ಗದಗ: ಜಿಲ್ಲೆಯಲ್ಲಿ ಸುರಿಯುತ್ತಿರುವಂತ ಭಾರೀ ಮಳೆಯಿಂದಾಗಿ ( Heavy Rain ) ಹಳ್ಳ-ಕೊಳ್ಳಗಳು ಉಕ್ಕಿ ಹರಿಯುತ್ತಿವೆ. ಈ ನಡುವೆಯೂ ಆಟೋದಲ್ಲಿ ತಮ್ಮ ಇಬ್ಬರು ಮಕ್ಕಳ ಸಹಿತ ಪ್ರಯಾಣಿಕರೊಂದಿಗೆ ಹಳ್ಳ ದಾಟುತ್ತಿದ್ದಂತ ಸಂದರ್ಭದಲ್ಲಿ, ಆಟೋ ಕೊಚ್ಚಿಕೊಂಡು ಹೋಗಿದೆ. ಈ ವೇಳೆ ಪವಾಡಸಾದೃಶ್ಯ ರೀತಿಯಲ್ಲಿ ನಾಲ್ವರು ಪಾರಾಗಿದ್ದಾರೆ.
ಗದಗ ತಾಲೂಕಿನ ಹುಲುಕೋಟಿ ಗ್ರಾಮದ ಸಮೀಪದಲ್ಲಿ ಹಳ್ಳವೊಂದನ್ನು ಆಟೋ ಚಾಲಕ ಕರಿಯಪ್ಪ ತನ್ನ ಇಬ್ಬರು ಮಕ್ಕಳು ಹಾಗೂ ಮತ್ತೊಬ್ಬ ಪ್ರಯಾಣಿಕರೊಂದಿಗೆ ದಾಟುತ್ತಿದ್ದರು. ಈ ವೇಳೆ ರಬಸವಾಗಿ ಹರಿಯುತ್ತಿದ್ದಂತ ನೀರಿನಲ್ಲಿ ಆಟೋ ಕೊಚ್ಚಿ ಹೋಗಿದೆ.
ಆಟೋ ನೀರಿನಲ್ಲಿ ಕೊಚ್ಚಿ ಹೋಗುತ್ತಿದ್ದಂತ ಚಾಲಕ ಕರಿಯಪ್ಪ ತನ್ನ ಇಬ್ಬರು ಮಕ್ಕಳಾದಂತ ಪ್ರವೀಣ್, ಸಾನ್ವಿಯನ್ನು ಗಟ್ಟಿಯಾಗಿ ಹಿಡಿದಿದ್ದಾರೆ. ಇದನ್ನು ಗಮನಿಸಿದಂತ ಸ್ಥಳೀಯರು, ನೆರವಿಗೆ ಬಂದು ಕರಿಯಪ್ಪ, ಅವರ ಇಬ್ಬರು ಮಕ್ಕಳು ಹಾಗೂ ಮತ್ತೋರ್ವ ಪ್ರಯಾಣಿಕನನ್ನು ನೀರಿನಿಂದ ರಕ್ಷಿಸಿದ್ದಾರೆ. ಈ ಮೂಲಕ ಪ್ರಾಣಾಪಾಯದಿಂದ ಪಾರಾಗುವಂತೆ ಆಗಿದೆ.
