ರೋಮ್:ಪ್ರಧಾನಿ ನರೇಂದ್ರ ಮೋದಿ ಮತ್ತು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರ ನಡುವಿನ ಆತ್ಮೀಯ ಸ್ನೇಹದ ‘ಮೆಲೋಡಿ’ (Melodi) ಕ್ರೇಜ್ ಜಾಗತಿಕ ಮಟ್ಟದಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ. ಇಟಲಿ ಪ್ರವಾಸದಲ್ಲಿರುವ ಪ್ರಧಾನಿ ಮೋದಿ ಅವರು ಮೆಲೋನಿ ಅವರಿಗೆ ಭಾರತದ ಪ್ರಸಿದ್ಧ ‘ಮೆಲೋಡಿ’ (Melody) ಚಾಕೊಲೇಟ್ ಪ್ಯಾಕೆಟ್ ಅನ್ನು ಉಡುಗೊರೆಯಾಗಿ ನೀಡಿದ ವಿಡಿಯೋ, ಸಾಮಾಜಿಕ ಜಾಲತಾಣಗಳಲ್ಲಿ ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಬರೋಬ್ಬರಿ 100 ಮಿಲಿಯನ್ (10 ಕೋಟಿ) ವೀಕ್ಷಣೆಗಳನ್ನು (Views) ದಾಟುವ ಮೂಲಕ ಇಂಟರ್ನೆಟ್ನಲ್ಲಿ ಧೂಳೆಬ್ಬಿಸಿದೆ.
ದಾಖಲೆ ಅವಧಿಯಲ್ಲಿ 100 ಮಿಲಿಯನ್: ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡ ಈ ವಿಡಿಯೋ, ಕೇವಲ 6 ಗಂಟೆಗಳ ಅವಧಿಯಲ್ಲಿ 100 ಮಿಲಿಯನ್ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಇದು ವಿಶ್ವದ ಪ್ರಮುಖ ನಾಯಕರ ವಿಡಿಯೋಗಳ ಪೈಕಿ ಅತ್ಯಂತ ವೇಗವಾಗಿ ಈ ಮೈಲಿಗಲ್ಲು ತಲುಪಿದ ವಿಶಿಷ್ಟ ದಾಖಲೆಯಾಗಿದೆ.
ವೈರಲ್ ವಿಡಿಯೋದಲ್ಲಿ ಇಟಲಿ ಪ್ರಧಾನಿ ಮೆಲೋನಿ ಅವರು, “ಪ್ರಧಾನಿ ಮೋದಿ ನಮಗೊಂದು ಅತ್ಯುತ್ತಮವಾದ ಉಡುಗೊರೆ ತಂದಿದ್ದಾರೆ — ಮೆಲೋಡಿ,” ಎಂದು ಹೇಳುತ್ತಾ ನಗುತ್ತಾರೆ. ಆಗ ಪ್ರಧಾನಿ ಮೋದಿ ಕೂಡ “ಮೆಲೋಡಿ” ಎನ್ನುತ್ತಾ ನಸುನಗುತ್ತಾರೆ. ಕೊನೆಯಲ್ಲಿ ಮೆಲೋನಿ ಅವರು “ಥ್ಯಾಂಕ್ ಯೂ ಫಾರ್ ದಿ ಗಿಫ್ಟ್” ಎಂದು ಬರೆದುಕೊಂಡಿದ್ದಾರೆ.
ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಗೂಗಲ್ ಮತ್ತು ಎಕ್ಸ್ (ಟ್ವಿಟರ್) ನಲ್ಲಿ ‘ಪಾರ್ಲೆ’ ಮತ್ತು ‘ಮೆಲೋಡಿ’ ಎಂಬ ಪದಗಳು ಜಾಗತಿಕ ಮಟ್ಟದಲ್ಲಿ ಅತಿ ಹೆಚ್ಚು ಸರ್ಚ್ ಮಾಡಿದ ಟ್ರೆಂಡಿಂಗ್ ವಿಷಯಗಳಾಗಿ ಹೊರಹೊಮ್ಮಿವೆ.
