ಬೆಂಗಳೂರು: ರಾಜ್ಯದಲ್ಲಿ ತೀವ್ರ ಸಂಚಲನ ಸೃಷ್ಟಿಸಿರುವ ಬಹುಕೋಟಿ ಬಿಟ್ಕಾಯಿನ್ ಹಗರಣದ ತನಿಖೆಯನ್ನು ಚುರುಕುಗೊಳಿಸಿರುವ ಜಾರಿ ನಿರ್ದೇಶನಾಲಯದ (ED) ಅಧಿಕಾರಿಗಳು, ಇದೀಗ ಬೆಂಗಳೂರಿನಲ್ಲಿ ಮಹತ್ವದ ಕಾರ್ಯಾಚರಣೆಯೊಂದನ್ನು ನಡೆಸಿದ್ದಾರೆ. ನಗರದ ಕಾಟನ್ಪೇಟೆಯಲ್ಲಿರುವ ಲಾಡ್ಜ್ ಒಂದರ ಮೇಲೆ ದಿಢೀರ್ ದಾಳಿ ನಡೆಸಿರುವ ಅಧಿಕಾರಿಗಳು, ಪ್ರಕರಣಕ್ಕೆ ಸಂಬಂಧಿಸಿದ ಪ್ರಮುಖ ಸಾಕ್ಷ್ಯಗಳನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.
ಲಾಡ್ಜ್ನಲ್ಲಿ ಅಡಗಿಸಿಟ್ಟಿದ್ದ ಎಲೆಕ್ಟ್ರಾನಿಕ್ ಡಿವೈಸ್ ಜಪ್ತಿ ಇಡಿ ಅಧಿಕಾರಿಗಳು ನಡೆಸಿದ ಈ ಮಿಂಚಿನ ದಾಳಿಯ ವೇಳೆ ಒಂದು ಅತ್ಯಾಧುನಿಕ ಲ್ಯಾಪ್ಟಾಪ್ ಹಾಗೂ ಒಂದು ಮೊಬೈಲ್ ಫೋನ್ ಪತ್ತೆಯಾಗಿವೆ. ಈ ಡಿವೈಸ್ಗಳು ಬಿಟ್ಕಾಯಿನ್ ಹಗರಣದ ಪ್ರಮುಖ ಆರೋಪಿಗಳಲ್ಲಿ ಒಬ್ಬನಾದ ರಾಬಿನ್ ಖಂಡೇವಾಲನಿಗೆ ಸೇರಿದ್ದಾಗಿವೆ. ತನಿಖಾ ಸಂಸ್ಥೆಗಳ ಕಣ್ಣು ತಪ್ಪಿಸಲು ಆರೋಪಿಯು ಇವುಗಳನ್ನು ಲಾಡ್ಜ್ನಲ್ಲಿ ಅತ್ಯಂತ ರಹಸ್ಯವಾಗಿ ಮುಚ್ಚಿಟ್ಟಿದ್ದ ಎನ್ನಲಾಗಿದೆ.
ಬಂಧನದ ಭೀತಿಯಲ್ಲಿ ಸಾಕ್ಷ್ಯ ನಾಶಕ್ಕೆ ಯತ್ನ ಸಿಸಿಬಿ ಪೊಲೀಸರು ಅಥವಾ ಇಡಿ ಅಧಿಕಾರಿಗಳು ಯಾವುದೇ ಕ್ಷಣದಲ್ಲಾದರೂ ತನ್ನನ್ನು ಬಂಧಿಸಬಹುದು ಎಂಬ ತೀವ್ರ ಭಯದಲ್ಲಿದ್ದ ರಾಬಿನ್ ಖಂಡೇವಾಲ, ಅರೆಸ್ಟ್ ಆಗುವ ಮುನ್ನವೇ ಕಾಟನ್ಪೇಟೆಯ ಈ ಲಾಡ್ಜ್ಗೆ ತೆರಳಿದ್ದ. ತಾನು ಸಿಕ್ಕಿಬಿದ್ದರೂ ಹಗರಣದ ಡಿಜಿಟಲ್ ಸಾಕ್ಷ್ಯಗಳು ಸಿಗಬಾರದು ಎಂಬ ದೂರಾಾಲೋಚನೆಯಿಂದ ಮೊಬೈಲ್ ಮತ್ತು ಲ್ಯಾಪ್ಟಾಪ್ ಅನ್ನು ಅಲ್ಲಿ ಅಡಗಿಸಿಟ್ಟು ಬಂದಿದ್ದ. ಆದರೆ ಆತ ಬಂಧನಕ್ಕೊಳಗಾದ ಬಳಿಕ ನಡೆಸಿದ ತೀವ್ರ ವಿಚಾರಣೆಯ ವೇಳೆ ಈ ರಹಸ್ಯ ಬಯಲಾಗಿದೆ.
ಹೆಚ್ಚುವರಿ ಕಸ್ಟಡಿಗೆ ಪಡೆದ ಇಡಿ ಅಧಿಕಾರಿಗಳು ಆರೋಪಿ ರಾಬಿನ್ ಖಂಡೇವಾಲ ನೀಡಿದ ಸುಳಿವಿನ ಆಧಾರದ ಮೇಲೆಯೇ ಇಡಿ ಅಧಿಕಾರಿಗಳು ಕಾಟನ್ಪೇಟೆ ಲಾಡ್ಜ್ ಮೇಲೆ ದಾಳಿ ನಡೆಸಿ ಈ ಮಹತ್ವದ ಡಿವೈಸ್ಗಳನ್ನು ಜಪ್ತಿ ಮಾಡಿದ್ದಾರೆ. ಸದ್ಯ ಈ ಡಿಜಿಟಲ್ ಸಾಕ್ಷ್ಯಗಳಿಂದ ಹಗರಣದ ಇನ್ನಷ್ಟು ಆಳವಾದ ನೆಟ್ವರ್ಕ್ ಮತ್ತು ಕೋಟ್ಯಂತರ ರೂಪಾಯಿ ಅಕ್ರಮ ಹಣ ವರ್ಗಾವಣೆಯ (Money Laundering) ಜಾಲ ಬಯಲಾಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಆರೋಪಿಗಳನ್ನು ಮತ್ತಷ್ಟು ವಿಚಾರಣೆಗೆ ಒಳಪಡಿಸಲು ಇಡಿ ಅಧಿಕಾರಿಗಳು ಕೋರ್ಟ್ನಿಂದ ಐದು ದಿನಗಳ ಹೆಚ್ಚುವರಿ ಕಸ್ಟಡಿಗೆ ಪಡೆದಿದ್ದು, ತನಿಖೆಯನ್ನು ತೀವ್ರಗೊಳಿಸಿದ್ದಾರೆ.
