ನಾವೆಲ್ಲರೂ ದೈನಂದಿನ ಜೀವನದಲ್ಲಿ ಅವಸರವಸರವಾಗಿ ಊಟ ಮಾಡುವುದು ಅಥವಾ ಮಾತನಾಡುತ್ತಾ ತಿನ್ನುವ ಅಭ್ಯಾಸ ಬೆಳೆಸಿಕೊಂಡಿದ್ದೇವೆ. ಆದರೆ, ಈ ಸಣ್ಣ ನಿರ್ಲಕ್ಷ್ಯ ಅದೆಷ್ಟು ಅಪಾಯಕಾರಿ ಎಂದರೆ, ಇದು ಕ್ಷಣಾರ್ಧದಲ್ಲಿ ಪ್ರಾಣಕ್ಕೇ ಕುತ್ತು ತರಬಹುದು. ಆಹಾರವು ಶ್ವಾಸನಾಳದಲ್ಲಿ (Windpipe) ಸಿಲುಕಿಕೊಂಡಾಗ ಉಸಿರಾಟಕ್ಕೆ ತೊಂದರೆಯಾಗಿ ಸಾವು ಸಂಭವಿಸುವ ಸಾಧ್ಯತೆಯೂ ಇರುತ್ತದೆ. ಇಂತಹ ತುರ್ತು ಪರಿಸ್ಥಿತಿಯಲ್ಲಿ ಗಾಬರಿಯಾಗದೆ ಸಮಯಪ್ರಜ್ಞೆಯಿಂದ ಹೇಗೆ ವರ್ತಿಸಬೇಕು ಎಂಬುದರ ಕುರಿತು ತಜ್ಞ ವೈದ್ಯರು ನೀಡಿರುವ ಮಾಹಿತಿ ಇಲ್ಲಿದೆ.
ಈ ತಪ್ಪುಗಳನ್ನು ಎಂದಿಗೂ ಮಾಡಬೇಡಿ!
ಸಾಮಾನ್ಯವಾಗಿ ಗಂಟಲಿನಲ್ಲಿ ಏನಾದರೂ ಸಿಲುಕಿಕೊಂಡ ತಕ್ಷಣ ನಾವು ಮಾಡುವ ಮೊದಲ ಕೆಲಸವೆಂದರೆ ನೀರು ಕುಡಿಯುವುದು. ಆದರೆ ಆರ್ಥೋ ಮತ್ತು ಸ್ಪೋರ್ಟ್ಸ್ ಸರ್ಜನ್ ಓಬೈದರ್ ರೆಹಮಾನ್ ಅವರ ಪ್ರಕಾರ, ಇದು ತಪ್ಪು.
ನೀರು ಕುಡಿಯಬೇಡಿ: ನೀರು ಕುಡಿಯುವುದರಿಂದ ಸಿಲುಕಿಕೊಂಡ ಆಹಾರದ ತುಣುಕು ಇನ್ನಷ್ಟು ಆಳಕ್ಕೆ ಹೋಗಿ ಉಸಿರಾಟವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಬಹುದು.
ಬೆರಳು ಹಾಕಬೇಡಿ: ಗಂಟಲಿಗೆ ಬೆರಳು ಹಾಕಿ ಆಹಾರ ತೆಗೆಯಲು ಪ್ರಯತ್ನಿಸಬೇಡಿ, ಇದು ಗಾಯಕ್ಕೆ ಕಾರಣವಾಗಬಹುದು ಅಥವಾ ಆಹಾರವನ್ನು ಮತ್ತಷ್ಟು ಒಳಗೆ ತಳ್ಳಬಹುದು.
ಮಲಗಬೇಡಿ: ಉಸಿರುಗಟ್ಟಿದಾಗ ನೇರವಾಗಿ ಮಲಗುವುದು ಅಥವಾ ಗಾಬರಿಯಿಂದ ಓಡುವುದು ಅಪಾಯಕಾರಿ.
ಪ್ರಾಣ ಉಳಿಸುವ ‘ಹೀಮ್ಲಿಚ್ ಮ್ಯಾನ್ಯೂವರ್’ (Heimlich Maneuver) ಮತ್ತು ಇತರ ಕ್ರಮಗಳು:
ಒಂದು ವೇಳೆ ನೀವು ಮನೆಯಲ್ಲಿ ಒಬ್ಬರೇ ಇದ್ದಾಗ ಇಂತಹ ಘಟನೆ ಸಂಭವಿಸಿದರೆ, ಈ ಕೆಳಗಿನ ಕ್ರಮಗಳನ್ನು ಅನುಸರಿಸಿ:
ಜೋರಾಗಿ ಕೆಮ್ಮಿ: ಆಹಾರ ಸಿಲುಕಿದ ತಕ್ಷಣ ಗಾಬರಿಯಾಗದೆ ಶಕ್ತಿ ಮೀರಿ ಕೆಮ್ಮಲು ಪ್ರಯತ್ನಿಸಿ. ಕೆಮ್ಮಿನ ಒತ್ತಡಕ್ಕೆ ಆಹಾರದ ತುಣುಕು ಹೊರಬರುವ ಸಾಧ್ಯತೆ ಹೆಚ್ಚಿರುತ್ತದೆ.
ಹೊಟ್ಟೆಯ ಮೇಲೆ ಒತ್ತಡ ಹೇರಿ: ನಿಮ್ಮ ಮುಷ್ಟಿಯನ್ನು ಕಟ್ಟಿಕೊಂಡು ಹೊಕ್ಕುಳಿನ ಮೇಲ್ಭಾಗದಲ್ಲಿ ಇರಿಸಿ, ಇನ್ನೊಂದು ಕೈಯಿಂದ ಅದನ್ನು ಹಿಡಿದು ಒಳಮುಖವಾಗಿ ಮತ್ತು ಮೇಲ್ಮುಖವಾಗಿ ಜೋರಾಗಿ ಒತ್ತಿರಿ.
ಕುರ್ಚಿ ಅಥವಾ ಟೇಬಲ್ ಬಳಕೆ: ಮನೆಯಲ್ಲಿ ಯಾರೂ ಇಲ್ಲದಿದ್ದರೆ, ಕುರ್ಚಿ ಅಥವಾ ಟೇಬಲ್ನ ಅಂಚಿಗೆ ನಿಮ್ಮ ಹೊಟ್ಟೆಯ ಭಾಗವನ್ನು ಆನಿಸಿ ಮುಂದಕ್ಕೆ ಜೋರಾಗಿ ಬಾಗಿರಿ. ಇದು ಶ್ವಾಸನಾಳದಲ್ಲಿದ್ದ ಆಹಾರವನ್ನು ಹೊರಹಾಕಲು ಸಹಾಯ ಮಾಡುತ್ತದೆ.
ತುರ್ತು ಕರೆ ಮಾಡಿ: ಪರಿಸ್ಥಿತಿ ಕೈಮೀರುತ್ತಿದೆ ಎನಿಸಿದರೆ ತಕ್ಷಣ ತುರ್ತು ಸೇವೆಗೆ ಕರೆ ಮಾಡಿ ಮತ್ತು ಫೋನ್ ಅನ್ನು ಸ್ಪೀಕರ್ನಲ್ಲಿ ಇರಿಸಿ. ವೈದ್ಯಕೀಯ ತಂಡ ಒಳಬರಲು ಅನುಕೂಲವಾಗುವಂತೆ ಮನೆಯ ಬಾಗಿಲನ್ನು ತೆರೆದಿಡಿ.
ವೈದ್ಯರ ಸಲಹೆ ಯಾವಾಗ ಅಗತ್ಯ?
ನಿಮಗೆ ಪದೇ ಪದೇ ಆಹಾರ ನುಂಗಲು ಕಷ್ಟವಾಗುತ್ತಿದ್ದರೆ ಅಥವಾ ಗಂಟಲಿನಲ್ಲಿ ಏನೋ ಸಿಲುಕಿದ ಅನುಭವವಾಗುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬೇಡಿ. ಇದು ಯಾವುದಾದರೂ ಆಂತರಿಕ ಆರೋಗ್ಯ ಸಮಸ್ಯೆಯ ಸಂಕೇತವಾಗಿರಬಹುದು. ತಕ್ಷಣವೇ ತಜ್ಞ ವೈದ್ಯರನ್ನು ಸಂಪರ್ಕಿಸಿ ತಪಾಸಣೆ ಮಾಡಿಸಿಕೊಳ್ಳುವುದು ಉತ್ತಮ.
ನೆನಪಿರಲಿ: ಆಹಾರ ಸೇವಿಸುವಾಗ ಮೊಬೈಲ್ ನೋಡುವುದು ಅಥವಾ ಹರಟೆ ಹೊಡೆಯುವುದನ್ನು ಬಿಟ್ಟು, ನಿಧಾನವಾಗಿ ಅಗಿದು ತಿನ್ನುವ ಅಭ್ಯಾಸ ರೂಢಿಸಿಕೊಳ್ಳಿ. ನಿಮ್ಮ ಒಂದು ಸಣ್ಣ ಜಾಗರೂಕತೆ ದೊಡ್ಡ ಅನಾಹುತವನ್ನು ತಪ್ಪಿಸಬಹುದು.
