ನವದೆಹಲಿ: ಹೃದಯಕ್ಕೆ ರಕ್ತವನ್ನು ಪೂರೈಸುವ ಅಪಧಮನಿಗಳಲ್ಲಿ ಹಠಾತ್ ತಡೆ ಉಂಟಾದಾಗ ಹೃದಯಾಘಾತ ಸಂಭವಿಸುತ್ತದೆ. ಇದರಿಂದ ಹೃದಯದ ಸ್ನಾಯುಗಳಿಗೆ ಆಮ್ಲಜನಕ ಸಿಗದೆ, ಅಂಗಾಂಶಗಳಿಗೆ ಗಂಭೀರ ಹಾನಿಯಾಗುತ್ತದೆ. ಸಾಮಾನ್ಯವಾಗಿ ಹೃದಯಕ್ಕೆ ರಕ್ತ ಪೂರೈಸುವ ಅಪಧಮನಿಗಳಲ್ಲಿನ ಕೊಬ್ಬಿನ ನಿಕ್ಷೇಪಗಳು (fat deposits) ಇದಕ್ಕೆ ಮುಖ್ಯ ಕಾರಣವಾಗಿದೆ.
ಹೃದಯಾಘಾತದ ಆರಂಭಿಕ ಎಚ್ಚರಿಕೆಗಳು:
ಮೆಡಿಕೋವರ್ ಆಸ್ಪತ್ರೆಯ ಹಿರಿಯ ಹೃದ್ರೋಗ ತಜ್ಞರಾದ ಡಾ. ಕೆ. ಸಾಕೆತ್ ಅವರು ಹೃದಯದ ಸಮಸ್ಯೆಯನ್ನು ಸೂಚಿಸುವ ಕೆಲವು ಪ್ರಮುಖ ಲಕ್ಷಣಗಳನ್ನು ವಿವರಿಸಿದ್ದಾರೆ:
ಅಸಹಜ ಆಯಾಸ: ಯಾವುದೇ ಕಾರಣವಿಲ್ಲದೆ ನೀವು ನಿರಂತರವಾಗಿ ದೌರ್ಬಲ್ಯ ಮತ್ತು ಆಯಾಸವನ್ನು ಅನುಭವಿಸುತ್ತಿದ್ದರೆ, ಅದು ಎಚ್ಚರಿಕೆಯ ಸಂಕೇತ. ಹೃದಯವು ರಕ್ತವನ್ನು ಪರಿಣಾಮಕಾರಿಯಾಗಿ ಪಂಪ್ ಮಾಡಲು ಸಾಧ್ಯವಾಗದಿದ್ದಾಗ ದೇಹವು ಬೇಗನೆ ಸುಸ್ತಾಗುತ್ತದೆ.
ಎದೆಯಲ್ಲಿ ಒತ್ತಡ ಅಥವಾ ನೋವು: ಎದೆಯ ಭಾಗದಲ್ಲಿ ಭಾರ ಎನಿಸುವುದು, ಬಿಗಿದಂತಾಗುವುದು ಅಥವಾ ಅಸ್ವಸ್ಥತೆ ಅನುಭವಿಸುವುದು ಹೃದಯಾಘಾತದ ಅತ್ಯಂತ ಸಾಮಾನ್ಯ ಲಕ್ಷಣವಾಗಿದೆ.
ಉಸಿರಾಟದ ತೊಂದರೆ: ಸಣ್ಣ ನಡಿಗೆ ಅಥವಾ ದೈನಂದಿನ ಕೆಲಸಗಳನ್ನು ಮಾಡುವಾಗಲೂ ಉಸಿರುಗಟ್ಟಿದಂತಾಗುತ್ತಿದ್ದರೆ, ನಿಮ್ಮ ಹೃದಯ ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂದರ್ಥ.
ಹಠಾತ್ ಬೆವರುವುದು: ಯಾವುದೇ ಕಾರಣವಿಲ್ಲದೆ ಅಥವಾ ತಂಪಾದ ವಾತಾವರಣದಲ್ಲೂ ಮೈಯೆಲ್ಲಾ ತಣ್ಣನೆಯ ಬೆವರು ಬರುತ್ತಿದ್ದರೆ, ಅದು ಹೃದಯದ ಸಮಸ್ಯೆಯ ಸಂಕೇತವಾಗಿರಬಹುದು.
ಅನಿಯಮಿತ ಹೃದಯ ಬಡಿತ: ಹೃದಯವು ಇದ್ದಕ್ಕಿದ್ದಂತೆ ವೇಗವಾಗಿ ಬಡಿದುಕೊಳ್ಳುವುದು ಅಥವಾ ಬಡಿತ ತಪ್ಪಿದಂತೆ (skipping a beat) ಭಾಸವಾಗುವುದು. ಇದು ಪದೇ ಪದೇ ಸಂಭವಿಸಿದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಬೇಕು.
ಗ್ಯಾಸ್ ಅಥವಾ ಅಜೀರ್ಣದ ಲಕ್ಷಣಗಳು: ಗ್ಯಾಸ್ಟ್ರಿಕ್ ಅಥವಾ ಅಜೀರ್ಣ ಎಂದು ನೀವು ಕಡೆಗಣಿಸುವ ಸಮಸ್ಯೆಗಳು ಕೆಲವೊಮ್ಮೆ ಹೃದಯಾಘಾತದ ಲಕ್ಷಣಗಳಾಗಿರಬಹುದು. ಇದನ್ನು ನಿರ್ಲಕ್ಷಿಸಬೇಡಿ.
ಜೀವನಶೈಲಿ ಮತ್ತು ಮುಂಜಾಗ್ರತೆ:
ದೀರ್ಘಕಾಲ ಕುಳಿತು ಕೆಲಸ ಮಾಡುವುದು, ದೈಹಿಕ ಚಟುವಟಿಕೆಯ ಕೊರತೆ ಮತ್ತು ವಾಹನಗಳ ಮೇಲಿನ ಅತಿಯಾದ ಅವಲಂಬನೆಯು ಹೃದಯ ಕಾಯಿಲೆಯ ಅಪಾಯವನ್ನು ಹೆಚ್ಚಿಸುತ್ತಿದೆ. ಹಿಂದೆ ವಯಸ್ಸಾದವರಲ್ಲಿ ಮಾತ್ರ ಕಾಣುತ್ತಿದ್ದ ಮಧುಮೇಹ ಮತ್ತು ಅಧಿಕ ರಕ್ತದೊತ್ತಡದಂತಹ ಸಮಸ್ಯೆಗಳು ಈಗ ಯುವಕರಲ್ಲೂ ಸಾಮಾನ್ಯವಾಗಿದೆ.
ವೈದ್ಯರ ಸಲಹೆ: ನಿಮಗೆ ಎದೆಯಲ್ಲಿ ಅಸ್ವಸ್ಥತೆ, ಉಸಿರಾಟದ ತೊಂದರೆ ಅಥವಾ ಗ್ಯಾಸ್ಟ್ರಿಕ್ನಂತಹ ಸಮಸ್ಯೆಗಳು ಕಂಡುಬಂದರೆ ಅಜಾಗರೂಕರಾಗಬೇಡಿ. ತಕ್ಷಣವೇ ಇಸಿಜಿ (ECG) ಅಥವಾ ಎಕೋಕಾರ್ಡಿಯೋಗ್ರಾಮ್ ಪರೀಕ್ಷೆ ಮಾಡಿಸಿಕೊಳ್ಳಿ. ಆರಂಭಿಕ ಹಂತದಲ್ಲಿ ಸಮಸ್ಯೆಗಳನ್ನು ಪತ್ತೆ ಹಚ್ಚುವುದು ನಿಮ್ಮ ಪ್ರಾಣವನ್ನು ಉಳಿಸಬಹುದು ಮತ್ತು ಸಂಭವಿಸಬಹುದಾದ ದೊಡ್ಡ ಅಪಾಯಗಳನ್ನು ತಡೆಯಬಹುದು.
