ಬೈರೂತ್/ಜೆರುಸಲೇಂ: ದಕ್ಷಿಣ ಲೆಬನಾನ್ನಲ್ಲಿ ಇಸ್ರೇಲ್ ಮತ್ತು ಹೆಬೊಲ್ಲಾ ನಡುವಿನ ಯುದ್ಧವು ಅತ್ಯಂತ ಭೀಕರ ಹಂತಕ್ಕೆ ತಲುಪಿದೆ. ಗಡಿಯತ್ತ ಮುನ್ನುಗ್ಗುತ್ತಿರುವ ಇಸ್ರೇಲಿ ಭೂಸೇನೆ ಗುರಿಪಡಿಸಿ ಹೆಬೊಲ್ಲಾ ಸರಣಿ ಕ್ಷಿಪಣಿ ದಾಳಿ ನಡೆಸಿದ್ದರೆ, ಇತ್ತ ಇಸ್ರೇಲ್ ವಾಯುಪಡೆಯು ಲೆಬನಾನ್ನ ಹಲವಾರು ಗ್ರಾಮಗಳನ್ನು ಧ್ವಂಸಗೊಳಿಸುತ್ತಿದೆ.
ಯುದ್ಧ ಭೂಮಿಯ ಪ್ರಮುಖ ಬೆಳವಣಿಗೆಗಳು:
ಸೈನಿಕರ ಮೇಲೆ ಕ್ಷಿಪಣಿ ದಾಳಿ: ದಕ್ಷಿಣ ಲೆಬನಾನ್ನ ‘ಖಜ್ಜಾನ್ ಹಿಲ್’ (al-Khazzan Hill) ಮತ್ತು ‘ಓದೈಸ್ಸೆ’ (Odaisseh) ಪ್ರದೇಶಗಳಲ್ಲಿ ಜಮಾಯಿಸಿದ್ದ ಇಸ್ರೇಲಿ ಸೈನಿಕರ ಗುಂಪನ್ನು ಗುರಿಯಾಗಿಸಿಕೊಂಡು ಹೆಬೊಲ್ಲಾ ‘ಗೈಡೆಡ್ ಮಿಸೈಲ್’ (Guided Missiles) ಮತ್ತು ರಾಕೆಟ್ ದಾಳಿ ನಡೆಸಿದೆ. ಇಸ್ರೇಲ್ನ ಸೇನಾ ವಾಹನಗಳು ಮತ್ತು ಟ್ಯಾಂಕರ್ಗಳನ್ನು ನಾಶಪಡಿಸಿರುವುದಾಗಿ ಹೆಬೊಲ್ಲಾ ಪ್ರತಿಪಾದಿಸಿದೆ.
ಗ್ರಾಮಗಳ ಮೇಲೆ ವಾಯುದಾಳಿ: ಇಸ್ರೇಲಿ ಯುದ್ಧ ವಿಮಾನಗಳು ದಕ್ಷಿಣ ಲೆಬನಾನ್ನ ಮೆಫ್ಡೂನ್, ಝೌತರ್, ಯಹ್ಮರ್ ಮತ್ತು ಅರ್ನೂನ್ ಸೇರಿದಂತೆ ಹಲವು ಜನವಸತಿ ಗ್ರಾಮಗಳ ಮೇಲೆ ಭಾರಿ ಬಾಂಬ್ ದಾಳಿ ನಡೆಸಿವೆ. ಈ ದಾಳಿಯಲ್ಲಿ ಹಲವಾರು ಮನೆಗಳು ನೆಲಸಮವಾಗಿದ್ದು, ನಾಗರಿಕರು ಪ್ರಾಣಭಯದಿಂದ ಉತ್ತರಕ್ಕೆ ವಲಸೆ ಹೋಗುತ್ತಿದ್ದಾರೆ.
ಮುಖಾಮುಖಿ ಸಂಘರ್ಷ: ಗಡಿ ಗ್ರಾಮವಾದ ‘ಐತಾ ಅಲ್-ಶಾಬ್’ (Aita al-Shaab) ಪ್ರವೇಶಿಸಲು ಪ್ರಯತ್ನಿಸಿದ ಇಸ್ರೇಲಿ ಪಡೆಗಳನ್ನು ಹೆಬೊಲ್ಲಾ ಉಗ್ರರು ತಡೆದಿದ್ದು, ಅಲ್ಲಿ ತೀವ್ರವಾದ ಗುಂಡಿನ ಚಕಮಕಿ ನಡೆದಿದೆ ಎಂದು ವರದಿಗಳು ತಿಳಿಸಿವೆ.
ಸಾವು-ನೋವು: ಕಳೆದ 24 ಗಂಟೆಗಳಲ್ಲಿ ಇಸ್ರೇಲ್ ನಡೆಸಿದ ದಾಳಿಯಲ್ಲಿ ಲೆಬನಾನ್ನ ಹಲವು ವೈದ್ಯಕೀಯ ಸಿಬ್ಬಂದಿ ಸೇರಿದಂತೆ ಕನಿಷ್ಠ 26 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಲೆಬನಾನ್ ಆರೋಗ್ಯ ಸಚಿವಾಲಯ ತಿಳಿಸಿದೆ.
