ಸಿಂಗಾಪುರ್: ಭಾರತದ ಹೆಮ್ಮೆಯ ಬ್ಯಾಡ್ಮಿಂಟನ್ ತಾರೆಗಳಾದ ಸಾತ್ವಿಕ್ ಸಾಯಿರಾಜ್ ರಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಜೋಡಿಯು ಸಿಂಗಾಪುರ್ ಓಪನ್ 2026 ಟೂರ್ನಿಯಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ. ಭಾನುವಾರ (ಮೇ 31) ನಡೆದ ಪುರುಷರ ಡಬಲ್ಸ್ನ ರೋಮಾಂಚಕ ಫೈನಲ್ ಪಂದ್ಯದಲ್ಲಿ ಇಂಡೋನೇಷ್ಯಾದ ಫಜರ್ ಅಲ್ಫಿಯಾನ್ ಮತ್ತು ಮುಹಮ್ಮದ್ ಶೋಹಿಬುಲ್ ಫಿಕ್ರಿ ಜೋಡಿಯನ್ನು ಮಣಿಸಿದ ಭಾರತದ ಜೋಡಿ ಐತಿಹಾಸಿಕ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು.
ಸಿಂಗಾಪುರ್ ಇನ್ಡೋರ್ ಸ್ಟೇಡಿಯಂನಲ್ಲಿ ನಡೆದ ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಜಯಗಳಿಸುವ ಮೂಲಕ, ವಿಶ್ವ ಶ್ರೇಯಾಂಕದಲ್ಲಿ 4ನೇ ಸ್ಥಾನದಲ್ಲಿರುವ ಸಾತ್ವಿಕ್-ಚಿರಾಗ್ ಜೋಡಿಯು ಈ ಪ್ರತಿಷ್ಠಿತ ಟೂರ್ನಿಯ ಇತಿಹಾಸದಲ್ಲೇ ಪುರುಷರ ಡಬಲ್ಸ್ ಪ್ರಶಸ್ತಿ ಗೆದ್ದ ಮೊದಲ ಭಾರತೀಯ ಜೋಡಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಯಿತು.
ಮೂರು ಸೆಟ್ಗಳ ರೋಮಾಂಚಕ ಹೋರಾಟ
ಫೈನಲ್ ಪಂದ್ಯವು ತೀವ್ರ ಕುತೂಹಲದಿಂದ ಕೂಡಿತ್ತು. ಪಂದ್ಯದ ಆರಂಭದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಇಂಡೋನೇಷ್ಯಾ ಜೋಡಿಯು ಮೊದಲ ಸೆಟ್ ಅನ್ನು 21-18 ಅಂತರದಿಂದ ಗೆದ್ದು ಮುನ್ನಡೆ ಸಾಧಿಸಿತು. ಆದರೆ, ದೃತಿಗೆಡದ ಭಾರತದ ಸ್ಟಾರ್ ಆಟಗಾರರು ಎರಡನೇ ಸೆಟ್ನಲ್ಲಿ ಭರ್ಜರಿ ಕಮ್ಬ್ಯಾಕ್ ಮಾಡಿದರು. ಅದ್ಭುತ ಆಟ ಪ್ರದರ್ಶಿಸಿದ ಸಾತ್ವಿಕ್-ಚಿರಾಗ್ 21-15 ರಿಂದ ಎರಡನೇ ಸೆಟ್ ಕೈವಶ ಮಾಡಿಕೊಂಡು ಪಂದ್ಯವನ್ನು ಸಮಬಲಕ್ಕೆ ತಂದರು.
ಇನ್ನು ಪಂದ್ಯದ ಜಯವನ್ನು ನಿರ್ಧರಿಸುವ ಅಂತಿಮ ಹಾಗೂ ನಿರ್ಣಾಯಕ ಮೂರನೇ ಸೆಟ್ನಲ್ಲಿ ಆರಂಭದಲ್ಲೇ 11-5 ರ ಭರ್ಜರಿ ಮುನ್ನಡೆ ಪಡೆದ ಭಾರತೀಯ ಜೋಡಿ, ಆ ಬಳಿಕ ಎದುರಾಳಿಗಳಿಗೆ ಕಠಿಣ ಪೈಪೋಟಿ ನೀಡುತ್ತಾ ತಮ್ಮ ನರಗಳ ಮೇಲಿನ ಹಿಡಿತ ಸಾಧಿಸಿ, ಅಂತಿಮವಾಗಿ 21-14 ರಿಂದ ಸೆಟ್ ಹಾಗೂ ಪಂದ್ಯವನ್ನು ಗೆದ್ದು ಸಂಭ್ರಮಿಸಿದರು. (ಅಂತಿಮ ಸ್ಕೋರ್: 18-21, 21-15, 21-14)
ಥಾಯ್ಲೆಂಡ್ ಓಪನ್ ಸೋಲಿಗೆ ಸಿಕ್ಕ ಮಧುರ ಜಯ
ಇದೇ ತಿಂಗಳ ಆರಂಭದಲ್ಲಿ ನಡೆದಿದ್ದ ಥಾಯ್ಲೆಂಡ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಫೈನಲ್ನಲ್ಲಿ ಬ್ಯಾಂಕಾಕ್ನ ನಿಮ್ಮಿಬುತ್ರ್ ಸ್ಟೇಡಿಯಂನಲ್ಲಿ ಇಂಡೋನೇಷ್ಯಾದ ಲಿಯೋ ರೋಲಿ ಕರ್ನಾಂಡೋ ಮತ್ತು ಡೇನಿಯಲ್ ಮಾರ್ಥಿನಿ ಜೋಡಿ ಎದುರು (21-12, 25-23) ನೇರ ಸೆಟ್ಗಳಲ್ಲಿ ಸೋತು ರನ್ನರ್-ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟಿದ್ದ ಸಾತ್ವಿಕ್-ಚಿರಾಗ್ ಜೋಡಿಗೆ ಈ ಗೆಲುವು ಅತ್ಯಂತ ವಿಶೇಷ ಮತ್ತು ಮಧುರವೆನಿಸಿದೆ.
ವಿಶ್ವ ಚಾಂಪಿಯನ್ನರ ಅಜೇಯ ಓಟಕ್ಕೆ ಬ್ರೇಕ್ ಹಾಕಿದ್ದ ಭಾರತೀಯರು!
ಈ ಟೂರ್ನಿಯ ಫೈನಲ್ ಹಂತ ತಲುಪುವ ಮುನ್ನ ಸಾತ್ವಿಕ್-ಚಿರಾಗ್ ಜೋಡಿಯು ಕ್ವಾರ್ಟರ್ ಫೈನಲ್ನಲ್ಲಿ ಮಾತ್ರ ಕೇವಲ ಒಂದು ಸೆಟ್ ಅನ್ನು ಬಿಟ್ಟುಕೊಟ್ಟಿತ್ತು. ವಿಶೇಷವಾಗಿ ಸೆಮಿಫೈನಲ್ ಪಂದ್ಯದಲ್ಲಿ ವಿಶ್ವ ಚಾಂಪಿಯನ್ಸ್ ಆದ ದಕ್ಷಿಣ ಕೊರಿಯಾದ ಕಿಮ್ ವಾನ್-ಹೋ ಮತ್ತು ಸಿಯೋ ಸೆಯುಂಗ್-ಜೇ ಜೋಡಿಯನ್ನು ನೇರ ಸೆಟ್ಗಳಲ್ಲಿ (21-19, 21-18) ಮಣಿಸುವ ಮೂಲಕ ಭಾರತದ ಜೋಡಿ ಇತಿಹಾಸ ನಿರ್ಮಿಸಿತ್ತು. ಈ ಸೋಲಿನೊಂದಿಗೆ ದಕ್ಷಿಣ ಕೊರಿಯಾ ಜೋಡಿಯ 34 ಪಂದ್ಯಗಳ ಸತತ ಅಜೇಯ ಓಟಕ್ಕೆ ಭಾರತೀಯರು ಬ್ರೇಕ್ ಹಾಕಿದ್ದರು.
ಚಾಂಪಿಯನ್ ಸಾತ್ವಿಕ್-ಚಿರಾಗ್ ಜೋಡಿಯ ‘ರೋಡ್ ಟು ಸಿಂಗಾಪುರ್ ಓಪನ್ 2026’:
- ರೌಂಡ್ ಆಫ್ 32: ಲೀ ಝೆ-ಹ್ಯುಯಿ ಮತ್ತು ಯಾಂಗ್ ಪೋ-ಹಸುವಾನ್ (ಚೈನೀಸ್ ತೈಪೆ) ವಿರುದ್ಧ 21-16, 21-13 ರಲ್ಲಿ ಜಯ.
- ರೌಂಡ್ ಆಫ್ 16: ಹಿರೋಕಿ ಮಿಡೋರಿ ಕಾವಾ ಮತ್ತು ಕ್ಯೋಹೇಯ್ ಯಾಮಾಶಿತಾ (ಜಪಾನ್) ವಿರುದ್ಧ 21-18, 21-14 ರಲ್ಲಿ ಜಯ.
- ಕ್ವಾರ್ಟರ್ ಫೈನಲ್: ಕಾಂಗ್ ಖೈ ಕ್ಸಿಂಗ್ ಮತ್ತು ಆರನ್ ತೈ (ಮಲೇಷ್ಯಾ) ವಿರುದ್ಧ 19-21, 21-17, 21-13 ರಲ್ಲಿ ಜಯ.
- ಸೆಮಿಫೈನಲ್: ಕಿಮ್ ವಾನ್ ಹೋ ಮತ್ತು ಸಿಯೋ ಸೆಯುಂಗ್ ಜೇ (ದಕ್ಷಿಣ ಕೊರಿಯಾ) ವಿರುದ್ಧ 21-19, 21-18 ರಲ್ಲಿ ಜಯ.
- ಫೈನಲ್: ಫಜರ್ ಅಲ್ಫಿಯಾನ್ ಮತ್ತು ಮುಹಮ್ಮದ್ ಶೋಹಿಬುಲ್ ಫಿಕ್ರಿ (ಇಂಡೋನೇಷ್ಯಾ) ವಿರುದ್ಧ 18-21, 21-15, 21-14 ರಲ್ಲಿ ಭರ್ಜರಿ ಜಯ.
