ಬೆಂಗಳೂರು: ಅಪ್ರಾಪ್ತ ಬಾಲಕ (7) ಮೇಲೆ ಎರಡು ಪಿಟ್ ಬುಲ್ ನಾಯಿಗಳು ಗಳು ಮಾರಣಾಂತಿಕ ಹಲ್ಲೆ ನಡೆಸಿದ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ಈ ದಾಳಿಯಲ್ಲಿ ಬಾಲಕ ಮುಖ ವಿರೂಪವಾಗಿದೆ ಎನ್ನಲಾಗಿದೆ. ಸುಮಾರು 58 ಹೊಲಿಗೆಗಳನ್ನು ಹಾಕಲಾಗಿದೆ.
ಬಾಲಕನನ್ನು ಲಿಥಿನ್ ಎಂದು ಗುರುತಿಸಲಾಗಿದ್ದು, 2ನೇ ತರಗತಿ ವಿದ್ಯಾರ್ಥಿಯಾಗಿದ್ದಾನೆ. ಬಾಲಕನ ಮೇಲೆ ಸತತ ಎರಡನೇ ಬಾರಿಗೆ ಎರಡು ಪಿಟ್ ಬುಲ್ ಗಳು ದಾಳಿ ನಡೆಸಿವೆ ಎನ್ನಲಾಗಿದೆ.
ಬಾಲಕನ ತಂದೆ ಅರುಣ್ ಅವರು ಕಟ್ಟಡದ ಮಾಲೀಕ ಅನಿಲ್ ಕುಮಾರ್ ಸೇರಿದಂತೆ ನಾಯಿಯ ಮಾಲೀಕ ರಂಜಿತ್ (26) ವಿರುದ್ಧ ದೂರು ದಾಖಲಿಸಿದ್ದಾರೆ. ರಂಜಿತ್ ಮೊದಲ ಮಹಡಿಯಲ್ಲಿ ವಾಸಿಸುತ್ತಿದ್ದರೆ, ಅರುಣ್ ಅವರ ಕುಟುಂಬವು ನೆಲಮಹಡಿಯಲ್ಲಿ ವಾಸಿಸುತ್ತಿದೆ. ಸುಮಾರು ಏಳು ತಿಂಗಳ ಹಿಂದೆ, ಅದೇ ನಾಯಿಗಳು ಬಾಲಕ ಮತ್ತು ಅವನ ತಾಯಿಯ ಮೇಲೆ ದಾಳಿ ಮಾಡಿದ್ದವು. ಮಕ್ಕಳು ಆಟವಾಡುತ್ತಿರುವಾಗ ನಾಯಿಗಳನ್ನು ಬಿಚ್ಚಿಡಬೇಡಿ ಎಂದು ಕಟ್ಟಡದ ಮಾಲೀಕರು ಬಾಡಿಗೆದಾರನಿಗೆ ಎಚ್ಚರಿಕೆ ನೀಡಿದ್ದರು ಎನ್ನಲಾಗಿದೆ.
“ನಾಯಿಗಳ ಕಡಿತದಿಂದಾಗಿ ನನ್ನ ಮಗನ ಮುಖದ ಬಲಭಾಗವು ವಿರೂಪಗೊಂಡಿದೆ, ಮತ್ತು ಅವನಿಗೆ 58 ಹೊಲಿಗೆಗಳನ್ನು ಹಾಕಲಾಗಿದೆ ಅವನು ನೋವನ್ನು ತಾಳಿಕೊಳ್ಳಲು ಅಸಮರ್ಥನಾಗಿದ್ದಾನೆ, ಮತ್ತು ಅವನ ಸ್ಥಿತಿ ಗಂಭೀರವಾಗಿದೆ. ರಂಜಿತ್ ದೂರನ್ನು ಹಿಂತೆಗೆದುಕೊಳ್ಳುವಂತೆ ನಮ್ಮನ್ನು ವಿನಂತಿಸಿದರು ಮತ್ತು ಅವರು ಎಲ್ಲಾ ವೈದ್ಯಕೀಯ ವೆಚ್ಚಗಳನ್ನು ಭರಿಸುವುದಾಗಿ ಭರವಸೆ ನೀಡಿದರು. ಆದರೆ ನಾನು ಅವರ ಮಾತನ್ನು ನಿರಾಕರಿಸಿದೆ” ಎಂದು ಅರುಣ್ ದುರಂತ ಘಟನೆಯ ಬಗ್ಗೆ ವಿವರಿಸುವಾಗ ಹೇಳಿದ್ದಾರೆ.
