ಚೆನ್ನೈ:”ಪ್ರತಿಯೊಂದು ಮತವೂ ಅಮೂಲ್ಯ” ಎಂಬ ಮಾತಿಗೆ ತಮಿಳುನಾಡು ವಿಧಾನಸಭಾ ಚುನಾವಣೆಯ ಈ ಘಟನೆ ಸಾಕ್ಷಿಯಾಗಿದೆ. ಓಮನ್ನ ಮಸ್ಕತ್ನಿಂದ ವಿಮಾನವೇರಿ ಬಂದು ಮತ ಚಲಾಯಿಸಿದ ವ್ಯಕ್ತಿಯೊಬ್ಬರು, ವಿಜಯ್ ನೇತೃತ್ವದ ‘ತಮಿಳಗ ವೆಟ್ರಿ ಕಳಗಂ’ (TVK) ಪಕ್ಷದ ಅಭ್ಯರ್ಥಿಯ ಗೆಲುವಿನಲ್ಲಿ ಅತ್ಯಂತ ನಿರ್ಣಾಯಕ ಪಾತ್ರ ವಹಿಸಿದ್ದಾರೆ.
ಶಿವಗಂಗಾ ಜಿಲ್ಲೆಯ ತಿರುಪ್ಪತ್ತೂರು ವಿಧಾನಸಭಾ ಕ್ಷೇತ್ರದಲ್ಲಿ ಟಿವಿಕೆ ಅಭ್ಯರ್ಥಿ ಸೀನಿವಾಸ ಸೇತುಪತಿ ಅವರು ಡಿಎಂಕೆ ಸಚಿವ ಕೆ.ಆರ್. ಪೆರಿಯಕರುಪ್ಪನ್ ಅವರ ವಿರುದ್ಧ ಕೇವಲ 1 ಮತದ ಅಂತರದಿಂದ ಐತಿಹಾಸಿಕ ಜಯ ಸಾಧಿಸಿದ್ದಾರೆ.
ಓಮನ್ನ ಮಸ್ಕತ್ನಲ್ಲಿ ಕೆಲಸ ಮಾಡುತ್ತಿರುವ ಮಣಿಕಂಠನ್ ಶಿವಾನಂದಂ ಎಂಬುವವರು ಕೇವಲ ಮತದಾನ ಮಾಡುವ ಉದ್ದೇಶದಿಂದಲೇ ಭಾರತಕ್ಕೆ ಬಂದಿದ್ದರು. ಚುನಾವಣಾ ಫಲಿತಾಂಶ ಹೊರಬಂದಾಗ ಅಭ್ಯರ್ಥಿಯು ಕೇವಲ ಒಂದು ಮತದಿಂದ ಗೆದ್ದಿರುವುದು ತಿಳಿಯಿತು.
ಈ ಬಗ್ಗೆ ಎಕ್ಸ್ (X) ನಲ್ಲಿ ಪೋಸ್ಟ್ ಮಾಡಿರುವ ಮಣಿಕಂಠನ್, “ನನ್ನ ಮತಕ್ಕಾಗಿ ನಾನು ಮಸ್ಕತ್ನಿಂದ ಇಷ್ಟೊಂದು ದೂರ ಪ್ರಯಾಣ ಬೆಳೆಸಿದ್ದಕ್ಕೆ ಇಂದು ಹೆಮ್ಮೆಯಾಗುತ್ತಿದೆ. ಆ ಒಂದು ಮತ ನನ್ನದೇ ಆಗಿರಬಹುದು” ಎಂದು ಬರೆದುಕೊಂಡಿದ್ದಾರೆ.
ಟಿವಿಕೆ ಅಭ್ಯರ್ಥಿ ಮತ್ತು ಅಭಿಮಾನಿಗಳು ಮಣಿಕಂಠನ್ ಅವರ ಈ ದೇಶಪ್ರೇಮ ಮತ್ತು ಪಕ್ಷದ ಮೇಲಿನ ನಿಷ್ಠೆಯನ್ನು ಶ್ಲಾಘಿಸಿದ್ದು, “ನಮ್ಮ ದಿನವನ್ನು ನೀವು ಉಳಿಸಿದಿರಿ” (You saved our day) ಎಂದು ಧನ್ಯವಾದ ಅರ್ಪಿಸಿದ್ದಾರೆ.
