ಜೂನ್ 21 ರಂದು ನಡೆಯಲಿರುವ NEET-UG 2026ರ ಮರುಪರೀಕ್ಷೆಯ ಮುನ್ನಾದಿನಗಳಲ್ಲಿ ಮೆಸೇಜಿಂಗ್ ಆಪ್ ಮೇಲಿನ ಪ್ರವೇಶವನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಿರುವ ಸರ್ಕಾರದ ಆದೇಶದ ವಿರುದ್ಧ ಟೆಲಿಗ್ರಾಮ್ ಸಲ್ಲಿಸಿರುವ ಅರ್ಜಿಗೆ ಸಂಬಂಧಿಸಿದಂತೆ ದೆಹಲಿ ಹೈಕೋರ್ಟ್ ಬುಧವಾರ ಕೇಂದ್ರ ಸರ್ಕಾರಕ್ಕೆ ಪ್ರತಿಕ್ರಿಯೆ ಸಲ್ಲಿಸುವಂತೆ ಸೂಚಿಸಿದೆ.
ನ್ಯಾಯಮೂರ್ತಿ ತೇಜಸ್ ಕರಿಯಾ ಅವರ ಏಕಸದಸ್ಯ ಪೀಠದ ಮುಂದೆ ಈ ವಿಷಯವು ವಿಚಾರಣೆಗೆ ಬಂದಾಗ, ಟೆಲಿಗ್ರಾಮ್ ಪರ ವಕೀಲರು ಈ ನಿರ್ಬಂಧಗಳು ಕಾನೂನುಬಾಹಿರ ಎಂದು ವಾದಿಸಿದರು. ಆದರೆ ಸರ್ಕಾರದ ಕ್ರಮವನ್ನು ಸಮರ್ಥಿಸಿಕೊಂಡ ಸಾಲಿಸಿಟರ್ ಜನರಲ್ (SG) ತುಷಾರ್ ಮೆಹ್ತಾ ಅವರು, ಈ ಪ್ಲಾಟ್ಫಾರ್ಮ್ ದುರುಪಯೋಗವಾಗುತ್ತಿದೆ ಮತ್ತು ಗುರುವಾರ ತಾವು “ಶಾಕಿಂಗ್ ಆದ ವಿಷಯವೊಂದನ್ನು” ಬಹಿರಂಗಪಡಿಸುವುದಾಗಿ ಹೇಳಿದರು.
”ನ್ಯಾಯಾಲಯವು ಈ ವಿಷಯವನ್ನು ನಾಳೆಗೆ ಮುಂದೂಡಿದರೆ, ನಾನು ತೋರಿಸಬಹುದಾದ ಒಂದು ಶಾಕಿಂಗ್ ಆದ ವಿಷಯವಿದೆ… ಒಂದು ಚಾನೆಲ್ ಪ್ರಾರಂಭವಾಗುತ್ತದೆ, ಅದನ್ನು ನಿಷೇಧಿಸಲಾಗುತ್ತದೆ, ತಕ್ಷಣವೇ ಮತ್ತೊಂದು ಚಾನೆಲ್ ಆರಂಭವಾಗುತ್ತದೆ. ಮತ್ತು ಕ್ಯೂಆರ್ (QR) ಕೋಡ್ ಮೂಲಕ ಹಣದ ಪಾವತಿಯನ್ನೂ ಮಾಡಬಹುದು. ಇದು ನಿರಂತರವಾಗಿ ನಡೆಯುತ್ತಿದೆ,” ಎಂದು ಮೆಹ್ತಾ ವಾದ ಮಂಡಿಸಿದರು.
ನ್ಯಾಯಾಲಯವು ಈ ವಿಷಯದ ಮುಂದಿನ ವಿಚಾರಣೆಯನ್ನು ಗುರುವಾರಕ್ಕೆ ನಿಗದಿಪಡಿಸಿತಲ್ಲದೆ, ಕೇಂದ್ರ ಸರ್ಕಾರಕ್ಕೆ ನೋಟಿಸ್ ಜಾರಿ ಮಾಡಿತು.
ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ನೀಡಿದ ಶಿಫಾರಸುಗಳ ಆಧಾರದ ಮೇಲೆ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು (MeitY), ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000ರ ಸೆಕ್ಷನ್ 69A ಅಡಿಯಲ್ಲಿ ಜೂನ್ 16 ರಂದು ಆದೇಶ ಹೊರಡಿಸಿತ್ತು. ಇದರನ್ವಯ ಜೂನ್ 22 ರವರೆಗೆ ಭಾರತದಲ್ಲಿ ಟೆಲಿಗ್ರಾಮ್ ಬಳಕೆಯನ್ನು ನಿರ್ಬಂಧಿಸಲಾಗಿದ್ದು, ಜೂನ್ 30 ರವರೆಗೆ ಪ್ಲಾಟ್ಫಾರ್ಮ್ನ ‘ಮೆಸೇಜ್ ಎಡಿಟಿಂಗ್’ (ಸಂದೇಶ ತಿದ್ದುಪಡಿ) ವೈಶಿಷ್ಟ್ಯವನ್ನು ಸಹ ನಿಷ್ಕ್ರಿಯಗೊಳಿಸಲಾಗಿದೆ ಎಂದು NTA ಹೇಳಿಕೆಯಲ್ಲಿ ತಿಳಿಸಿದೆ.
ಟೆಲಿಗ್ರಾಮ್ ಪರ ಹಾಜರಾದ ವಕೀಲರಾದ ಮಾಧವ್ ಖೋಸ್ಲಾ, ಅಭಿ ಉದಯ್ ಸಿಂಗ್ ಗೌತಮ್ ಮತ್ತು ರೋಶ್ನಿ ಓಜಾ ಅವರು, ಸರ್ಕಾರದ ಆದೇಶವು ಅನಿಯಂತ್ರಿತವಾಗಿದೆ ಮತ್ತು “ಯಾವುದೇ ಯೋಚನೆ ಇಲ್ಲದೆ” ಹೊರಡಿಸಲಾಗಿದೆ ಎಂದು ವಾದಿಸಿದರು.
”ತಪ್ಪು ಎಸಗುವ ಬಳಕೆದಾರರ ವಿರುದ್ಧ ನಾವು ತೆಗೆದುಕೊಂಡ ಕ್ರಮಗಳ ಬಗ್ಗೆ ಕೇಂದ್ರ ಸರ್ಕಾರವು ಎಲ್ಲೂ ಉಲ್ಲೇಖಿಸಿಲ್ಲ. ನಾವು ಏನನ್ನೂ ಮಾಡಿಲ್ಲ ಎಂದು ಕೇಂದ್ರದ ನಿಯೋಜಿತ ಅಧಿಕಾರಿಯೊಬ್ಬರು ಹೇಳುತ್ತಿದ್ದಾರೆ. ಆದರೆ ಕಾನೂನುಬಾಹಿರ ಚಾನೆಲ್ಗಳು ಅಥವಾ ಗ್ರೂಪ್ಗಳನ್ನು ನಿರ್ಬಂಧಿಸಲು ನಮ್ಮ ಪ್ಲಾಟ್ಫಾರ್ಮ್ ಸಕ್ರಿಯವಾದ ಕ್ರಮಗಳನ್ನು ಕೈಗೊಂಡಿದೆ,” ಎಂದು ವಕೀಲರು ನ್ಯಾಯಾಲಯಕ್ಕೆ ತಿಳಿಸಿದರು.
ಈ ನಿರ್ಬಂಧವು ಪ್ಲಾಟ್ಫಾರ್ಮ್ ಬಳಸುವ 15 ಕೋಟಿಗೂ (150 ಮಿಲಿಯನ್) ಹೆಚ್ಚು ಬಳಕೆದಾರರು ಮತ್ತು ವ್ಯವಹಾರಗಳ ಮೇಲೆ ಪರಿಣಾಮ ಬೀರುತ್ತದೆ ಹಾಗೂ ಇದು ಮುಕ್ತ ವಾಕ್ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯದ ಮೇಲಿನ ಅಸಮಾನವಾದ ಕಡಿತವಾಗಿದೆ ಎಂದು ಅವರು ವಾದಿಸಿದರು.
