ಬೆಂಗಳೂರು: ನೀವು ಬ್ಯಾಂಕ್ನಿಂದ ಸಾಲ ಪಡೆದಿದ್ದೀರಾ? ಹಾಗಿದ್ದಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ನಿಮಗೊಂದು ಮಹತ್ವದ ಸಿಹಿಸುದ್ದಿ ನೀಡಿದೆ. ಪ್ರಕೃತಿ ವಿಕೋಪಗಳ ಸಂದರ್ಭದಲ್ಲಿ ಸಾಲದ ಕಂತು (EMI) ಪಾವತಿಸಲು ಕಷ್ಟಪಡುವ ಗ್ರಾಹಕರಿಗೆ ನೆರವಾಗಲು ಆರ್ಬಿಐ ಹೊಸ ಮಾರ್ಗಸೂಚಿಯನ್ನು ಸಿದ್ಧಪಡಿಸಿದೆ. ಈ ನಿಯಮವು ಜುಲೈ 1, 2026 ರಿಂದ ಜಾರಿಗೆ ಬರಲಿದೆ.
ನೋಂದಣಿ ಇಲ್ಲದೆಯೇ ಸಿಗಲಿದೆ ಇಎಂಐ ರಿಯಾಯಿತಿ!
ಈ ಮೊದಲು ಪ್ರವಾಹ, ಭೂಕಂಪ ಅಥವಾ ಚಂಡಮಾರುತದಂತಹ ವಿಪತ್ತುಗಳು ಸಂಭವಿಸಿದಾಗ, ಸಾಲಗಾರರು ತಮಗೆ ಇಎಂಐ ಪಾವತಿಸಲು ವಿನಾಯಿತಿ ಬೇಕೆಂದು ಬ್ಯಾಂಕ್ಗಳಿಗೆ ಅಲೆದು ಅರ್ಜಿ ಸಲ್ಲಿಸಬೇಕಾಗಿತ್ತು. ಆದರೆ ಹೊಸ ನಿಯಮದಂತೆ, ನಿಮ್ಮ ಪ್ರದೇಶದಲ್ಲಿ ಸರ್ಕಾರವು ಅಧಿಕೃತವಾಗಿ ‘ಪ್ರಾಕೃತಿಕ ವಿಕೋಪ’ ಎಂದು ಘೋಷಿಸಿದರೆ, ಬ್ಯಾಂಕ್ಗಳೇ ಸ್ವಯಂಪ್ರೇರಿತವಾಗಿ ನಿಮಗೆ ಸಾಲ ಮರುಪಾವತಿಯಲ್ಲಿ ರಿಯಾಯಿತಿ ನೀಡಲಿವೆ.
ಹೊಸ ನಿಯಮದ ಪ್ರಮುಖ ಅಂಶಗಳು:
ಯಾವ ವಿಪತ್ತುಗಳಿಗೆ ಅನ್ವಯ?: ರಾಜ್ಯ ವಿಪತ್ತು ಪರಿಹಾರ ನಿಧಿ (SDRF) ಅಥವಾ ರಾಷ್ಟ್ರೀಯ ವಿಪತ್ತು ಪರಿಹಾರ ನಿಧಿ (NDRF) ಅಡಿಯಲ್ಲಿ ಘೋಷಿತವಾದ ನೈಸರ್ಗಿಕ ವಿಕೋಪಗಳಿಗೆ ಮಾತ್ರ ಇದು ಅನ್ವಯಿಸುತ್ತದೆ.
45 ದಿನಗಳ ಗಡುವು: ವಿಪತ್ತು ಘೋಷಣೆಯಾದ 45 ದಿನಗಳ ಒಳಗೆ ಬ್ಯಾಂಕ್ಗಳು ಸಾಲಗಾರರಿಗೆ ಈ ಸೌಲಭ್ಯ ನೀಡುವ ಪ್ರಕ್ರಿಯೆಯನ್ನು ಆರಂಭಿಸಬೇಕು.
ಯಾರಿಗೆ ಲಾಭ?: ಈ ಸೌಲಭ್ಯವು ಕೇವಲ ‘ಆಕ್ಟಿವ್’ ಅಥವಾ ‘ಸ್ಟ್ಯಾಂಡರ್ಡ್’ ಖಾತೆದಾರರಿಗೆ ಮಾತ್ರ ಲಭ್ಯ. ಅಂದರೆ, ನಿಮ್ಮ ಕಂತುಗಳು 30 ದಿನಗಳಿಗಿಂತ ಹೆಚ್ಚು ಬಾಕಿ ಇರಬಾರದು. ಹಳೆಯ ಡಿಫಾಲ್ಟರ್ಗಳಿಗೆ (ಸಾಲ ಮರುಪಾವತಿ ಮಾಡದವರಿಗೆ) ಈ ಯೋಜನೆಯ ಲಾಭ ಸಿಗುವುದಿಲ್ಲ.
ಯಾವ ರೀತಿಯ ನೆರವು?: ಬ್ಯಾಂಕ್ಗಳು ಇಎಂಐ ಪಾವತಿಸಲು ಹೆಚ್ಚಿನ ಕಾಲಾವಕಾಶ ನೀಡಬಹುದು ಅಥವಾ ಸಾಲದ ಮರುಜೋಡಣೆ (Restructuring) ಮಾಡಿಕೊಡಬಹುದು.
ಸೌಲಭ್ಯ ಬೇಡದಿದ್ದರೆ ಏನು ಮಾಡಬೇಕು? (Opt-out option)
ಒಂದು ವೇಳೆ ಬ್ಯಾಂಕ್ ಇಎಂಐ ವಿನಾಯಿತಿ ನೀಡಿದರೂ, ನಿಮಗೆ ಅದು ಬೇಡವಾಗಿದ್ದರೆ ಅಥವಾ ನೀವು ಸಮಯಕ್ಕೆ ಸರಿಯಾಗಿ ಕಂತು ಪಾವತಿಸಲು ಶಕ್ತರಾಗಿದ್ದರೆ, 135 ದಿನಗಳ ಒಳಗಾಗಿ ನೀವು ‘ಆಪ್ಟ್-ಔಟ್’ (ಸೌಲಭ್ಯ ಬೇಡವೆಂದು ಅರ್ಜಿ ಸಲ್ಲಿಸುವುದು) ಆಯ್ಕೆಯನ್ನು ಬಳಸಬಹುದು.
ಗಮನಿಸಿ: ಇದು ಹೊಸ ಸಾಲಗಳಿಗೆ ಮಾತ್ರ!
ಈ ನಿಯಮವು ಜುಲೈ 1, 2026 ರ ನಂತರ ಪಡೆಯುವ ಹೊಸ ಸಾಲಗಳಿಗೆ ಮಾತ್ರ ಅನ್ವಯಿಸುತ್ತದೆ. ಹಳೆಯ ಸಾಲಗಳ ವಿಷಯದಲ್ಲಿ ಈಗಿರುವ ನಿಯಮಗಳೇ ಮುಂದುವರಿಯಲಿವೆ ಎಂದು ಆರ್ಬಿಐ ಸ್ಪಷ್ಟಪಡಿಸಿದೆ.
