ಬೆಂಗಳೂರು: ರಾಜ್ಯ ರಾಜಕಾರಣದಲ್ಲಿ ಭಾರಿ ಸಂಚಲನ ಸೃಷ್ಟಿಯಾಗಿದ್ದು, ಮುಖ್ಯಮಂತ್ರಿ ಸ್ಥಾನಕ್ಕೆ ಸಿದ್ದರಾಮಯ್ಯ ಅವರು ನಿನ್ನೆ ಹಠಾತ್ ರಾಜೀನಾಮೆ ನೀಡಿದ್ದಾರೆ. ಇದರ ಬೆನ್ನಲ್ಲೇ ತೆರವಾಗಿರುವ ಸಿಎಂ ಗಾದಿಗೆ ಕೆಪಿಸಿಸಿ ಅಧ್ಯಕ್ಷ ಹಾಗೂ ಹಾಲಿ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ಹೆಸರು ಅಂತಿಮಗೊಂಡಿದೆ. ನಿನ್ನೆ ನಡೆದ ಮಹತ್ವದ ‘ಬ್ರೇಕ್ ಫಾಸ್ಟ್ ಮೀಟಿಂಗ್’ನಲ್ಲಿ ಸಿದ್ದರಾಮಯ್ಯ ಅವರೇ ಖುದ್ದಾಗಿ ಕರ್ನಾಟಕದ ಮುಂದಿನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಎಂದು ಘೋಷಣೆ ಮಾಡುವ ಮೂಲಕ ದಶಕಗಳ ರಾಜಕೀಯ ಹಗ್ಗಜಗ್ಗಾಟಕ್ಕೆ ತೆರೆ ಎಳೆದಿದ್ದಾರೆ.
ಸಿದ್ದರಾಮಯ್ಯ ಅವರ ಅಧಿಕೃತ ಘೋಷಣೆ ಹೊರಬೀಳುತ್ತಿದ್ದಂತೆ ಇತ್ತ ಡಿ.ಕೆ. ಶಿವಕುಮಾರ್ ಅವರ ಪಡಸಾಲೆಯಲ್ಲಿ ಸಂಭ್ರಮ ಮನೆಮಾಡಿದ್ದು, ಪ್ರಮಾಣವಚನ ಸ್ವೀಕಾರ ಕಾರ್ಯಕ್ರಮಕ್ಕೆ ಭರದ ಸಿದ್ಧತೆಗಳು ಆರಂಭವಾಗಿವೆ. ರಾಜ್ಯದ ಚುಕ್ಕಾಣಿ ಹಿಡಿಯಲು ಸಜ್ಜಾಗಿರುವ ಕನಕಪುರ ಬಂಡೆ, ತಮ್ಮ ರಾಜಕೀಯ ಜೀವನದ ಅತ್ಯುನ್ನತ ಕ್ಷಣವನ್ನು ಅತ್ಯಂತ ವೈಭವ ಹಾಗೂ ಶಾಸ್ತ್ರೋಕ್ತವಾಗಿ ನೆರವೇರಿಸಲು ತೀರ್ಮಾನಿಸಿದ್ದಾರೆ. ರಾಜಭವನ ಹಾಗೂ ಕೆಪಿಸಿಸಿ ಕಚೇರಿಗಳಲ್ಲಿ ಈಗಾಗಲೇ ಪೂರ್ವಭಾವಿ ಸಿದ್ಧತೆಗಳು ಚುರುಕುಗೊಂಡಿವೆ.
ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲು ಸಿದ್ಧತೆ ನಡೆಸುತ್ತಿರುವ ಡಿ.ಕೆ. ಶಿವಕುಮಾರ್, ಮುಹೂರ್ತ ನಿಗದಿಗಾಗಿ ತಮ್ಮ ಆಪ್ತ ಹಾಗೂ ಪ್ರಸಿದ್ಧ ಜ್ಯೋತಿಷಿ ದ್ವಾರಕನಾಥ್ ಅವರ ಮೊರೆ ಹೋಗಿದ್ದಾರೆ. ಪರಮ ದೈವಭಕ್ತರಾಗಿರುವ ಶಿವಕುಮಾರ್, ಯಾವುದೇ ಶುಭ ಕಾರ್ಯವನ್ನು ಸೂಕ್ತ ಮುಹೂರ್ತವಿಲ್ಲದೆ ಮಾಡುವುದಿಲ್ಲ. ಹೀಗಾಗಿ, ದ್ವಾರಕನಾಥ್ ಅವರ ಜೊತೆ ಸುದೀರ್ಘ ಮಾತುಕತೆ ನಡೆಸಿರುವ ಅವರು, ತಮಗೆ ಮುಖ್ಯಮಂತ್ರಿ ಗಾದಿ ದೀರ್ಘಕಾಲ ಸುಭದ್ರವಾಗಿರಲು ಮತ್ತು ಯಾವುದೇ ವಿಘ್ನಗಳು ಎದುರಾಗದಿರಲು ಸೂಕ್ತವಾದ ಶುಭ ಮುಹೂರ್ತವನ್ನು ನಿಗದಿಪಡಿಸಿಕೊಡುವಂತೆ ಮನವಿ ಮಾಡಿದ್ದಾರೆ.
ಬಲ್ಲ ಮೂಲಗಳ ಮಾಹಿತಿ ಪ್ರಕಾರ, ಪ್ರಮಾಣ ವಚನ ಸ್ವೀಕಾರಕ್ಕಾಗಿ ಕನಿಷ್ಠ ಮೂರು ಬೇರೆ ಬೇರೆ ದಿನಾಂಕಗಳು ಹಾಗೂ ಸಮಯವನ್ನು (ಮುಹೂರ್ತ) ನೀಡುವಂತೆ ಜ್ಯೋತಿಷಿಗಳಿಗೆ ಡಿ.ಕೆ. ಶಿವಕುಮಾರ್ ಕೋರಿದ್ದಾರೆ ಎನ್ನಲಾಗಿದೆ. ಹೈಕಮಾಂಡ್ ನಾಯಕರ ಲಭ್ಯತೆ, ಗ್ರಹಗತಿಗಳ ಸ್ಥಾನ ಹಾಗೂ ರಾಹುಕಾಲ-ಗುಳಿಕಕಾಲಗಳನ್ನು ಲೆಕ್ಕ ಹಾಕಿ ಸೂಕ್ತ ದಿನಾಂಕವನ್ನು ಅಂತಿಮಗೊಳಿಸಲು ಈ ಪ್ಲಾನ್ ಮಾಡಲಾಗಿದೆ. ಜ್ಯೋತಿಷಿಗಳು ನೀಡುವ ಮೂರು ಆಯ್ಕೆಗಳಲ್ಲಿ ಅತ್ಯಂತ ಶ್ರೇಷ್ಠವಾದ ಒಂದು ಮುಹೂರ್ತವನ್ನು ಆಯ್ಕೆ ಮಾಡಿ, ರಾಜಭವನಕ್ಕೆ ದಿನಾಂಕವನ್ನು ಅಧಿಕೃತವಾಗಿ ರವಾನಿಸಲಾಗುವುದು ಎಂದು ತಿಳಿದುಬಂದಿದೆ.
