ಬೆಂಗಳೂರು: ನೀವು ಹೊಸ ಲ್ಯಾಪ್ಟಾಪ್ ಅಥವಾ ಡೆಸ್ಕ್ಟಾಪ್ ಖರೀದಿಸುವ ಪ್ಲಾನ್ ಮಾಡಿದ್ದೀರಾ? ಹಾಗಿದ್ದರೆ ಇನ್ನು ತಡಮಾಡಬೇಡಿ. ಮುಂದಿನ ಕೆಲವು ತಿಂಗಳಲ್ಲಿ ಕಂಪ್ಯೂಟರ್ ಉಪಕರಣಗಳ ಬೆಲೆಯಲ್ಲಿ ಬರೊಬ್ಬರಿ ಶೇ. 35ರಷ್ಟು ಭಾರಿ ಏರಿಕೆಯಾಗುವ ಸಾಧ್ಯತೆಯಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಮುನ್ಸೂಚನೆ ನೀಡಿದ್ದಾರೆ.
ಬೆಲೆ ಏರಿಕೆಗೆ ಅಸಲಿ ಕಾರಣಗಳೇನು?
ಕಂಪ್ಯೂಟರ್ ಮಾರುಕಟ್ಟೆಯಲ್ಲಿ ಈ ದಿಢೀರ್ ಏರಿಕೆಗೆ ಪ್ರಮುಖವಾಗಿ ಮೂರು ಕಾರಣಗಳನ್ನು ಗುರುತಿಸಲಾಗಿದೆ:
ಬಿಡಿಭಾಗಗಳ ಬೆಲೆ ಏರಿಕೆ: ಕಂಪ್ಯೂಟರ್ನ ಪ್ರಮುಖ ಭಾಗಗಳಾದ ಪ್ರೊಸೆಸರ್, ಗ್ರಾಫಿಕ್ಸ್ ಕಾರ್ಡ್ (GPU) ಮತ್ತು ಮೆಮೊರಿ (RAM) ಬೆಲೆಗಳು ಗಗನಕ್ಕೇರುತ್ತಿವೆ. ವಿಶೇಷವಾಗಿ DDR RAM ಬೆಲೆ ಈಗಾಗಲೇ 2.5 ರಿಂದ 3 ಪಟ್ಟು ಹೆಚ್ಚಾಗಿದೆ.
AI ತಂತ್ರಜ್ಞಾನದ ಅಬ್ಬರ: ಪ್ರಸ್ತುತ ವಿಶ್ವದಾದ್ಯಂತ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಡೇಟಾ ಸೆಂಟರ್ಗಳಿಗೆ ಬೇಡಿಕೆ ಹೆಚ್ಚಿದೆ. ತಯಾರಕರು ಹೆಚ್ಚಿನ ಬಿಡಿಭಾಗಗಳನ್ನು ಈ ಸೆಂಟರ್ಗಳಿಗೆ ಪೂರೈಸುತ್ತಿರುವುದರಿಂದ, ಸಾಮಾನ್ಯ ಗ್ರಾಹಕರಿಗೆ ಬಿಡಿಭಾಗಗಳ ಕೊರತೆ ಉಂಟಾಗಿದೆ.
ಜಾಗತಿಕ ಸಂಘರ್ಷ: ಪಶ್ಚಿಮ ಏಷ್ಯಾದಲ್ಲಿನ ಯುದ್ಧದ ಭೀತಿಯು ಸೆಮಿಕಂಡಕ್ಟರ್ ತಯಾರಿಕೆಗೆ ಅಗತ್ಯವಾದ ಇಂಧನ ಮತ್ತು ಪೆಟ್ರೋಕೆಮಿಕಲ್ ಪೂರೈಕೆಯ ಮೇಲೆ ಪರಿಣಾಮ ಬೀರಿದೆ.
ನಿಮ್ಮ ಜೇಬಿಗೆ ಎಷ್ಟು ಹೊರೆ?
ಮಾರುಕಟ್ಟೆ ತಜ್ಞರ ಪ್ರಕಾರ, ಈಗಾಗಲೇ ಬೆಲೆಗಳು ಶೇ. 10–12 ರಷ್ಟು ಏರಿಕೆಯಾಗಿವೆ. ಈ ಮಾರ್ಚ್ ಅಂತ್ಯದ ವೇಳೆಗೆ ಮತ್ತೊಮ್ಮೆ ಶೇ. 8–10 ರಷ್ಟು ಹೆಚ್ಚಳವಾಗುವ ನಿರೀಕ್ಷೆಯಿದೆ.
“ಹಿಂದೆ ₹35,000ಕ್ಕೆ ಸಿಗುತ್ತಿದ್ದ ಲ್ಯಾಪ್ಟಾಪ್ಗಳು ಈಗ ₹45,000ರ ಗಡಿ ತಲುಪುತ್ತಿವೆ. ಇದು ವಿದ್ಯಾರ್ಥಿಗಳು ಮತ್ತು ಸಾಮಾನ್ಯ ವರ್ಗದವರಿಗೆ ದೊಡ್ಡ ಹೊರೆಯಾಗಲಿದೆ.”
2027ರವರೆಗೆ ಇಳಿಕೆಯಿಲ್ಲ!
ಗ್ರಾಹಕರಿಗೆ ಮತ್ತೊಂದು ಆತಂಕಕಾರಿ ವಿಷಯವೆಂದರೆ, ಈ ಬೆಲೆ ಏರಿಕೆಯ ಪ್ರವೃತ್ತಿ 2027ರ ದ್ವಿತೀಯಾರ್ಧದವರೆಗೆ ಮುಂದುವರಿಯಲಿದೆ. ಅಂದರೆ ಮುಂದಿನ 6-7 ತ್ರೈಮಾಸಿಕಗಳವರೆಗೆ ಬೆಲೆ ಇಳಿಕೆಯ ಲಕ್ಷಣಗಳಿಲ್ಲ.
ಮಾರುಕಟ್ಟೆಯ ಇಂದಿನ ಸ್ಥಿತಿ:
ಭಾರತದಲ್ಲಿ ಮಾರಾಟ: 2025ರಲ್ಲಿ ದಾಖಲೆಯ 1.59 ಕೋಟಿ ಕಂಪ್ಯೂಟರ್ಗಳು ಮಾರಾಟವಾಗಿವೆ (ಶೇ. 10.2 ಏರಿಕೆ).
ಟಾಪ್ ಕಂಪನಿಗಳು: HP ಮೊದಲ ಸ್ಥಾನದಲ್ಲಿದ್ದರೆ, ನಂತರದ ಸ್ಥಾನಗಳಲ್ಲಿ Lenovo, Dell, Acer ಮತ್ತು Asus ಇವೆ.
