ಬೆಂಗಳೂರು: ಇಂದು ಅನೇಕರು ಒಂದಕ್ಕಿಂತ ಹೆಚ್ಚು ಕ್ರೆಡಿಟ್ ಕಾರ್ಡ್ಗಳನ್ನು ಹೊಂದಿರುತ್ತಾರೆ. ಕೆಲವು ಕಾರ್ಡ್ಗಳನ್ನು ನಿಯಮಿತವಾಗಿ ಬಳಸಿದರೆ, ಇನ್ನು ಕೆಲವನ್ನು ಕೇವಲ ತುರ್ತು ಸಂದರ್ಭಗಳಿಗಾಗಿ ಅಥವಾ ಶೋಗಾಗಿ ಹಾಗೆಯೇ ಇಟ್ಟುಕೊಂಡಿರುತ್ತಾರೆ. ಆದರೆ, ದೀರ್ಘಕಾಲದವರೆಗೆ ಕ್ರೆಡಿಟ್ ಕಾರ್ಡ್ ಬಳಸದೆ ಇರುವುದು ನಿಮ್ಮ ಆರ್ಥಿಕದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ.
ಕ್ರೆಡಿಟ್ ಕಾರ್ಡ್ ಬಳಸದಿದ್ದರೆ ಎದುರಾಗಬಹುದಾದ ಪ್ರಮುಖ ಸಮಸ್ಯೆಗಳು ಇಲ್ಲಿವೆ:
1. ಕಾರ್ಡ್ ರದ್ದಾಗುವ ಭೀತಿ
ಭಾರತೀಯ ರಿಸರ್ವ್ ಬ್ಯಾಂಕ್ (RBI) ನಿಯಮಗಳ ಪ್ರಕಾರ, ಯಾವುದೇ ಕ್ರೆಡಿಟ್ ಕಾರ್ಡ್ನಲ್ಲಿ ಸತತ ಒಂದು ವರ್ಷಕ್ಕಿಂತ ಹೆಚ್ಚು ಕಾಲ ಯಾವುದೇ ವಹಿವಾಟು ನಡೆಯದಿದ್ದರೆ, ಬ್ಯಾಂಕುಗಳು ಆ ಕಾರ್ಡ್ ಅನ್ನು ನಿಷ್ಕ್ರಿಯಗೊಳಿಸುವ ಅಥವಾ ಮುಚ್ಚುವ ಅಧಿಕಾರ ಹೊಂದಿರುತ್ತವೆ. ಆದರೆ ಕಾರ್ಡ್ ಕ್ಲೋಸ್ ಮಾಡುವ 30 ದಿನಗಳ ಮೊದಲು ಬ್ಯಾಂಕ್ ನಿಮಗೆ ಈ ಬಗ್ಗೆ ಮಾಹಿತಿ ನೀಡಬೇಕಾಗುತ್ತದೆ.
2. ಸಿಬಿಲ್ (CIBIL) ಸ್ಕೋರ್ ಮೇಲೆ ಪರಿಣಾಮ
ನಿಮ್ಮ ಹಳೆಯ ಕಾರ್ಡ್ ಅನ್ನು ನೀವು ಬಳಸದೇ ಇದ್ದಾಗ ಅಥವಾ ಅದು ಕ್ಲೋಸ್ ಆದಾಗ ನಿಮ್ಮ ‘ಕ್ರೆಡಿಟ್ ಹಿಸ್ಟರಿ’ಯ ಅವಧಿ ಕಡಿಮೆಯಾಗುತ್ತದೆ. ಸಾಲ ನೀಡುವ ಸಂಸ್ಥೆಗಳು ನೀವು ಎಷ್ಟು ಹಳೆಯ ಗ್ರಾಹಕರು ಎಂಬುದನ್ನು ಗಮನಿಸುತ್ತವೆ. ಹಳೆಯ ಕಾರ್ಡ್ ರದ್ದಾದರೆ ನಿಮ್ಮ ಕ್ರೆಡಿಟ್ ಸ್ಕೋರ್ ಸ್ವಲ್ಪ ಮಟ್ಟಿಗೆ ಕುಸಿಯುವ ಸಾಧ್ಯತೆ ಇರುತ್ತದೆ.
3. ಕ್ರೆಡಿಟ್ ಯುಟಿಲೈಸೇಶನ್ ರೇಶಿಯೋ (CUR) ಹೆಚ್ಚಳ
ನಿಮ್ಮ ಬಳಿ ಮೂರು ಕಾರ್ಡ್ಗಳಿದ್ದು, ಒಟ್ಟು 3 ಲಕ್ಷ ರೂ. ಲಿಮಿಟ್ ಇದೆ ಎಂದು ಭಾವಿಸೋಣ. ಒಂದು ಕಾರ್ಡ್ ಬಳಕೆಯಿಲ್ಲದೆ ರದ್ದಾದರೆ ನಿಮ್ಮ ಒಟ್ಟು ಲಿಮಿಟ್ 2 ಲಕ್ಷಕ್ಕೆ ಇಳಿಯುತ್ತದೆ. ಇದರಿಂದ ನೀವು ಮಾಡುವ ಖರ್ಚಿನ ಪ್ರಮಾಣ (Percentage) ಹೆಚ್ಚಾಗಿ ಕಾಣಿಸುತ್ತದೆ. ಇದು ನಿಮ್ಮ ಕ್ರೆಡಿಟ್ ಸ್ಕೋರ್ ಅನ್ನು ಋಣಾತ್ಮಕವಾಗಿ ಬಾಧಿಸುತ್ತದೆ.
4. ವಾರ್ಷಿಕ ಶುಲ್ಕದ ಹೊರೆ
ನೀವು ಕಾರ್ಡ್ ಬಳಸಲಿ ಅಥವಾ ಬಿಡಲಿ, ಕೆಲವು ಕಾರ್ಡ್ಗಳಿಗೆ ವಾರ್ಷಿಕ ಶುಲ್ಕ (Annual Fees) ಅನ್ವಯಿಸುತ್ತದೆ. ಕಾರ್ಡ್ ಬಳಸುತ್ತಿಲ್ಲ ಎಂಬ ಕಾರಣಕ್ಕೆ ನೀವು ಸ್ಟೇಟ್ಮೆಂಟ್ ಗಮನಿಸದೆ ಈ ಶುಲ್ಕ ಪಾವತಿಸದಿದ್ದರೆ, ಅದು ದಂಡ ಮತ್ತು ಬಡ್ಡಿಯಾಗಿ ಬೆಳೆದು ನಿಮ್ಮ ಮೇಲೆ ಆರ್ಥಿಕ ಹೊರೆಯಾಗಬಹುದು.
ತಜ್ಞರ ಸಲಹೆ ಏನು?
ಸಣ್ಣ ವಹಿವಾಟು ನಡೆಸಿ: ನಿಮ್ಮ ಕಾರ್ಡ್ ಸಕ್ರಿಯವಾಗಿರಲು ಕನಿಷ್ಠ ಆರು ತಿಂಗಳಿಗೊಮ್ಮೆ ಮೊಬೈಲ್ ರೀಚಾರ್ಜ್ ಅಥವಾ ಸಣ್ಣ ಪುಟ್ಟ ಶಾಪಿಂಗ್ ಮಾಡಿ.
ಸೂಕ್ತವಾಗಿ ಕ್ಲೋಸ್ ಮಾಡಿ: ಒಂದು ವೇಳೆ ನಿಮಗೆ ಆ ಕಾರ್ಡ್ ನಿಜವಾಗಿಯೂ ಬೇಡವೆಂದಿದ್ದರೆ, ನೀವೇ ಸ್ವತಃ ಬ್ಯಾಂಕ್ ಸಂಪರ್ಕಿಸಿ ಅಧಿಕೃತವಾಗಿ ಅದನ್ನು ರದ್ದುಗೊಳಿಸುವುದು ಉತ್ತಮ.
ನೆನಪಿಡಿ: ಕ್ರೆಡಿಟ್ ಕಾರ್ಡ್ ಎನ್ನುವುದು ಎರಡೂ ಬದಿಯ ಕತ್ತಿಯಂತೆ. ಸರಿಯಾಗಿ ಬಳಸಿದರೆ ಲಾಭ, ಬಳಸದೆ ನಿರ್ಲಕ್ಷಿಸಿದರೆ ನಷ್ಟ ಗ್ಯಾರಂಟಿ!
