆಚ್ಚ: ಪೆಟ್ರೋಲ್, ವಾಹನ ರಿಪೇರಿ, ಮೊಬೈಲ್ ರೀಚಾರ್ಜ್ ವೆಚ್ಚಗಳಲ್ಲೇ ಇವರ ಸಂಪಾದನೆಯ ಬಹುಪಾಲು ಖರ್ಚಾಗುತ್ತಿದೆ.
ಕಂಪನಿಗಳ ನಿರ್ಲಕ್ಷ್ಯ: ವೆಚ್ಚಗಳು ಹೆಚ್ಚಾಗುತ್ತಿದ್ದರೂ, ಕಂಪನಿಗಳು ಆರ್ಡರ್ಗೆ ನೀಡುವ ಹಣದಲ್ಲಿ ಯಾವುದೇ ಹೆಚ್ಚಳ ಮಾಡಿಲ್ಲ.
“ಬಿಸಿಲ ಬೇಗೆಯಲ್ಲಿ 12-14 ಗಂಟೆಗಳ ಕಾಲ ದುಡಿಯುವ ಕಾರ್ಮಿಕರು ಈಗಾಗಲೇ ಕಂಗೆಟ್ಟಿದ್ದಾರೆ. ಇಂಧನ ದರ ಏರಿಕೆಯಿಂದಾಗಿ ಅವರ ದಿನದ ಉಳಿತಾಯ ಸಂಪೂರ್ಣ ಶೂನ್ಯವಾಗಿದೆ. ಹಲವರು ಸಾಲದ ಸುಳಿಗೆ ಸಿಲುಕುತ್ತಿದ್ದಾರೆ -ಸೀಮಾ ಸಿಂಗ್, ಯೂನಿಯನ್ ಅಧ್ಯಕ್ಷೆ
ಗಿಗ್ ಕಾರ್ಮಿಕರ ಪ್ರಮುಖ ಬೇಡಿಕೆಗಳು ಯಾವುವು?
ಯೂನಿಯನ್ ರಾಷ್ಟ್ರೀಯ ಸಂಯೋಜಕ ನಿರ್ಮಲ್ ಗೋರಾನಾ ಅವರ ಪ್ರಕಾರ, ದೇಶದಲ್ಲಿ ಆಹಾರ ವಿತರಣೆ, ಕಿರಾಣಿ, ಲಾಜಿಸ್ಟಿಕ್ಸ್ ಮತ್ತು ಕ್ಯಾಬ್ ಸೇವೆಗಳಲ್ಲಿ 1.2 ಕೋಟಿಗೂ ಹೆಚ್ಚು ಗಿಗ್ ಕಾರ್ಮಿಕರಿದ್ದಾರೆ. ಇವರಿಗೆ ಯಾವುದೇ ಸಾಮಾಜಿಕ ಭದ್ರತೆ ಅಥವಾ ಕನಿಷ್ಠ ವೇತನದ ಸೌಲಭ್ಯವಿಲ್ಲ. ಅವರ ಮುಖ್ಯ ಬೇಡಿಕೆಗಳು ಇಲ್ಲಿವೆ:
ಕಿಲೋಮೀಟರ್ಗೆ ₹20 ಕನಿಷ್ಠ ದರ: ಇಂಧನ ವೆಚ್ಚ ಸರಿದೂಗಿಸಲು ಪ್ರತಿ ಕಿಲೋಮೀಟರ್ಗೆ ಕನಿಷ್ಠ ₹20 ಸೇವಾ ದರ ನಿಗದಿಪಡಿಸಬೇಕು.
ಆಟೋಮ್ಯಾಟಿಕ್ ಪೇಮೆಂಟ್ ಅಡ್ಜಸ್ಟ್ಮೆಂಟ್: ಇಂಧನ ದರಗಳು ಹೆಚ್ಚಾದಾಗ, ಕಂಪನಿಗಳು ನೀಡುವ ಮೊತ್ತವೂ ಸ್ವಯಂಚಾಲಿತವಾಗಿ ಹೆಚ್ಚಾಗಬೇಕು.
ಕೆಲಸದ ಸಮಯ ಮತ್ತು ಒವರ್ ಟೈಂ: ಕೆಲಸದ ಸಮಯಕ್ಕೆ ಮಿತಿ ಇರಬೇಕು ಮತ್ತು ಹೆಚ್ಚುವರಿ ಸಮಯಕ್ಕೆ ಭತ್ಯೆ ನೀಡಬೇಕು.
ವಿಮೆ ಸೌಲಭ್ಯ: ಆರೋಗ್ಯ ವಿಮೆ, ಅಪಘಾತ ವಿಮೆ ಮತ್ತು ಪೆನ್ಷನ್ ಯೋಜನೆ ಜಾರಿಗೆ ತರಬೇಕು.
ದಂಡನೆಗೆ ತಡೆ: ಆ್ಯಪ್ ಕಂಪನಿಗಳು ಮನಸೋಇಚ್ಛೆ ವಿಧಿಸುವ ದಂಡ ಮತ್ತು ಐಡಿ ಡಿ-ಆಕ್ಟಿವೇಷನ್ ಮಾಡುವುದನ್ನು ನಿಲ್ಲಿಸಬೇಕು.
ಕಾನೂನು ರಕ್ಷಣೆ: ಸರ್ಕಾರ ಇವರಿಗಾಗಿ ಪ್ರತ್ಯೇಕ ಕಾರ್ಮಿಕ ಸಂಹಿತೆ ಮತ್ತು ಕನಿಷ್ಠ ಆದಾಯದ ಗ್ಯಾರಂಟಿ ನೀಡ
