ಹೊಸ ಹಣಕಾಸು ವರ್ಷ (2026-27) ಆರಂಭವಾಗುತ್ತಿದ್ದಂತೆ, ಸಾಮಾನ್ಯ ಜನರ ಜೇಬಿನ ಮೇಲೆ ನೇರ ಪರಿಣಾಮ ಬೀರುವ ಹಲವು ಪ್ರಮುಖ ಬದಲಾವಣೆಗಳು ಇಂದಿನಿಂದ (ಏಪ್ರಿಲ್ 1) ಜಾರಿಗೆ ಬರುತ್ತಿವೆ. ಪಾನ್ ಕಾರ್ಡ್, ಐಟಿಆರ್ ಫೈಲಿಂಗ್, ಫಾಸ್ಟಾಗ್ ಮತ್ತು ಕ್ರೆಡಿಟ್ ಕಾರ್ಡ್ಗಳಿಗೆ ಸಂಬಂಧಿಸಿದ ಈ ಹೊಸ ನಿಯಮಗಳ ಬಗ್ಗೆ ಪ್ರತಿಯೊಬ್ಬರೂ ತಿಳಿದುಕೊಳ್ಳುವುದು ಅವಶ್ಯಕ.
1. ಪಾನ್ ಕಾರ್ಡ್ ಪಡೆಯಲು ಹೆಚ್ಚಿನ ದಾಖಲೆ ಅಗತ್ಯ
ಇಂದಿನಿಂದ ಪಾನ್ ಕಾರ್ಡ್ (PAN Card) ಪಡೆಯುವ ಪ್ರಕ್ರಿಯೆ ಮತ್ತಷ್ಟು ಕಟ್ಟುನಿಟ್ಟಾಗಲಿದೆ. ಈ ಮೊದಲು ಕೇವಲ ಆಧಾರ್ ಕಾರ್ಡ್ ಮೂಲಕ ಸುಲಭವಾಗಿ ಪಾನ್ ಕಾರ್ಡ್ ಪಡೆಯಬಹುದಿತ್ತು. ಆದರೆ ಈಗ ಆಧಾರ್ ಜೊತೆಗೆ ಈ ಕೆಳಗಿನ ಯಾವುದಾದರೂ ಒಂದು ದಾಖಲೆಯನ್ನು ಸಲ್ಲಿಸುವುದು ಕಡ್ಡಾಯ:
ಜನನ ಪ್ರಮಾಣ ಪತ್ರ (Birth Certificate)
ವೋಟರ್ ಐಡಿ ಅಥವಾ ಡ್ರೈವಿಂಗ್ ಲೈಸೆನ್ಸ್
ಪಾಸ್ಪೋರ್ಟ್ ಅಥವಾ 10ನೇ ತರಗತಿಯ ಅಂಕಪಟ್ಟಿ
ಗಮನಿಸಿ: ಭದ್ರತೆಯ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿದ್ದರೂ, ಇನ್ನು ಮುಂದೆ ಹೊಸ ಪಾನ್ ಕಾರ್ಡ್ ಕೈ ಸೇರಲು ಸ್ವಲ್ಪ ಹೆಚ್ಚಿನ ಸಮಯ ತೆಗೆದುಕೊಳ್ಳಬಹುದು.
2. ಐಟಿಆರ್ (ITR) ಫೈಲಿಂಗ್ ಗಡುವು ಬದಲಾವಣೆ
ಆದಾಯ ತೆರಿಗೆ ಸಲ್ಲಿಕೆಯ ದಿನಾಂಕಗಳಲ್ಲಿ ಬದಲಾವಣೆ ಮಾಡಲಾಗಿದೆ:
ITR-1 ಮತ್ತು ITR-2: ಸಲ್ಲಿಸಲು ಜುಲೈ 31 ಕೊನೆಯ ದಿನವಾಗಿದೆ.
ITR-3 ಮತ್ತು ITR-4: (ಆಡಿಟ್ ಅಗತ್ಯವಿಲ್ಲದ ಪ್ರಕರಣಗಳಿಗೆ) ಸಲ್ಲಿಕೆ ಮಾಡಲು ಆಗಸ್ಟ್ 31ರವರೆಗೆ ಕಾಲಾವಕಾಶ ನೀಡಲಾಗಿದೆ.
3. ಫಾಸ್ಟಾಗ್ (FASTag) ವಾರ್ಷಿಕ ಪಾಸ್ ದರ ಏರಿಕೆ
ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ವಾಹನ ಸವಾರರಿಗೆ ಶಾಕ್ ನೀಡಿದೆ. ಫಾಸ್ಟಾಗ್ ವಾರ್ಷಿಕ ಪಾಸ್ ದರವನ್ನು 3,000 ರೂ.ನಿಂದ 3,075 ರೂ.ಗೆ ಏರಿಸಲಾಗಿದೆ. ಅಂದರೆ ಶೇ. 2.5 ರಷ್ಟು ಹೆಚ್ಚಿನ ಹಣವನ್ನು ಇಂದಿನಿಂದ ಪಾವತಿಸಬೇಕಾಗುತ್ತದೆ.
4. ಮನೆ ಬಾಡಿಗೆ (HRA) ಕ್ಲೈಮ್ ನಿಯಮ ಕಠಿಣ
ತೆರಿಗೆ ವಿನಾಯಿತಿಗಾಗಿ ಸುಳ್ಳು ದಾಖಲೆ ನೀಡುವುದನ್ನು ತಡೆಯಲು HRA ನಿಯಮಗಳನ್ನು ಕಠಿಣಗೊಳಿಸಲಾಗಿದೆ:
ವರ್ಷಕ್ಕೆ 1 ಲಕ್ಷ ರೂಪಾಯಿಗಿಂತ ಹೆಚ್ಚು ಬಾಡಿಗೆ ಪಾವತಿಸುವವರು ಕಡ್ಡಾಯವಾಗಿ ಮನೆ ಮಾಲೀಕರ ಪಾನ್ (PAN) ಸಂಖ್ಯೆ ನೀಡಬೇಕು.
ಮನೆ ಮಾಲೀಕರು ಕುಟುಂಬದ ಸದಸ್ಯರೇ ಎಂಬ ಮಾಹಿತಿಯನ್ನು ಸ್ಪಷ್ಟಪಡಿಸಬೇಕು.
ಇದಕ್ಕಾಗಿ ನೌಕರರು ಇಂದಿನಿಂದ ಪ್ರತ್ಯೇಕ ಫಾರ್ಮ್ ಭರ್ತಿ ಮಾಡುವುದು ಅಗತ್ಯ.
5. ಕ್ರೆಡಿಟ್ ಕಾರ್ಡ್ ಮತ್ತು ಎಟಿಎಂ ವಿತ್ಡ್ರಾ ನಿಯಮಗಳು
ಕ್ರೆಡಿಟ್ ಕಾರ್ಡ್: ಇನ್ಮುಂದೆ ಕ್ರೆಡಿಟ್ ಕಾರ್ಡ್ ಮೂಲಕ ಆದಾಯ ತೆರಿಗೆ ಪಾವತಿಸಬಹುದು (ಹೆಚ್ಚುವರಿ ಶುಲ್ಕ ಅನ್ವಯಿಸುತ್ತದೆ). ವರ್ಷಕ್ಕೆ 10 ಲಕ್ಷ ರೂ.ಗಿಂತ ಹೆಚ್ಚಿನ ಡಿಜಿಟಲ್ ಖರ್ಚು ಅಥವಾ 1 ಲಕ್ಷ ರೂ.ಗಿಂತ ಹೆಚ್ಚಿನ ನಗದು ಪಾವತಿಯ ಮೇಲೆ ಐಟಿ ಇಲಾಖೆ ಕಣ್ಣಿಡಲಿದೆ.
ಎಟಿಎಂ ಬದಲಾವಣೆ: * HDFC ಬ್ಯಾಂಕ್: ಮೆಟ್ರೋ ನಗರಗಳಲ್ಲಿ ಉಚಿತ ವಹಿವಾಟು ಮಿತಿ 3ಕ್ಕೆ ಇಳಿಕೆ.
PNB: ಕೆಲವು ಕಾರ್ಡ್ಗಳ ದಿನದ ವಿತ್ಡ್ರಾ ಮಿತಿಯನ್ನು 1 ಲಕ್ಷ ರೂ.ನಿಂದ 50,000 ರೂ.ಗೆ ಇಳಿಸಿದೆ.
ಬಂಧನ್ ಬ್ಯಾಂಕ್: ತಿಂಗಳಿಗೆ ಕೇವಲ 5 ಉಚಿತ ವಹಿವಾಟುಗಳನ್ನು ಮಾತ್ರ ನೀಡಲಿದೆ.
