ವಾಷಿಂಗ್ಟನ್: ಕಳೆದ ತಿಂಗಳು ನೈಋತ್ಯ ಇರಾನ್ ಮೇಲೆ ಅಮೆರಿಕದ ಎಫ್-15 (F-15E Strike Eagle) ಯುದ್ಧವಿಮಾನವನ್ನು ಹೊಡೆದುರುಳಿಸಲು ಚೀನಾ ನಿರ್ಮಿತ ‘ಮ್ಯಾನ್-ಪೋರ್ಟಬಲ್ ಏರ್-ಡಿಫೆನ್ಸ್’ (MANPADS) ಕ್ಷಿಪಣಿಯನ್ನು ಬಳಸಲಾಗಿದೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ. ದಶಕಗಳ ನಂತರ ಶತ್ರುಗಳ ದಾಳಿಯಿಂದ ಅಮೆರಿಕದ ಯುದ್ಧವಿಮಾನವೊಂದು ಪತನಗೊಂಡಿರುವ ಮೊದಲ ಘಟನೆ ಇದಾಗಿದೆ.
ಸುಮಾರು 7 ಅಡಿ ಉದ್ದ ಮತ್ತು 40 ಪೌಂಡ್ ತೂಕದ ಈ ‘ಮ್ಯಾನ್-ಪ್ಯಾಡ್’ ಕ್ಷಿಪಣಿಗಳು ಕಡಿಮೆ ಎತ್ತರದಲ್ಲಿ ಹಾರುವ ವಿಮಾನಗಳಿಗೆ ಅತ್ಯಂತ ಅಪಾಯಕಾರಿ ಮತ್ತು ಅಗ್ಗದ ಶಸ್ತ್ರಾಸ್ತ್ರಗಳಾಗಿವೆ. ಈ ಕ್ಷಿಪಣಿಯನ್ನು ಇತ್ತೀಚೆಗೆ ಪೂರೈಸಲಾಗಿದೆಯೇ ಅಥವಾ ವರ್ಷಗಳ ಹಿಂದೆಯೇ ನೀಡಲಾಗಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಚೀನಾದ ಪಾತ್ರ: ಸಂಘರ್ಷದ ಆರಂಭಿಕ ದಿನಗಳಲ್ಲಿ, ರಹಸ್ಯವಾಗಿ ಸಂಚರಿಸುವ (stealth) ವಿಮಾನಗಳನ್ನು ಪತ್ತೆಹಚ್ಚುವ ದೀರ್ಘ-ವ್ಯಾಪ್ತಿಯ ಮುನ್ನೆಚ್ಚರಿಕೆ ರೇಡಾರ್ಗಳನ್ನು ಚೀನಾ ಇರಾನ್ಗೆ ಒದಗಿಸಿರಬಹುದು ಎಂದು ಅಮೆರಿಕದ ಮೂಲಗಳು ತಿಳಿಸಿವೆ. ಚೀನಾ ಇರಾನ್ಗೆ ಯಾವುದೇ ಮಿಲಿಟರಿ ಉಪಕರಣಗಳನ್ನು ಕಳುಹಿಸುವುದಿಲ್ಲ ಎಂದು ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಭರವಸೆ ನೀಡಿದ್ದರೂ, ಈ ಬೆಳವಣಿಗೆಗಳು ಅಮೆರಿಕ ಮತ್ತು ಚೀನಾ ಸಂಬಂಧದ ಮೇಲೆ ಭಾರಿ ಒತ್ತಡ ಹೇರಿವೆ.
ವಿಮಾನ ಪತನವಾದಾಗ ಅದರಲ್ಲಿದ್ದ ಇಬ್ಬರು ಸಿಬ್ಬಂದಿ ಸುರಕ್ಷಿತವಾಗಿ ಹೊರಬಂದಿದ್ದರು (eject). ಪೈಲಟ್ ಅನ್ನು ಏಳು ಗಂಟೆಯೊಳಗೆ ರಕ್ಷಿಸಲಾಯಿತು, ಆದರೆ ಆಯುಧ ವ್ಯವಸ್ಥೆಯ ಅಧಿಕಾರಿಯು ಜಗ್ರೋಸ್ ಪರ್ವತದ ತಪ್ಪಲಿನಲ್ಲಿ ಅಡಗಿಕೊಂಡಿದ್ದರಿಂದ, ಅವರನ್ನು ರಕ್ಷಿಸಲು ಎರಡು ದಿನಗಳ ಕಾಲ ಕಠಿಣ ಕಾರ್ಯಾಚರಣೆ ನಡೆಸಬೇಕಾಯಿತು.
