ನವದೆಹಲಿ:ವಿಮಾನ ನಿಲ್ದಾಣಗಳ ಅಂತರಾಷ್ಟ್ರೀಯ ಮಂಡಳಿ (ACI) 2025ನೇ ಸಾಲಿನ ವಿಶ್ವದ ಅತ್ಯಂತ ಜನದಟ್ಟಣೆಯ ವಿಮಾನ ನಿಲ್ದಾಣಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಈ ಪಟ್ಟಿಯಲ್ಲಿ ಅಮೆರಿಕದ ವಿಮಾನ ನಿಲ್ದಾಣಗಳು ಪ್ರಾಬಲ್ಯ ಸಾಧಿಸಿದ್ದು, ಅಚ್ಚರಿಯ ಬೆಳವಣಿಗೆಯೆಂದರೆ ಭಾರತದ ಯಾವುದೇ ವಿಮಾನ ನಿಲ್ದಾಣ ಈ ಬಾರಿ ‘ಟಾಪ್ 10’ ಪಟ್ಟಿಯಲ್ಲಿ ಸ್ಥಾನ ಪಡೆದಿಲ್ಲ. ಅಮೆರಿಕದ ಅಟ್ಲಾಂಟಾ ವಿಮಾನ ನಿಲ್ದಾಣವು ಸತತವಾಗಿ ತನ್ನ ಮೊದಲ ಸ್ಥಾನವನ್ನು ಕಾಯ್ದುಕೊಂಡಿದೆ.
ಅಮೆರಿಕದ ಜಾರ್ಜಿಯಾ ರಾಜ್ಯದ ಹಾರ್ಟ್ಸ್ಫೀಲ್ಡ್-ಜಾಕ್ಸನ್ ಅಟ್ಲಾಂಟಾ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ (ATL) ವಿಶ್ವದ ಅತ್ಯಂತ ಜನದಟ್ಟಣೆಯ ವಿಮಾನ ನಿಲ್ದಾಣವಾಗಿ ಹೊರಹೊಮ್ಮಿದೆ. 2025ರಲ್ಲಿ ಈ ನಿಲ್ದಾಣವು ಸುಮಾರು 10.63 ಕೋಟಿ ಪ್ರಯಾಣಿಕರನ್ನು ನಿಭಾಯಿಸಿದೆ. ಕಳೆದ 28 ವರ್ಷಗಳಲ್ಲಿ 27 ಬಾರಿ ಈ ನಿಲ್ದಾಣವು ಅಗ್ರಸ್ಥಾನ ಪಡೆದಿರುವುದು ವಿಶೇಷ.
ವಿಶ್ವದ ಟಾಪ್ 5 ಬಿಜಿ ವಿಮಾನ ನಿಲ್ದಾಣಗಳು:
ಅಟ್ಲಾಂಟಾ (ATL), ಅಮೆರಿಕ: 10.63 ಕೋಟಿ ಪ್ರಯಾಣಿಕರು.
ದುಬೈ (DXB), ಯುಎಇ: 9.52 ಕೋಟಿ ಪ್ರಯಾಣಿಕರು (ಅಂತರಾಷ್ಟ್ರೀಯ ಪ್ರಯಾಣಿಕರ ದಟ್ಟಣೆಯಲ್ಲಿ ನಂ. 1).
ಟೋಕಿಯೋ ಹನೆಡಾ (HND), ಜಪಾನ್: 9.17 ಕೋಟಿ ಪ್ರಯಾಣಿಕರು.
ಡಲ್ಲಾಸ್ ಫೋರ್ಟ್ ವರ್ತ್ (DFW), ಅಮೆರಿಕ: 8.57 ಕೋಟಿ ಪ್ರಯಾಣಿಕರು.
ಶಾಂಘೈ ಪುಡಾಂಗ್ (PVG), ಚೀನಾ: 8.50 ಕೋಟಿ ಪ್ರಯಾಣಿಕರು.
ದೆಹಲಿಯ ಇಂದಿರ ಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ (IGI) ಅಗ್ರ ಹತ್ತರ ಪಟ್ಟಿಯ ಹತ್ತಿರವಿತ್ತು. ಆದರೆ, 2025ರ ಒಟ್ಟು ಪ್ರಯಾಣಿಕರ ದಟ್ಟಣೆಯ ವಾರ್ಷಿಕ ಪಟ್ಟಿಯಲ್ಲಿ ಭಾರತದ ಯಾವುದೇ ವಿಮಾನ ನಿಲ್ದಾಣ ಮೊದಲ ಹತ್ತು ಸ್ಥಾನಗಳಲ್ಲಿ ಕಾಣಿಸಿಕೊಂಡಿಲ್ಲ. ಆದಾಗ್ಯೂ, ಏಷ್ಯಾ-ಪೆಸಿಫಿಕ್ ವಲಯದಲ್ಲಿ ದೆಹಲಿ ವಿಮಾನ ನಿಲ್ದಾಣವು ವೇಗವಾಗಿ ಬೆಳೆಯುತ್ತಿರುವ ನಿಲ್ದಾಣಗಳಲ್ಲಿ ಒಂದಾಗಿ ಮುಂದುವರಿದಿದೆ.
