ತೆಹ್ರಾನ್: ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಸಂಘರ್ಷ ಈಗ ಅತ್ಯಂತ ಅಪಾಯಕಾರಿ ಘಟ್ಟಕ್ಕೆ ಬಂದು ತಲುಪಿದೆ. ಇರಾನ್ನ ಪ್ರಬಲ ಸೇನಾ ಘಟಕವಾದ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ (IRGC), ಪಶ್ಚಿಮ ಏಷ್ಯಾ ಮತ್ತು ಗಲ್ಫ್ ರಾಷ್ಟ್ರಗಳಲ್ಲಿ ಕಾರ್ಯಾಚರಿಸುತ್ತಿರುವ 18 ಪ್ರಮುಖ ಅಮೆರಿಕನ್ ಕಂಪನಿಗಳ ಮೇಲೆ ಏಪ್ರಿಲ್ 1ರಿಂದ ನೇರ ದಾಳಿ ನಡೆಸುವುದಾಗಿ ಬಹಿರಂಗವಾಗಿ ಎಚ್ಚರಿಕೆ ನೀಡಿದೆ.
ತನ್ನ ಉನ್ನತ ಸೇನಾ ಕಮಾಂಡರ್ಗಳ ಸರಣಿ ಹತ್ಯೆಗೆ ಪ್ರತಿಕ್ರಿಯೆಯಾಗಿ ಇರಾನ್ ಈ ನಿರ್ಧಾರ ಕೈಗೊಂಡಿದೆ ಎಂದು ವರದಿಯಾಗಿದೆ.
ಇರಾನ್ನ ‘ಹಿಟ್ ಲಿಸ್ಟ್’ನಲ್ಲಿರುವ 18 ಕಂಪನಿಗಳು:
IRGC ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ವಿಶ್ವದ ದೈತ್ಯ ಬಹುರಾಷ್ಟ್ರೀಯ ಕಂಪನಿಗಳ ಹೆಸರಿದೆ. ಅವುಗಳಲ್ಲಿ ಪ್ರಮುಖವಾದವುಗಳೆಂದರೆ:
ಟೆಕ್ ದೈತ್ಯರು: ಗೂಗಲ್ (Google), ಆಪಲ್ (Apple), ಮೈಕ್ರೋಸಾಫ್ಟ್ (Microsoft), ಮೆಟಾ (Facebook, WhatsApp, Instagram).
ಹಾರ್ಡ್ವೇರ್ & ಸಾಫ್ಟ್ವೇರ್: ಇಂಟೆಲ್ (Intel), IBM, ಒರಾಕಲ್ (Oracle), ಸಿಸ್ಕೋ (Cisco), HP, ಡೆಲ್ (Dell).
ಇತರೆ ವಲಯಗಳು: ಟೆಸ್ಲಾ (Tesla), ಬೋಯಿಂಗ್ (Boeing), ಜನರಲ್ ಎಲೆಕ್ಟ್ರಿಕ್ ಮತ್ತು ಜೆಪಿ ಮೋರ್ಗನ್ ಚೇಸ್.
ದುಬೈ ಮತ್ತು ಅಬುಧಾಬಿಯಂತಹ ನಗರಗಳಲ್ಲಿ ಈ ಕಂಪನಿಗಳು ದೊಡ್ಡ ಮಟ್ಟದ ಕಚೇರಿಗಳನ್ನು ಹೊಂದಿದ್ದು, ಈಗ ಅಲ್ಲಿನ ಉದ್ಯೋಗಿಗಳಲ್ಲಿ ಆತಂಕ ಮನೆಮಾಡಿದೆ.
ದಾಳಿಯ ಸಮಯ ನಿಗದಿ:
ಇರಾನ್ ಸರ್ಕಾರಿ ಮಾಧ್ಯಮಗಳ ಪ್ರಕಾರ, ಬುಧವಾರ (ಏಪ್ರಿಲ್ 1) ತೆಹ್ರಾನ್ ಸಮಯ ರಾತ್ರಿ 8 ಗಂಟೆಗೆ (ಭಾರತೀಯ ಕಾಲಮಾನ ರಾತ್ರಿ 10:30) ಈ ದಾಳಿಗಳು ಆರಂಭವಾಗಲಿವೆ. “ಇರಾನ್ ಮೇಲೆ ನಡೆಯುವ ಪ್ರತಿ ದಾಳಿಗೂ ಈ ಕಂಪನಿಗಳು ಬೆಲೆ ತೆರಬೇಕಾಗುತ್ತದೆ. ಉದ್ಯೋಗಿಗಳು ತಮ್ಮ ಜೀವ ಉಳಿಸಿಕೊಳ್ಳಲು ತಕ್ಷಣವೇ ಕೆಲಸದ ಸ್ಥಳಗಳನ್ನು ತೊರೆಯಬೇಕು” ಎಂದು IRGC ಗುಡುಗಿದೆ.
ಟೆಕ್ ಮತ್ತು AI ಕಂಪನಿಗಳ ಮೇಲೆ ಇರಾನ್ ಕೆಂಗಣ್ಣು ಏಕೆ?
ಈ ಕಂಪನಿಗಳು ಅಮೆರಿಕ ಮತ್ತು ಇಸ್ರೇಲ್ ಸೇನೆಗೆ ತಾಂತ್ರಿಕ ಸಹಾಯ ನೀಡುತ್ತಿವೆ ಎಂದು ಇರಾನ್ ಆರೋಪಿಸಿದೆ. ವಿಶೇಷವಾಗಿ:
ಡ್ರೋನ್ ಕಾರ್ಯಾಚರಣೆ: ಮಾನವರಹಿತ ಡ್ರೋನ್ಗಳನ್ನು ಮುನ್ನಡೆಸಲು ಈ ಕಂಪನಿಗಳ ತಂತ್ರಜ್ಞಾನ ಬಳಕೆಯಾಗುತ್ತಿದೆ.
ಗುರಿ ಪತ್ತೆ (AI): ಕೃತಕ ಬುದ್ಧಿಮತ್ತೆ (AI) ಮೂಲಕ ಇರಾನ್ನ ಸೇನಾ ಅಧಿಕಾರಿಗಳನ್ನು ಪತ್ತೆಹಚ್ಚಲು ಮತ್ತು ದಾಳಿ ಯೋಜಿಸಲು ಈ ಸಂಸ್ಥೆಗಳು ಸಹಕರಿಸುತ್ತಿವೆ ಎಂಬುದು ಇರಾನ್ನ ವಾದ.
