ಮದ್ಯಪಾನ ಆರೋಗ್ಯಕ್ಕೆ ಹಾನಿಕಾರಕ ಎಂಬುದು ಕೇವಲ ಎಚ್ಚರಿಕೆಯಲ್ಲ, ಅದು ಜೀವನದ ದಿಕ್ಕನ್ನೇ ಬದಲಿಸುವ ಸತ್ಯ ಎಂಬುದು ಅಮೆರಿಕದ ಖ್ಯಾತ ಹೃದಯ ಶಸ್ತ್ರಚಿಕಿತ್ಸಕ ಡಾ. ಜೆರೆಮಿ ಲಂಡನ್ ಅವರ ಅನುಭವದ ನುಡಿಗಳಿಂದ ಸಾಬೀತಾಗಿದೆ.
ಹೌದು, ಸುಮಾರು 25 ವರ್ಷಗಳ ವೈದ್ಯಕೀಯ ಅನುಭವ ಹೊಂದಿರುವ ಅವರು, ಸತತ 1,500 ದಿನಗಳ ಕಾಲ (ಸುಮಾರು 4 ವರ್ಷ) ಮದ್ಯದಿಂದ ಸಂಪೂರ್ಣ ದೂರವಿದ್ದು, ತಮ್ಮ ಜೀವನದಲ್ಲಿ ಕಂಡುಕೊಂಡ ನಾಲ್ಕು ಪ್ರಮುಖ ಬದಲಾವಣೆಗಳನ್ನು ಜಗತ್ತಿನ ಮುಂದೆ ತೆರೆದಿಟ್ಟಿದ್ದಾರೆ.
ಡಾ. ಜೆರೆಮಿ ಲಂಡನ್ ಅವರು ವಿವರಿಸಿದ ಆ 4 ಜೀವನಪಾಠಗಳು ಇಲ್ಲಿವೆ:
ಮೆದುಳಿನ ಚುರುಕುತನ ಮತ್ತು ಸ್ಪಷ್ಟತೆ
ಮದ್ಯಪಾನ ಬಿಟ್ಟ ನಂತರ ಮೆದುಳಿಗೆ ಕವಿದಿದ್ದ ಮಂಜು (Brain Fog) ಸರಿದಂತಾಗಿ, ಮಾನಸಿಕ ಸ್ಪಷ್ಟತೆ ಲಭಿಸಿದೆ. ಬೆಳಿಗ್ಗೆ ಎದ್ದ ತಕ್ಷಣ ಆಲಸ್ಯವಿಲ್ಲದೆ ಚುರುಕಾಗಿ ಕೆಲಸದಲ್ಲಿ ತೊಡಗಿಸಿಕೊಳ್ಳಲು ಮತ್ತು ಏಕಾಗ್ರತೆ ಹೆಚ್ಚಿಸಿಕೊಳ್ಳಲು ಸಾಧ್ಯವಾಯಿತು ಎಂದು ಅವರು ತಿಳಿಸಿದ್ದಾರೆ.
ಆತ್ಮವಿಶ್ವಾಸ ಮತ್ತು ಶಿಸ್ತು
ಪ್ರತಿದಿನವೂ ಮದ್ಯದಿಂದ ದೂರವಿರುವ ನಿರ್ಧಾರವು ಅವರಲ್ಲಿ ಅಚಲವಾದ ಆತ್ಮವಿಶ್ವಾಸವನ್ನು ಬೆಳೆಸಿದೆ. ಜೀವನಶೈಲಿಯಲ್ಲಿ ಶಿಸ್ತು ಮೂಡಿದ್ದು, ಇದು ತನ್ನ ಮೇಲೆ ತನಗಿರುವ ನಂಬಿಕೆಯನ್ನು ಹೆಚ್ಚಿಸಿದೆ ಎಂದು ಅವರು ಹೇಳಿದ್ದಾರೆ.
ನೈಜ ಜೀವನದ ಅನುಭವ
ಜೀವನದ ನೋವು-ನಲಿವುಗಳನ್ನು ನೈಸರ್ಗಿಕವಾಗಿ ಅನುಭವಿಸುವುದು ಮುಖ್ಯ. ಮದ್ಯವು ಯಾವುದನ್ನು ನೀಡುವುದಾಗಿ ಸುಳ್ಳು ಭರವಸೆ ನೀಡುತ್ತದೆಯೋ, ಅದೆಲ್ಲವನ್ನೂ ಮದ್ಯರಹಿತ ಜೀವನವು ನಿಜವಾಗಿಯೂ ನೀಡುತ್ತದೆ ಎಂದು ಅವರು ವಿವರಿಸಿದ್ದಾರೆ.
ಭಾವನಾತ್ಮಕ ಸ್ಥಿರತೆ
ಮದ್ಯಪಾನವು ಮನುಷ್ಯನ ನಿಜವಾದ ಭಾವನೆಗಳನ್ನು ಹತ್ತಿಕ್ಕುತ್ತದೆ. ಆದರೆ ಸೋಬ್ರಿಯೆಟಿ (ಮದ್ಯರಹಿತ ಸ್ಥಿತಿ) ಜೀವನದ ಏರಿಳಿತಗಳನ್ನು ಸಮಾಧಾನದಿಂದ ಎದುರಿಸುವ ಶಕ್ತಿ ನೀಡುತ್ತದೆ. ಇದರಿಂದ ಕುಟುಂಬ ಮತ್ತು ಸ್ನೇಹಿತರೊಂದಿಗಿನ ಸಂಬಂಧಗಳು ಹೆಚ್ಚು ಅರ್ಥಪೂರ್ಣವಾಗುತ್ತವೆ.
