ಇತ್ತೀಚಿನ ದಿನಗಳಲ್ಲಿ ಯುಪಿಐ (UPI), ನೆಟ್ ಬ್ಯಾಂಕಿಂಗ್ ಮತ್ತು ಐಎಂಪಿಎಸ್ (IMPS) ನಂತಹ ಡಿಜಿಟಲ್ ವಹಿವಾಟುಗಳು ಹೆಚ್ಚಾದಂತೆ, ತಾಂತ್ರಿಕ ದೋಷ ಅಥವಾ ವ್ಯಕ್ತಿಗಳ ತಪ್ಪಿನಿಂದಾಗಿ ಬೇರೆಯವರ ಖಾತೆಗೆ ಹಣ ಜಮೆಯಾಗುವ ಪ್ರಕರಣಗಳು ಸಾಮಾನ್ಯವಾಗುತ್ತಿವೆ. ಹೀಗೆ ಅನಿರೀಕ್ಷಿತವಾಗಿ ನಿಮ್ಮ ಖಾತೆಗೆ ಹಣ ಬಂದಾಗ ಅದನ್ನು ‘ಅದೃಷ್ಟ’ ಎಂದು ಭಾವಿಸಿ ಖರ್ಚು ಮಾಡಿದರೆ ನೀವು ಕಾನೂನು ಮತ್ತು ಆದಾಯ ತೆರಿಗೆ ಇಲಾಖೆಯ ಸಂಕಷ್ಟಕ್ಕೆ ಸಿಲುಕಬಹುದು.
ತೆರಿಗೆ ತಜ್ಞರು ಏನು ಹೇಳುತ್ತಾರೆ?
ಆದಾಯ ತೆರಿಗೆ ತಜ್ಞರ ಪ್ರಕಾರ, ಬ್ಯಾಂಕಿಂಗ್ ದೋಷದಿಂದಾಗಿ ಖಾತೆಗೆ ಜಮೆಯಾದ ಹಣವು ನೇರವಾಗಿ ತೆರಿಗೆ ವ್ಯಾಪ್ತಿಗೆ ಬರುವುದಿಲ್ಲ. ಏಕೆಂದರೆ ಆದಾಯ ತೆರಿಗೆ ಕಾಯ್ದೆಯಡಿ ಕೇವಲ ಸಂಬಳ, ವ್ಯಾಪಾರ ಲಾಭ, ಉಡುಗೊರೆ ಅಥವಾ ಹೂಡಿಕೆಯ ಮೂಲದ ಆದಾಯಕ್ಕೆ ಮಾತ್ರ ತೆರಿಗೆ ವಿಧಿಸಲಾಗುತ್ತದೆ. ಈ ಹಣವು ತಪ್ಪಾಗಿ ಬಂದಿದೆ ಎಂದು ನೀವು ತಕ್ಷಣವೇ ಬ್ಯಾಂಕ್ಗೆ ಮಾಹಿತಿ ನೀಡಿದರೆ, ಅದನ್ನು ನಿಮ್ಮ ವೈಯಕ್ತಿಕ ಆದಾಯವೆಂದು ಪರಿಗಣಿಸಲಾಗುವುದಿಲ್ಲ.
ಬಳಸಿಕೊಂಡರೆ ಎದುರಾಗುವ ಸಮಸ್ಯೆಗಳೇನು?
ಒಂದು ವೇಳೆ ಆ ಹಣ ನಿಮ್ಮದಲ್ಲ ಎಂದು ತಿಳಿದಿದ್ದರೂ ನೀವು ಅದನ್ನು ಖರ್ಚು ಮಾಡಿದರೆ ಅಥವಾ ಬೇರೆ ಖಾತೆಗೆ ವರ್ಗಾಯಿಸಿ ಮರೆಮಾಚಲು ಯತ್ನಿಸಿದರೆ ತೊಂದರೆ ಕಾಯಂ.
ಸೆಕ್ಷನ್ 69A ಅಡಿಯಲ್ಲಿ ಕ್ರಮ: ಆದಾಯ ತೆರಿಗೆ ಕಾಯ್ದೆ 1961ರ ಸೆಕ್ಷನ್ 69A ಅಡಿಯಲ್ಲಿ ತೆರಿಗೆ ಅಧಿಕಾರಿಗಳು ಈ ಹಣದ ಮೂಲದ ಬಗ್ಗೆ ವಿವರಣೆ ಕೇಳಬಹುದು.
ಭಾರೀ ದಂಡ: ಹಣದ ಮೂಲವನ್ನು ಸರಿಯಾದ ದಾಖಲೆಗಳೊಂದಿಗೆ ವಿವರಿಸಲು ಸಾಧ್ಯವಾಗದಿದ್ದರೆ, ಅದನ್ನು ‘ವಿವರಿಸಲಾಗದ ಆದಾಯ’ ಎಂದು ಪರಿಗಣಿಸಿ ಶೇ. 60 ರಷ್ಟು ತೆರಿಗೆ, ಹೆಚ್ಚುವರಿ ಸರ್ಚಾರ್ಜ್, ಸೆಸ್ ಮತ್ತು ಶೇ. 10 ರಷ್ಟು ದಂಡ ವಿಧಿಸುವ ಸಾಧ್ಯತೆ ಇರುತ್ತದೆ.
ಹಣ ಬಂದಾಗ ನೀವು ಮಾಡಬೇಕಾದ್ದೇನು?
ಅನುಕೋಚವಾಗಿ ನಿಮ್ಮ ಖಾತೆಗೆ ಹಣ ಜಮೆಯಾದಾಗ ಈ ಕೆಳಗಿನ ಕ್ರಮಗಳನ್ನು ಅನುಸರಿಸುವುದು ಉತ್ತಮ:
ಬ್ಯಾಂಕ್ಗೆ ಮಾಹಿತಿ ನೀಡಿ: ಕೂಡಲೇ ನಿಮ್ಮ ಬ್ಯಾಂಕ್ ಶಾಖೆಗೆ ಭೇಟಿ ನೀಡಿ ಅಥವಾ ಇಮೇಲ್ ಮೂಲಕ ಲಿಖಿತವಾಗಿ ಮಾಹಿತಿ ನೀಡಿ.
ದಾಖಲೆಗಳನ್ನು ಸಂಗ್ರಹಿಸಿ: ನಿಮ್ಮ ದೂರು ಸಂಖ್ಯೆ (Complaint Number), ಇಮೇಲ್ ಪ್ರತಿ ಮತ್ತು ಬ್ಯಾಂಕ್ ಸ್ಟೇಟ್ಮೆಂಟ್ ಅನ್ನು ಪುರಾವೆಯಾಗಿ ಇಟ್ಟುಕೊಳ್ಳಿ.
ಬಳಸಬೇಡಿ: ಆ ಹಣವನ್ನು ಯಾವುದೇ ಕಾರಣಕ್ಕೂ ಡ್ರಾ ಮಾಡಬೇಡಿ ಅಥವಾ ಬಳಸಬೇಡಿ.
ಪಾರದರ್ಶಕತೆ: ಡಿಜಿಟಲ್ ಯುಗದಲ್ಲಿ ಪ್ರತಿ ವಹಿವಾಟಿನ ಮೇಲೆ ನಿಗಾ ಇರುವುದರಿಂದ, ಪಾರದರ್ಶಕವಾಗಿರುವುದು ನಿಮ್ಮನ್ನು ಕಾನೂನು ಇಕ್ಕಟ್ಟಿನಿಂದ ರಕ್ಷಿಸುತ್ತದೆ.
ನೆನಪಿಡಿ: ಅನಿರೀಕ್ಷಿತವಾಗಿ ಬಂದ ಹಣವು ಆಪತ್ತನ್ನು ತರಬಹುದು. ಪಾರದರ್ಶಕವಾಗಿ ವ್ಯವಹರಿಸುವುದು ಮತ್ತು ಬ್ಯಾಂಕಿಂಗ್ ನಿಯಮಗಳನ್ನು ಪಾಲಿಸುವುದು ಜವಾಬ್ದಾರಿಯುತ ಗ್ರಾಹಕನ ಲಕ್ಷಣವಾಗಿದೆ.
