ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ದೇಶದಲ್ಲಿ ಗ್ಯಾಸ್ ಸಿಲಿಂಡರ್ ಬೆಲೆ ಏರಿಕೆಯಿಂದಾಗಿ ಸಾಮಾನ್ಯ ಜನರಿಗೆ ಆರ್ಥಿಕ ಹೊರೆ ಹೆಚ್ಚಾಗುತ್ತಿದೆ. ಇದರ ನಡುವೆ, ಪ್ರತಿಯೊಬ್ಬರ ಮನೆಯಲ್ಲೂ ಅತ್ಯಾವಶ್ಯಕವಾಗಿರುವ ಎಲ್ಪಿಜಿ (LPG) ಗ್ಯಾಸ್ ಸಿಲಿಂಡರ್ ಬಳಸುವಾಗ ಸುರಕ್ಷತೆಯ ಬಗ್ಗೆ ತೀವ್ರ ನಿಗಾ ವಹಿಸುವುದು ಅತ್ಯಗತ್ಯ. ಗ್ಯಾಸ್ ಲೀಕೇಜ್ ಆದರೆ ದೊಡ್ಡ ಮಟ್ಟದ ದುರಂತ ಸಂಭವಿಸುವ ಅಪಾಯವಿರುತ್ತದೆ. ಆದರೆ, ನಾವು ಮನೆಗೆ ಬರುವ ಗ್ಯಾಸ್ ಸಿಲಿಂಡರ್ ಸುರಕ್ಷಿತವಾಗಿದೆಯೇ ಅಥವಾ ಇಲ್ಲವೇ ಎಂಬುದನ್ನು ಸಿಲಿಂಡರ್ ಮೇಲಿರುವ ವಿಶೇಷ ಕೋಡ್ಗಳ ಮೂಲಕ ಸುಲಭವಾಗಿ ಪತ್ತೆಹಚ್ಚಬಹುದು.
ಸಾಮಾನ್ಯವಾಗಿ ಗ್ಯಾಸ್ ಸಿಲಿಂಡರ್ನ ಮೇಲ್ಭಾಗದ ಮೆಟಲ್ ರಿಂಗ್ (ಕಬ್ಬಿಣದ ಪಟ್ಟಿ) ಮೇಲೆ A-26, B-27, C-25, D-28 ನಂತಹ ಕೋಡ್ಗಳನ್ನು ಬರೆದಿರುವುದನ್ನು ನೀವು ಗಮನಿಸಿರಬಹುದು. ಆದರೆ ನಮ್ಮಲ್ಲಿ ಶೇ. 90 ರಷ್ಟು ಜನರಿಗೆ ಇದರ ನಿಜವಾದ ಅರ್ಥ ಏನೆಂಬುದು ತಿಳಿದಿರುವುದಿಲ್ಲ. ಹಲವರು ಇದನ್ನು ಸಿಲಿಂಡರ್ನ ‘ಎಕ್ಸ್ಪೈರಿ ಡೇಟ್’ (ಬಳಕೆಯ ಅವಧಿ ಮುಕ್ತಾಯದ ದಿನಾಂಕ) ಎಂದು ಭಾವಿಸುತ್ತಾರೆ. ಆದರೆ ತಜ್ಞರ ಪ್ರಕಾರ ಇದರ ಅಸಲಿ ಅರ್ಥವೇ ಬೇರೆ.
ಈ ಕೋಡ್ಗಳ ಅಸಲಿ ಅರ್ಥವೇನು?
ಸಿಲಿಂಡರ್ ಮೇಲೆ ಬರೆದಿರುವ ಈ ಕೋಡ್ಗಳು ಆ ಸಿಲಿಂಡರ್ನ “ಸುರಕ್ಷತಾ ಪರೀಕ್ಷೆ” (Safety Test ಅಥವಾ Hydrostatic Test) ಯನ್ನು ಮುಂದಿನ ದಿನಗಳಲ್ಲಿ ಯಾವಾಗ ಮಾಡಬೇಕು ಎಂಬುದನ್ನು ಸೂಚಿಸುತ್ತವೆ. ಸಿಲಿಂಡರ್ಗಳು ಹಳೆಯದಾದಂತೆ ಅವುಗಳಲ್ಲಿ ತುಕ್ಕು ಹಿಡಿಯುವುದು ಅಥವಾ ಗ್ಯಾಸ್ ಲೀಕ್ ಆಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಗ್ಯಾಸ್ ಕಂಪನಿಗಳು ನಿಯತಕಾಲಿಕವಾಗಿ ಇವುಗಳ ಗುಣಮಟ್ಟವನ್ನು ಮರುಪರಿಶೀಲಿಸುತ್ತವೆ.
ಕೋಡ್ನಲ್ಲಿರುವ ಅಕ್ಷರಗಳು (A, B, C, D) ತಿಂಗಳುಗಳನ್ನು ಪ್ರತಿನಿಧಿಸಿದರೆ, ಅದರ ಮುಂದಿರುವ ಸಂಖ್ಯೆಗಳು ವರ್ಷವನ್ನು ಸೂಚಿಸುತ್ತವೆ.
A – ಜನವರಿಯಿಂದ ಮಾರ್ಚ್ (ವರ್ಷದ ಮೊದಲ ತ್ರೈಮಾಸಿಕ)
B – ಏಪ್ರಿಲ್ನಿಂದ ಜೂನ್ (ವರ್ಷದ ಎರಡನೇ ತ್ರೈಮಾಸಿಕ)
C – ಜುಲೈನಿಂದ ಸೆಪ್ಟೆಂಬರ್ (ವರ್ಷದ ಮೂರನೇ ತ್ರೈಮಾಸಿಕ)
D – ಅಕ್ಟೋಬರ್ನಿಂದ ಡಿಸೆಂಬರ್ (ವರ್ಷದ ನಾಲ್ಕನೇ ತ್ರೈಮಾಸಿಕ)
ಉದಾಹರಣೆಯೊಂದಿಗೆ ತಿಳಿಯಿರಿ:
ಒಂದು ವೇಳೆ ನಿಮ್ಮ ಮನೆಗೆ ಬಂದ ಸಿಲಿಂಡರ್ ಮೇಲೆ B-26 ಎಂದು ಬರೆದಿದ್ದರೆ, ಆ ಸಿಲಿಂಡರ್ ಅನ್ನು 2026ರ ಏಪ್ರಿಲ್ನಿಂದ ಜೂನ್ ಒಳಗಾಗಿ ಕಡ್ಡಾಯವಾಗಿ ಸುರಕ್ಷತಾ ಪರೀಕ್ಷೆಗೆ ಒಳಪಡಿಸಬೇಕು ಎಂದು ಅರ್ಥ.
ಅದೇ ರೀತಿ D-28 ಎಂದಿದ್ದರೆ, 2028ರ ಅಕ್ಟೋಬರ್ನಿಂದ ಡಿಸೆಂಬರ್ ಅವಧಿಯಲ್ಲಿ ಅದರ ಮರುಪರೀಕ್ಷೆ ನಡೆಯಬೇಕು ಎಂದರ್ಥ.
ಗ್ರಾಹಕರು ಏನು ಮಾಡಬೇಕು?
ನೀವು ಗ್ಯಾಸ್ ಸಿಲಿಂಡರ್ ಡೆಲಿವರಿ ಪಡೆಯುವಾಗ ಕಡ್ಡಾಯವಾಗಿ ಈ ಕೋಡ್ ಅನ್ನು ಪರಿಶೀಲಿಸಿ. ಪ್ರಸ್ತುತ ನಡೆಯುತ್ತಿರುವ ವರ್ಷ ಮತ್ತು ತಿಂಗಳಿಗಿಂತ ಹಳೆಯದಾದ ಕೋಡ್ (ಉದಾಹರಣೆಗೆ ಪ್ರಸ್ತುತ ವರ್ಷಕ್ಕಿಂತ ಹಿಂದಿನ ವರ್ಷದ ಕೋಡ್) ಸಿಲಿಂಡರ್ ಮೇಲಿದ್ದರೆ, ಅಂತಹ ಸಿಲಿಂಡರ್ ಪಡೆಯಲು ನಿರಾಕರಿಸಿ.
ಏಕೆಂದರೆ ಗಡುವು ಮುಗಿದ ಸಿಲಿಂಡರ್ಗಳಲ್ಲಿ ತಪಾಸಣೆ ನಡೆಯದ ಕಾರಣ ಅಪಘಾತಗಳಾಗುವ ಸಾಧ್ಯತೆ ಹೆಚ್ಚು. ತಕ್ಷಣವೇ ನಿಮ್ಮ ಗ್ಯಾಸ್ ಏಜೆನ್ಸಿಯನ್ನು ಸಂಪರ್ಕಿಸಿ ಆ ಸಿಲಿಂಡರ್ ಅನ್ನು ಬದಲಿಸಿಕೊಡುವಂತೆ ಕೇಳಿ. ಸುರಕ್ಷಿತ ಪರೀಕ್ಷೆಯಲ್ಲಿ ಪಾಸಾದ ಸಿಲಿಂಡರ್ಗಳಿಗೆ ಮಾತ್ರ ಕಂಪನಿಗಳು ಮುಂದಿನ ಹೊಸ ದಿನಾಂಕದ ಕೋಡ್ ಅನ್ನು ಪ್ರಿಂಟ್ ಮಾಡಿ ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತವೆ. ಹೀಗಾಗಿ, ಸಣ್ಣ ನಿರ್ಲಕ್ಷ್ಯಕ್ಕೂ ಅವಕಾಶ ನೀಡದೆ ಜಾಗೃತರಾಗಿರಿ.
