ಇಂದಿನ ವೇಗದ ಜೀವನಶೈಲಿಯಲ್ಲಿ ಗುಟ್ಕಾ ಸೇವನೆ, ಧೂಮಪಾನವು ಕೇವಲ ಒಂದು ಚಟವಾಗಿ ಉಳಿಯದೆ, ಮಾರಕ ರೋಗಗಳ ಆಹ್ವಾನ ಪತ್ರಿಕೆಯಾಗುತ್ತಿದೆ. ಶ್ವಾಸಕೋಶದ ಕಾಯಿಲೆ, ಹೃದಯಾಘಾತ ಮತ್ತು ಕ್ಯಾನ್ಸರ್ನಂತಹ ಭೀಕರ ಸಮಸ್ಯೆಗಳಿಗೆ ನೇರ ದಾರಿಯಾಗಿರುವ ಈ ಚಟದಿಂದ ಮುಕ್ತಿ ಪಡೆಯುವುದು ಅಸಾಧ್ಯವೇನಲ್ಲ. ದೃಢ ಸಂಕಲ್ಪ ಮತ್ತು ಸರಿಯಾದ ಮಾರ್ಗಸೂಚಿ ಅನುಸರಿಸಿದರೆ ಯಾರು ಬೇಕಾದರೂ ಧೂಮಪಾನ ಮುಕ್ತ ಜೀವನ ನಡೆಸಬಹುದು.
ಈ ಕುರಿತು ಆರೋಗ್ಯ ತಜ್ಞರು ಹಾಗೂ ಯಶಸ್ವಿಯಾಗಿ ಧೂಮಪಾನ ಬಿಟ್ಟವರು ಸೂಚಿಸುವ ಪ್ರಮುಖ ಸಲಹೆಗಳು ಇಲ್ಲಿವೆ:
1. ಬಲವಾದ ಸಂಕಲ್ಪವೇ ಯಶಸ್ಸಿನ ಮೊದಲ ಮೆಟ್ಟಿಲು
ಗುಟ್ಕಾ ಅಥವಾ ಧೂಮಪಾನ ಬಿಡಲು ನೀವು ಮೊದಲು ಒಂದು ಬಲವಾದ ಕಾರಣವನ್ನು ಕಂಡುಕೊಳ್ಳಬೇಕು. ನಿಮ್ಮ ಆರೋಗ್ಯದ ಜೊತೆಗೆ, ನಿಮ್ಮ ಮೇಲೆ ಅವಲಂಬಿತವಾಗಿರುವ ಕುಟುಂಬದ ಸುಖ ಮತ್ತು ಮಕ್ಕಳ ಭವಿಷ್ಯವೇ ನಿಮಗೆ ದೊಡ್ಡ ಪ್ರೇರಣೆಯಾಗಲಿ.
2. ಯೋಜನಾಬದ್ಧ ಸಿದ್ಧತೆ ಇರಲಿ
ದಿಢೀರ್ ಎಂದು ಅಭ್ಯಾಸ ನಿಲ್ಲಿಸುವುದು ಕೆಲವರಿಗೆ ಕಷ್ಟವಾಗಬಹುದು. ಅಂತಹವರು ಒಂದು ನಿರ್ದಿಷ್ಟ ದಿನಾಂಕವನ್ನು ‘ಅಂತಿಮ ದಿನ’ ಎಂದು ನಿಗದಿಪಡಿಸಿ. ಅಂದಿನಿಂದ ದಿನದಿಂದ ದಿನಕ್ಕೆ ಸಿಗರೇಟ್ ಸಂಖ್ಯೆಯನ್ನು ಕಡಿಮೆ ಮಾಡುತ್ತಾ ಬರುವ ಮೂಲಕ ಮನಸ್ಸನ್ನು ಸಿದ್ಧಗೊಳಿಸಿ.
3. ಹಂಬಲ ಉಂಟಾದಾಗ ಪರ್ಯಾಯ ಮಾರ್ಗ ಹುಡುಕಿ
ಗುಟ್ಕಾ ಸೇವನೆ, ಧೂಮಪಾನ ಮಾಡಬೇಕೆಂಬ ಆಸೆ ತೀವ್ರವಾದಾಗ ಮನಸ್ಸನ್ನು ಬೇರೆಡೆಗೆ ಸೆಳೆಯಿರಿ. ಆ ಸಮಯದಲ್ಲಿ ಚೂಯಿಂಗ್ ಗಮ್, ಏಲಕ್ಕಿ ಅಥವಾ ಒಣ ಹಣ್ಣುಗಳನ್ನು ಸೇವಿಸಿ. ಶರೀರದಲ್ಲಿರುವ ವಿಷಾಂಶ ಹೊರಹಾಕಲು ಹೆಚ್ಚಿನ ಪ್ರಮಾಣದಲ್ಲಿ ನೀರು ಕುಡಿಯುವುದು ಉತ್ತಮ.
4. ಪ್ರೀತಿಪಾತ್ರರ ಬೆಂಬಲ ಪಡೆಯಿರಿ
ನಿಮ್ಮ ಈ ನಿರ್ಧಾರವನ್ನು ಸ್ನೇಹಿತರು ಮತ್ತು ಕುಟುಂಬದವರಿಗೆ ತಿಳಿಸಿ. ನಿಮ್ಮ ಹಂಬಲದ ಸಮಯದಲ್ಲಿ ಅವರ ಪ್ರೋತ್ಸಾಹ ಮತ್ತು ಸಾಂತ್ವನವು ನಿಮ್ಮ ಛಲವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತದೆ.
5. ತಜ್ಞರ ಮಾರ್ಗದರ್ಶನ ಹಾಗೂ ಚಿಕಿತ್ಸೆ
ಸ್ವಯಂ ನಿಯಂತ್ರಣ ಸಾಧ್ಯವಾಗದಿದ್ದಲ್ಲಿ ವೈದ್ಯರ ಸಲಹೆ ಪಡೆಯಲು ಹಿಂಜರಿಯಬೇಡಿ. ನಿಕೋಟಿನ್ ರಿಪ್ಲೇಸ್ಮೆಂಟ್ ಥೆರಪಿ (NRT), ನಿಕೋಟಿನ್ ಪ್ಯಾಚ್ಗಳು ಅಥವಾ ಕೌನ್ಸೆಲಿಂಗ್ ಮೂಲಕ ಈ ಚಟದಿಂದ ಸುಲಭವಾಗಿ ಹೊರಬರಬಹುದು.
6. ಒತ್ತಡ ನಿರ್ವಹಣೆಗೆ ಆದ್ಯತೆ ನೀಡಿ
ಅನೇಕರು ಕೆಲಸದ ಒತ್ತಡ ಅಥವಾ ಮಾನಸಿಕ ಕಿರಿಕಿರಿಗಾಗಿ ಧೂಮಪಾನದ ಮೊರೆ ಹೋಗುತ್ತಾರೆ. ಇದನ್ನು ತಪ್ಪಿಸಲು ದಿನನಿತ್ಯ ಯೋಗ, ಧ್ಯಾನ ಅಥವಾ ಕನಿಷ್ಠ 30 ನಿಮಿಷಗಳ ನಡಿಗೆಯನ್ನು ರೂಢಿಸಿಕೊಳ್ಳಿ. ಇದು ಮನಸ್ಸನ್ನು ಶಾಂತವಾಗಿರಿಸುತ್ತದೆ.
7. ಪ್ರತಿ ಸಣ್ಣ ಗೆಲುವನ್ನೂ ಸಂಭ್ರಮಿಸಿ
ನೀವು ಧೂಮಪಾನ ಮಾಡದೆ ಕಳೆದ ಪ್ರತಿ ದಿನವೂ ನಿಮ್ಮ ದೊಡ್ಡ ಸಾಧನೆ. ಇಂತಹ ಸಣ್ಣ ಸಣ್ಣ ಯಶಸ್ಸುಗಳು ನಿಮ್ಮಲ್ಲಿ ಆತ್ಮವಿಶ್ವಾಸವನ್ನು ತುಂಬುತ್ತವೆ ಮತ್ತು ಗುರಿಯತ್ತ ನಿಮ್ಮನ್ನು ಮುನ್ನಡೆಸುತ್ತವೆ.
ಗಮನಿಸಿ : ಗುಟ್ಕಾ ತಿನ್ನುವುದು, ಧೂಮಪಾನ ಬಿಡುವುದು ಆರಂಭದಲ್ಲಿ ಸವಾಲಾಗಿ ಕಂಡರೂ, ಅದರ ಪ್ರತಿಫಲ ಮಾತ್ರ ಜೀವನಪರ್ಯಂತ ಆರೋಗ್ಯ ಮತ್ತು ಸುಖವನ್ನು ನೀಡುತ್ತದೆ. ಆರೋಗ್ಯಕರ ಸಮಾಜ ನಿರ್ಮಾಣಕ್ಕಾಗಿ ಇಂದೇ ಶಪಥ ಮಾಡಿ.
