ಸಂಬಳ ಪಡೆಯುವ ವರ್ಗಕ್ಕೆ ಮತ್ತು ಸಾಮಾನ್ಯ ಜನರಿಗೆ ಏಪ್ರಿಲ್ 1 ಹಣಕಾಸಿನ ಲೆಕ್ಕಾಚಾರದ ದಿನವಾಗಲಿದೆ. ಸಾಮಾನ್ಯವಾಗಿ ಪ್ರತಿ ತಿಂಗಳ ಮೊದಲನೇ ತಾರೀಖಿನಂದು ಬ್ಯಾಂಕಿಂಗ್, ಫೈನಾನ್ಸ್, ರೈಲ್ವೆ, ಫ್ಲೈಟ್ ಮತ್ತು ಟ್ರಾನ್ಸ್ಪೋರ್ಟ್ಗೆ ಸಂಬಂಧಿಸಿದ ನಿಯಮಗಳಲ್ಲಿ ಯಾವುದಾದರೊಂದು ಬದಲಾವಣೆ ಜಾರಿಗೆ ಬರುತ್ತದೆ. ಆದರೆ, ಏಪ್ರಿಲ್ 1 ರಿಂದ ಹೊಸ ಹಣಕಾಸು ವರ್ಷ 2026-27 ಆರಂಭವಾಗಲಿದೆ. ಹೊಸ ತೆರಿಗೆ ವ್ಯವಸ್ಥೆ ಜಾರಿಗೆ ಬರಲಿದೆ. ಇದರೊಂದಿಗೆ ಪಾನ್ ಕಾರ್ಡ್, ATM ವಹಿವಾಟು, OTP ಆಧಾರಿತ ಪಾವತಿ, ಇನ್ಕಮ್ ಟ್ಯಾಕ್ಸ್ ಫೈಲಿಂಗ್ ನಿಯಮಗಳು, ಟೋಲ್ ಟ್ಯಾಕ್ಸ್, HRA, ಕ್ರೆಡಿಟ್ ಕಾರ್ಡ್ ಮತ್ತು ಡಿಜಿಟಲ್ ಪಾವತಿಗೆ ಸಂಬಂಧಿಸಿದ ಬದಲಾವಣೆಗಳು ಅನ್ವಯವಾಗಲಿವೆ. ಈ ನಿಯಮಗಳು ನೇರವಾಗಿ ನಿಮ್ಮ ಜೇಬಿನ ಮೇಲೆ ಪರಿಣಾಮ ಬೀರಲಿವೆ. ಏಪ್ರಿಲ್ 1 ರಿಂದ ಜಾರಿಗೆ ಬರುವ ಹಣಕಾಸಿಗೆ ಸಂಬಂಧಿಸಿದ ಆ 10 ನಿಯಮಗಳು ಯಾವುವು ಎಂಬುದು ಇಲ್ಲಿದೆ:-
1. ಹೊಸ ಹಣಕಾಸು ವರ್ಷದ ಆರಂಭ
ಹೊಸ ಹಣಕಾಸು ವರ್ಷ (FY 2026-27) ಏಪ್ರಿಲ್ 1 ರಿಂದ ಜಾರಿಗೆ ಬರಲಿದೆ. ಈ ದಿನದಿಂದ ಸಾಮಾನ್ಯ ಬಜೆಟ್ನ ಘೋಷಣೆಗಳು ಮತ್ತು ಅಂಶಗಳು ಜಾರಿಯಾಗುತ್ತವೆ. ಇವುಗಳ ನೇರ ಪರಿಣಾಮ ನಿಮ್ಮ ಮೇಲೆ ಉಂಟಾಗಲಿದೆ. ಫೆಬ್ರವರಿ 1 ರಂದು ಬಜೆಟ್ ಮಂಡಿಸುವಾಗ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಹಲವು ವಸ್ತುಗಳು ಮತ್ತು ಸೇವೆಗಳ ಮೇಲಿನ ತೆರಿಗೆ ಹಾಗೂ ಸರ್ಚಾರ್ಜ್ ಅನ್ನು ಕಡಿತಗೊಳಿಸಿದ್ದಾರೆ, ಇನ್ನು ಕೆಲವು ವಸ್ತುಗಳ ಮೇಲೆ ತೆರಿಗೆ ಹೆಚ್ಚಿಸಲಾಗಿದೆ. ಹೀಗಾಗಿ ಏಪ್ರಿಲ್ 1 ರಿಂದ ಮಾರುಕಟ್ಟೆಯಲ್ಲಿ ಕೆಲವು ವಸ್ತುಗಳು ದುಬಾರಿಯಾಗಲಿವೆ ಮತ್ತು ಕೆಲವು ವಸ್ತುಗಳ ಬೆಲೆ ಕಡಿಮೆಯಾಗಲಿದೆ.
2. ಹೊಸ ಆದಾಯ ತೆರಿಗೆ ಕಾಯ್ದೆ ಜಾರಿ
ದೇಶದಲ್ಲಿ ಏಪ್ರಿಲ್ 1, 2026 ರಿಂದ ಹೊಸ ಆದಾಯ ತೆರಿಗೆ ಕಾಯ್ದೆ 2025 ಜಾರಿಗೆ ಬರಲಿದೆ. ಈ ಹೊಸ ವ್ಯವಸ್ಥೆಯು 1961 ರ ಆದಾಯ ತೆರಿಗೆ ಕಾಯ್ದೆಯನ್ನು ಬದಲಾಯಿಸಲಿದೆ. ಹೊಸ ಕಾಯ್ದೆಯಲ್ಲಿ ‘ಟ್ಯಾಕ್ಸ್ ಇಯರ್’ ಪರಿಕಲ್ಪನೆ, ITR ಗಡುವಿನಲ್ಲಿ ಬದಲಾವಣೆ, F&O ಮೇಲಿನ STT ಹೆಚ್ಚಳ ಮತ್ತು TCS ದರಗಳಲ್ಲಿನ ಬದಲಾವಣೆಗಳು ಸೇರಿವೆ. ಈ ಕಾಯ್ದೆಯ ದೊಡ್ಡ ಬದಲಾವಣೆಯೆಂದರೆ ‘ಅಸೆಸ್ಮೆಂಟ್ ಇಯರ್’ ಮತ್ತು ‘ಪ್ರಿವಿಯಸ್ ಇಯರ್’ ಬದಲಿಗೆ ‘ಟ್ಯಾಕ್ಸ್ ಇಯರ್’ ಎಂದು ಬಳಸಲಾಗುತ್ತದೆ. ಇದರಿಂದ ತೆರಿಗೆದಾರರಿಗೆ ITR ಫೈಲ್ ಮಾಡುವಾಗ ಗೊಂದಲ ಕಡಿಮೆಯಾಗುತ್ತದೆ, ಏಕೆಂದರೆ ಆದಾಯ ಗಳಿಸಿದ ವರ್ಷ ಮತ್ತು ತೆರಿಗೆ ವರದಿ ಮಾಡುವ ವರ್ಷ ಎರಡೂ ಒಂದೇ ಆಗಿರುತ್ತದೆ.
3. ಬದಲಾಗಲಿದೆ ಸಂಬಳದ ರಚನೆ (Salary Structure)
ಉದ್ಯೋಗಿಗಳಿಗೆ ಏಪ್ರಿಲ್ 1, 2026 ರಿಂದ ದೊಡ್ಡ ಬದಲಾವಣೆ ಕಾದಿದೆ. ಅಂದಿನಿಂದ ಹೊಸ ಕಾರ್ಮಿಕ ಸಂಹಿತೆ (New Labour Code) ಜಾರಿಗೆ ಬರಲಿದ್ದು, ಇದು ಉದ್ಯೋಗಿಗಳ ಸಂಬಳ ಮತ್ತು ಮನೆಗೆ ಕೊಂಡೊಯ್ಯುವ ಮೊತ್ತದ (Take Home Salary) ಮೇಲೆ ಪರಿಣಾಮ ಬೀರಲಿದೆ. ಈಗ ಮೂಲ ವೇತನವು (Basic Salary) ಒಟ್ಟು CTC ಯ ಕನಿಷ್ಠ 50% ಇರುವುದು ಕಡ್ಡಾಯವಾಗಲಿದೆ. ಬೇಸಿಕ್ ಸ್ಯಾಲರಿ ಹೆಚ್ಚಾಗುವುದರಿಂದ ನಿಮ್ಮ PF ಮತ್ತು ಗ್ರಾಚ್ಯುಟಿ ಕೂಡ ಹೆಚ್ಚಾಗುತ್ತದೆ. PF ಕಡಿತ ಹೆಚ್ಚಾಗುವುದರಿಂದ ಕೈಗೆ ಸಿಗುವ ಸಂಬಳ ಸ್ವಲ್ಪ ಕಡಿಮೆಯಾಗಬಹುದು. ಹಳೆಯ ತೆರಿಗೆ ಪದ್ಧತಿಯಲ್ಲಿ HRA ವಿನಾಯಿತಿ ಕಡಿಮೆಯಾಗುವುದರಿಂದ ತೆರಿಗೆ ಸ್ವಲ್ಪ ಹೆಚ್ಚಾಗಬಹುದು, ಆದರೆ ಹೊಸ ತೆರಿಗೆ ಪದ್ಧತಿಯವರಿಗೆ ಹೆಚ್ಚಿನ ವ್ಯತ್ಯಾಸವಾಗುವುದಿಲ್ಲ.
4. ರೈಲು ಟಿಕೆಟ್ ನಿಯಮಗಳು ಕಠಿಣ
ಏಪ್ರಿಲ್ 1 ರಿಂದ ರೈಲು ಟಿಕೆಟ್ ರದ್ದತಿ ನಿಯಮಗಳು ಕಠಿಣವಾಗಲಿವೆ. ರೈಲು ಹೊರಡುವ 8 ಗಂಟೆಗಳ ಮೊದಲು ಟಿಕೆಟ್ ಕ್ಯಾನ್ಸಲ್ ಮಾಡಿದರೆ ಯಾವುದೇ ರೀಫಂಡ್ ಸಿಗುವುದಿಲ್ಲ. ಹೊಸ ನಿಯಮದ ಪ್ರಕಾರ:
8 ರಿಂದ 24 ಗಂಟೆ ಮೊದಲು ಕ್ಯಾನ್ಸಲ್ ಮಾಡಿದರೆ: 50% ರೀಫಂಡ್.
24 ರಿಂದ 72 ಗಂಟೆ ಮೊದಲು: 25% ಕಡಿತ.
72 ಗಂಟೆಗಿಂತ ಹೆಚ್ಚು ಸಮಯವಿದ್ದರೆ: ನಿಯಮಾನುಸಾರ ಶುಲ್ಕ ಅನ್ವಯ.
5. ಫಾಸ್ಟ್ಯಾಗ್ (FASTag) ದುಬಾರಿ
ಏಪ್ರಿಲ್ 1 ರಿಂದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪ್ರಯಾಣಿಸುವುದು ಸ್ವಲ್ಪ ದುಬಾರಿಯಾಗಲಿದೆ. ರಸ್ತೆ ಸಾರಿಗೆ ಸಚಿವಾಲಯವು ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಬೆಲೆಯನ್ನು 2.5% ಹೆಚ್ಚಿಸಲು ನಿರ್ಧರಿಸಿದೆ. ಈಗ ಖಾಸಗಿ ವಾಹನ ಮಾಲೀಕರು ವಾರ್ಷಿಕ ಪಾಸ್ಗಾಗಿ 3,000 ರೂ. ಬದಲಿಗೆ 3,075 ರೂ. ಪಾವತಿಸಬೇಕಾಗುತ್ತದೆ. ಅಲ್ಲದೆ, ಏಪ್ರಿಲ್ 1, 2026 ರಿಂದ ಟೋಲ್ ಪ್ಲಾಜಾಗಳಲ್ಲಿ ನಗದು ಪಾವತಿಯನ್ನು ಸಂಪೂರ್ಣವಾಗಿ ನಿಲ್ಲಿಸಲಾಗುವುದು. ಎಲ್ಲಾ ಟೋಲ್ಗಳಲ್ಲಿ ಫಾಸ್ಟ್ಯಾಗ್ ಅಥವಾ UPI ಮೂಲಕ ಮಾತ್ರ ಪಾವತಿಗೆ ಅವಕಾಶವಿರುತ್ತದೆ.
6. ಪಾನ್ ಕಾರ್ಡ್ ನಿಯಮಗಳು ಕಠಿಣ
ಇನ್ನು ಮುಂದೆ ಪಾನ್ ಕಾರ್ಡ್ ಪಡೆಯಲು ಕೇವಲ ಆಧಾರ್ ಕಾರ್ಡ್ ಸಾಕಾಗುವುದಿಲ್ಲ. ಹುಟ್ಟಿದ ದಿನಾಂಕದ (DOB) ಪುರಾವೆಗಾಗಿ 10ನೇ ತರಗತಿ ಪ್ರಮಾಣಪತ್ರ ಅಥವಾ ಪಾಸ್ಪೋರ್ಟ್ ಕಡ್ಡಾಯವಾಗಲಿದೆ. ಈ ನಿಯಮ ಏಪ್ರಿಲ್ 1 ರಿಂದ ಅನ್ವಯವಾಗಲಿದೆ. ನೀವು ಬಾಡಿಗೆ ಮನೆಯಲ್ಲಿದ್ದು, ವರ್ಷಕ್ಕೆ 1 ಲಕ್ಷ ರೂಪಾಯಿಗಿಂತ ಹೆಚ್ಚು ಬಾಡಿಗೆ ನೀಡುತ್ತಿದ್ದರೆ, ಮನೆ ಮಾಲೀಕರ ಪಾನ್ ಕಾರ್ಡ್ ನೀಡುವುದು ಕಡ್ಡಾಯವಾಗಿದೆ.
7. LPG, ಪೆಟ್ರೋಲ್ ಮತ್ತು CNG-PNG ಬೆಲೆಗಳು
ಇರಾನ್ ಯುದ್ಧದ ಕಾರಣದಿಂದಾಗಿ ದೇಶದಲ್ಲಿ ಇಂಧನ ಬಿಕ್ಕಟ್ಟು ಎದುರಾಗಿದೆ. LPG ಸಿಲಿಂಡರ್ಗಳಿಗಾಗಿ ಹಾಹಾಕಾರ ಉಂಟಾಗಿದೆ ಮತ್ತು ಪೆಟ್ರೋಲ್-ಡೀಸೆಲ್ ಪೂರೈಕೆಯಲ್ಲಿ ವ್ಯತ್ಯಯವಾಗಿರುವುದರಿಂದ CNG ಬೇಡಿಕೆ ಹೆಚ್ಚಿದೆ. ಇಂತಹ ಪರಿಸ್ಥಿತಿಯಲ್ಲಿ ಏಪ್ರಿಲ್ 1 ರಂದು LPG ಸಿಲಿಂಡರ್ ಬೆಲೆಗಳಲ್ಲಿ ಬದಲಾವಣೆಯಾಗುವ ಸಾಧ್ಯತೆಯಿದೆ. ಜೊತೆಗೆ CNG, PNG ಮತ್ತು ವಿಮಾನ ಇಂಧನ (ATF) ಬೆಲೆಗಳೂ ಬದಲಾಗಬಹುದು. ಏಪ್ರಿಲ್ 1, 2026 ರಿಂದ ದೇಶಾದ್ಯಂತ ಪೆಟ್ರೋಲ್ನಲ್ಲಿ 20% ಎಥೆನಾಲ್ (E20) ಬೆರೆಸುವುದು ಕಡ್ಡಾಯವಾಗಲಿದೆ, ಇದು ಮಾಲಿನ್ಯ ತಡೆಗೆ ಸಹಕಾರಿ.
8. ATM ವಹಿವಾಟು
ಏಪ್ರಿಲ್ 1 ರಿಂದ ATM ನಿಂದ ಹಣ ಡ್ರಾ ಮಾಡುವುದು ದುಬಾರಿಯಾಗಲಿದೆ. ಉಚಿತ ಮಿತಿ ಮುಗಿದ ನಂತರ ಹಣ ಡ್ರಾ ಮಾಡಿದರೆ ಹೆಚ್ಚಿನ ಶುಲ್ಕ ವಿಧಿಸಲಾಗುತ್ತದೆ. ಹೊಸ ನಿಯಮದಂತೆ, 5 ವಹಿವಾಟುಗಳ ನಂತರ ಪ್ರತಿ ವಹಿವಾಟಿಗೆ 23 ರೂ. ಶುಲ್ಕ ನೀಡಬೇಕಾಗುತ್ತದೆ. ವಹಿವಾಟು ವಿಫಲವಾದರೆ (Failed Transaction) 25 ರೂ. ವರೆಗೆ ದಂಡ ವಿಧಿಸಬಹುದು.
9. OTP ಆಧಾರಿತ ಪಾವತಿ ನಿಯಮಗಳು
ಇಲ್ಲಿಯವರೆಗೆ ಡಿಜಿಟಲ್ ವಹಿವಾಟುಗಳು ಕೇವಲ OTP ಮೂಲಕ ಪೂರ್ಣಗೊಳ್ಳುತ್ತಿದ್ದವು. ಏಪ್ರಿಲ್ 1 ರಿಂದ ಈ ನಿಯಮ ಬದಲಾಗಲಿದೆ. ಹೊಸ ನಿಯಮದ ಪ್ರಕಾರ ಪ್ರತಿ ಆನ್ಲೈನ್ ಪಾವತಿಗೆ ಕನಿಷ್ಠ ಎರಡು ಹಂತದ ದೃಢೀಕರಣ (Two Verification Factor) ಅಗತ್ಯವಿರುತ್ತದೆ. ಇದು ಸೈಬರ್ ವಂಚನೆ ತಡೆಯಲು ಸಹಾಯ ಮಾಡುತ್ತದೆ. ಕೆಲವು ಬ್ಯಾಂಕುಗಳು ಡೆಬಿಟ್ ಕಾರ್ಡ್ ನಗದು ಮಿತಿಯನ್ನು 1 ಲಕ್ಷ ರೂ. ನಿಂದ 50,000 – 75,000 ರೂ. ಗೆ ಇಳಿಸಿವೆ.
10. ಶೇರ್ ಮಾರ್ಕೆಟ್ ನಿಯಮಗಳಲ್ಲಿ ಬದಲಾವಣೆ
ಏಪ್ರಿಲ್ 1, 2026 ರಿಂದ ಶೇರ್ ಮಾರ್ಕೆಟ್ ನಿಯಮಗಳೂ ಬದಲಾಗಲಿವೆ. ಕಂಪನಿಗಳು ನೀಡುವ ‘ಶೇರ್ ಬೈಬ್ಯಾಕ್’ ಅನ್ನು ಈವರೆಗೆ ಡಿವಿಡೆಂಡ್ ಎಂದು ಪರಿಗಣಿಸಲಾಗುತ್ತಿತ್ತು, ಆದರೆ ಏಪ್ರಿಲ್ 1 ರಿಂದ ಇದನ್ನು ‘ಕ್ಯಾಪಿಟಲ್ ಗೇನ್ಸ್’ ಎಂದು ಪರಿಗಣಿಸಲಾಗುತ್ತದೆ. ಹೂಡಿಕೆದಾರರು ಈಗ ಕೇವಲ ತಮ್ಮ ಲಾಭದ ಮೇಲೆ ತೆರಿಗೆ ಪಾವತಿಸಬೇಕಾಗುತ್ತದೆ. ಕಾರ್ಪೊರೇಟ್ ಪ್ರವರ್ತಕರಿಗೆ ಈ ದರ 22% ಮತ್ತು ಇತರರಿಗೆ 30% ವರೆಗೆ ಇರಬಹುದು. F&O ಟ್ರೇಡಿಂಗ್ ಕೂಡ ದುಬಾರಿಯಾಗಲಿದ್ದು, ಫ್ಯೂಚರ್ಸ್ ಟ್ರೇಡಿಂಗ್ ಮೇಲಿನ STT ಅನ್ನು 0.02% ರಿಂದ 0.05% ಗೆ ಮತ್ತು ಆಪ್ಷನ್ಸ್ ಮೇಲಿನ ಶುಲ್ಕವನ್ನು 0.1% ರಿಂದ 0.15% ಗೆ ಹೆಚ್ಚಿಸಲಾಗಿದೆ.
