ಬೆಂಗಳೂರು : ನಿಮ್ಮ ಆದಾಯ ತೆರಿಗೆ ರಿಟರ್ನ್ (ITR) ಸಲ್ಲಿಕೆ ವೇಳೆ ನಗದು, ಚಿನ್ನ ಅಥವಾ ಯಾವುದೇ ದೊಡ್ಡ ಹೂಡಿಕೆಯ ವಿವರಗಳನ್ನು ಮರೆಮಾಚಿ, ನಂತರ ಆದಾಯದ ಮೂಲವನ್ನು ಸಾಬೀತುಪಡಿಸಲು ವಿಫಲರಾದರೆ, ಆದಾಯ ತೆರಿಗೆ ಇಲಾಖೆ (IT) ನಿಮ್ಮ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬಹುದು. ಘೋಷಿಸದ ಆದಾಯ ಪತ್ತೆಯಾದರೆ, ಅದರ ಮೇಲೆ ಸಾಮಾನ್ಯ ತೆರಿಗೆಯೊಂದಿಗೆ ಬಡ್ಡಿ ಮತ್ತು ದಂಡ ಸೇರಿದಂತೆ ಶೇಕಡಾ 78 ರಿಂದ 86 ರಷ್ಟು ಭಾರಿ ತೆರಿಗೆಯನ್ನು ವಿಧಿಸಲಾಗುತ್ತದೆ.
ಲೆಕ್ಕವಿಲ್ಲದ ಹಣಕ್ಕೆ ಶೇ. 78 ರಷ್ಟು ತೆರಿಗೆ!
ನಿಯಮಗಳ ಪ್ರಕಾರ, ಪತ್ತೆಯಾದ ಘೋಷಿಸದ ಆದಾಯದ ಮೇಲೆ ನೇರವಾಗಿ ಶೇ. 60 ರಷ್ಟು ತೆರಿಗೆ ವಿಧಿಸಲಾಗುತ್ತದೆ. ಇದಕ್ಕೆ ಹೆಚ್ಚುವರಿಯಾಗಿ ಶೇ. 25 ರಷ್ಟು ಸರ್ಚಾರ್ಜ್ ಮತ್ತು ಶೇ. 4 ರಷ್ಟು ಸೆಸ್ ಸೇರಿ ಒಟ್ಟು ತೆರಿಗೆಯ ಪ್ರಮಾಣ ಶೇ. 78 ಕ್ಕೆ ತಲುಪುತ್ತದೆ. ಉದಾಹರಣೆಗೆ, ಒಬ್ಬ ವ್ಯಕ್ತಿಯ ಬಳಿ 1 ಕೋಟಿ ರೂಪಾಯಿ ಪತ್ತೆಯಾಗಿ, ಆತ ಅದರ ಆದಾಯದ ಮೂಲವನ್ನು ಸಾಬೀತುಪಡಿಸಿದರೂ ಸಹ, ಸರ್ಕಾರಕ್ಕೆ ಸುಮಾರು 78 ಲಕ್ಷ ರೂಪಾಯಿಗಳನ್ನು ತೆರಿಗೆ ರೂಪದಲ್ಲಿ ಪಾವತಿಸಬೇಕಾಗುತ್ತದೆ.
ಆದಾಯದ ಮೂಲ ಸಾಬೀತುಪಡಿಸದಿದ್ದರೆ ಶೇ. 86 ರಷ್ಟು ದಂಡ!
ಒಂದು ವೇಳೆ ಈ 1 ಕೋಟಿ ರೂಪಾಯಿ ಎಲ್ಲಿಂದ ಬಂತು ಎಂಬುದನ್ನು ಸಾಬೀತುಪಡಿಸಲು ನೀವು ವಿಫಲರಾದರೆ, ಸೆಕ್ಷನ್ 271AAC ಅಡಿಯಲ್ಲಿ ಹೆಚ್ಚುವರಿಯಾಗಿ ಶೇ. 10 ರಷ್ಟು ದಂಡವನ್ನು ವಿಧಿಸಲಾಗುತ್ತದೆ. ಅಂದರೆ, ನಿಮ್ಮ 1 ಕೋಟಿ ರೂಪಾಯಿಯಲ್ಲಿ ಬರೋಬ್ಬರಿ 85.8 ಲಕ್ಷ ರೂಪಾಯಿಗಳು ನೇರವಾಗಿ ಸರ್ಕಾರದ ಖಜಾನೆಗೆ ಸೇರುತ್ತವೆ.
ಗಮನಿಸಿ: ಕಾನೂನಿನ ಪ್ರಕಾರ ಮನೆಯಲ್ಲಿ ನಗದು ಇಟ್ಟುಕೊಳ್ಳಲು ಯಾವುದೇ ನಿರ್ದಿಷ್ಟ ಮಿತಿ ಇಲ್ಲ. ನೀವು ಎಷ್ಟು ಬೇಕಾದರೂ ಹಣವನ್ನು ಇಟ್ಟುಕೊಳ್ಳಬಹುದು. ಆದರೆ, ನಿಮ್ಮ ಬಳಿ ಇರುವ ಪ್ರತಿ ರೂಪಾಯಿಗೂ ಕಾನೂನುಬದ್ಧ ಲೆಕ್ಕ ಇರಬೇಕು ಎಂಬುದು ಮಾತ್ರ ಕಡ್ಡಾಯ ನಿಯಮ.
ಮನೆಯಲ್ಲಿರುವ ನಗದನ್ನು ಐಟಿಆರ್ನಲ್ಲಿ ತೋರಿಸದಿದ್ದರೆ ಅಥವಾ ಖಾತೆ ಪುಸ್ತಕದಲ್ಲಿ ದಾಖಲಿಸದಿದ್ದರೆ, ತೆರಿಗೆ ಇಲಾಖೆಯು ಅದನ್ನು ಕಪ್ಪುಹಣ (ಘೋಷಿಸದ ಆದಾಯ) ಎಂದು ಪರಿಗಣಿಸಿ ಜಪ್ತಿ ಮಾಡಬಹುದು.
ಚಿನ್ನದ ನಿಯಮಗಳೇನು?
ಭಾರತೀಯ ಸಂಸ್ಕೃತಿಯನ್ನು ಪರಿಗಣಿಸಿ, ಚಿನ್ನದ ವಿಷಯದಲ್ಲಿ ಆದಾಯ ತೆರಿಗೆ ಇಲಾಖೆ ಕೆಲವು ಸಡಿಲಿಕೆಗಳನ್ನು ನೀಡಿದೆ. ನಿಗದಿತ ಮಿತಿಯೊಳಗಿನ ಚಿನ್ನವನ್ನು ಐಟಿ ಇಲಾಖೆ ಜಪ್ತಿ ಮಾಡುವುದಿಲ್ಲ. ಆದರೆ, ನಿಮ್ಮ ಮನೆಯಲ್ಲಿ ಇಲಾಖೆ ನಿಗದಿಪಡಿಸಿದ ಮಿತಿಗಿಂತ ಹೆಚ್ಚಿನ ಚಿನ್ನವಿದ್ದರೆ, ಅದನ್ನು ಖರೀದಿಸಲು ಬಳಸಿದ ಕಾನೂನುಬದ್ಧ ಆದಾಯದ ಪುರಾವೆ ಅಥವಾ ವಂಶಪಾರಂಪರ್ಯವಾಗಿ ಬಂದಿರುವ ಆಸ್ತಿ ಪತ್ರಗಳನ್ನು ಹೊಂದಿರುವುದು ಕಡ್ಡಾಯವಾಗಿದೆ.
ತಪ್ಪು ಸರಿಪಡಿಸಿಕೊಳ್ಳಲು ಒಂದು ಅವಕಾಶ!
ಒಂದು ವೇಳೆ ಐಟಿಆರ್ ಸಲ್ಲಿಕೆಯಲ್ಲಿ ತಪ್ಪು ಸಂಭವಿಸಿದ್ದರೆ, ಅದನ್ನು ನವೀಕರಿಸಲು (Updated ITR) ಸರ್ಕಾರ ಒಂದು ಅವಕಾಶವನ್ನು ನೀಡುತ್ತದೆ. ಮರು-ಮೌಲ್ಯಮಾಪನ ನೋಟಿಸ್ (Reassessment Notice) ಬಂದ ನಂತರವೂ ಸಹ ನೀವು ಸರಿಯಾದ ಆದಾಯದ ಮೂಲವನ್ನು ತೋರಿಸಿ ಅಪ್ಡೇಟೆಡ್ ರಿಟರ್ನ್ ಸಲ್ಲಿಸಿದರೆ, ನಿಮಗೆ ಸೆಕ್ಷನ್ 115BBE ಅಡಿಯಲ್ಲಿ ವಿನಾಯಿತಿ ಸಿಗದೇ ಇರಬಹುದು, ಆದರೆ ಭಾರಿ ದಂಡ ಮತ್ತು ಜೈಲು ಶಿಕ್ಷೆಯಿಂದ ಖಂಡಿತವಾಗಿಯೂ ಪಾರಾಗಬಹುದು.
