ಸತತ 12 ವರ್ಷಗಳ ಕಾಲ ಅಧಿಕಾರಾವಧಿ ಪೂರೈಸುವ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಅವರು ಬುಧವಾರದಂದು ದೇಶದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರು ಅವರ ದಾಖಲೆಯನ್ನು ಮೀರಿ, ಅತ್ಯಂತ ದೀರ್ಘಾವಧಿ ಸೇವೆ ಸಲ್ಲಿಸಿದ ಚುನಾಯಿತ ಸರ್ಕಾರದ ಮುಖ್ಯಸ್ಥರಾಗಿ ಇತಿಹಾಸವನ್ನು ಪುನಃ ಬರೆದಿದ್ದಾರೆ. ಈ ಐತಿಹಾಸಿಕ ಮೈಲಿಗಲ್ಲನ್ನು ಆಚರಿಸಲು ನವದೆಹಲಿಯ ಭಾರತ್ ಮಂಟಪದಲ್ಲಿ ಆಯೋಜಿಸಲಾಗಿದ್ದ ರಾಷ್ಟ್ರೀಯ ಪ್ರಜಾಪ್ರಭುತ್ವ ಒಕ್ಕೂಟದ (NDA) ನಾಯಕರ ಪ್ರಮುಖ ಸಭೆಯಲ್ಲಿ ಬುಧವಾರ ಸಂಜೆ ಪ್ರಧಾನಿಯವರು ಭಾಗವಹಿಸಿದ್ದರು.
ಸಭೆಯ ಬೆನ್ನಲ್ಲೇ ಎನ್ಡಿಎ (NDA) ಸಮಾವೇಶವನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, ಕಳೆದ 12 ವರ್ಷಗಳಲ್ಲಿ ಬಿಜೆಪಿ ನೇತೃತ್ವದ ಎನ್ಡಿಎ ಸರ್ಕಾರದ ಸಾಧನೆಗಳನ್ನು ಒತ್ತಿ ಹೇಳಿದರು.
ಪ್ರಧಾನಿ ಮೋದಿಯವರ ಭಾಷಣದ ಪ್ರಮುಖ ಮುಖ್ಯಾಂಶಗಳು (Top Quotes):
”2014ರಲ್ಲಿ ಎನ್ಡಿಎ ಗೆದ್ದಾಗ, ಅದು ಒಂದು ಹೊಸ ಭರವಸೆಯ ಮುಂಜಾವಾಗಿತ್ತು.”
”ನಮ್ಮ ಮೇಲೆ ದೊಡ್ಡ ಜವಾಬ್ದಾರಿಯಿತ್ತು, ಕಾಂಗ್ರೆಸ್ನ ನಂಬಿಕೆ ದ್ರೋಹದಿಂದ ತತ್ತರಿಸಿದ್ದ ಜನರು ನಮ್ಮ ಮೇಲಿಟ್ಟ ನಂಬಿಕೆಯನ್ನು ನಾವು ಗೌರವಿಸಬೇಕಾಗಿತ್ತು.”
”ನಾವು ನವ ಮಧ್ಯಮ ವರ್ಗವನ್ನು (Neo-Middle Class) ಯಾವುದೇ ಕಾರಣಕ್ಕೂ ಕೈಬಿಡುವುದಿಲ್ಲ.”
”ದೇಶವು ನಮ್ಮಿಂದ ಸಾಕಷ್ಟು ನಿರೀಕ್ಷಿಸುತ್ತಿದೆ, ನಾವು ಅವರ ಆಶೋತ್ತರಗಳನ್ನು ಗೌರವಿಸಬೇಕಾಗಿದೆ.”
”ವಿಕಸಿತ ಭಾರತ ಎಂಬುದು ಪಕ್ಷಗಳು ಮತ್ತು ರಾಜಕೀಯವನ್ನು ಮೀರಿ ನಿಂತಿದೆ, ಅದು ಈಗ ಪ್ರತಿಯೊಬ್ಬರ ಗುರಿಯಾಗಿದೆ.”
”ಕೆಲಸಗಳು ನಿಧಾನವಾಗಿ ಸಾಗುತ್ತವೆ, ಭಾರತವು ವೇಗವಾಗಿ ಮುನ್ನಡೆಯುವ ದೇಶವಲ್ಲ ಎಂಬ ಭಾವನೆಯನ್ನು ಕಾಂಗ್ರೆಸ್ ದೇಶದಲ್ಲಿ ಮೂಡಿಸಿತ್ತು.”
”ಕಾಂಗ್ರೆಸ್ ಆಡಳಿತದಲ್ಲಿ ಯೋಜನೆಗಳು ನೆನೆಗುದಿಗೆ ಬೀಳುತ್ತಿದ್ದವು, ಆದರೆ ಎನ್ಡಿಎ ಅವಧಿಯಲ್ಲಿ ಯೋಜನೆಗಳು ಸಮಯಕ್ಕೆ ಸರಿಯಾಗಿ ಪೂರ್ಣಗೊಳ್ಳುತ್ತಿವೆ.”
”ಹಿಂದೆ ಭಾರತೀಯರು ಆಮದು ಮಾಡಿಕೊಂಡ ಮೊಬೈಲ್ಗಳನ್ನು ಖರೀದಿಸುತ್ತಿದ್ದರು, ಈಗ ನಾವು ಭಾರತದಲ್ಲೇ ಫೋನ್ಗಳನ್ನು ತಯಾರಿಸುತ್ತಿದ್ದೇವೆ.”
”2014ರ ನಂತರ ಡಿಜಿಟಲ್ ವಹಿವಾಟುಗಳು ಭಾರಿ ಉತ್ತೇಜನವನ್ನು ಕಂಡಿವೆ.”
”ಭಾರತ ಮಾತೆಗೆ ಇಷ್ಟು ಸುದೀರ್ಘ ಕಾಲ ಸೇವೆ ಸಲ್ಲಿಸುವ ಸೌಭಾಗ್ಯ ಸಿಕ್ಕಿರುವುದು ದೇವರ ವಿಶೇಷ ಅನುಗ್ರಹದಿಂದ ಮಾತ್ರ ಸಾಧ್ಯ. ಮತ್ತು ನನಗೆ, ಈ ದೇಶದ ಜನರೇ ದೇವರ ಸ್ವರೂಪ.”
ಎನ್ಡಿಎ ಸರ್ಕಾರವು ಅಧಿಕಾರದಲ್ಲಿ 12 ವರ್ಷಗಳನ್ನು ಪೂರೈಸಿದ ಹಿನ್ನೆಲೆಯಲ್ಲಿ ದೇಶ ಮತ್ತು ವಿದೇಶಗಳಿಂದ ಅಭಿನಂದನೆಗಳ ಮಹಾಪೂರವೇ ಹರಿದುಬಂದಿದ್ದು, ಹಲವು ಜಾಗತಿಕ ನಾಯಕರು ಪ್ರಧಾನಮಂತ್ರಿಯವರಿಗೆ ತಮ್ಮ ಶುಭಾಶಯಗಳನ್ನು ತಿಳಿಸಿದ್ದಾರೆ.
