ಜಗತ್ತನ್ನೇ ಆತಂಕಕ್ಕೆ ತಳ್ಳಿದ್ದ ಅಮೆರಿಕ ಮತ್ತು ಇರಾನ್ ನಡುವಿನ ಭೀಕರ ಸಂಘರ್ಷವು ಅಂತ್ಯಗೊಳ್ಳುವ ಸ್ಪಷ್ಟ ಮುನ್ಸೂಚನೆ ಸಿಕ್ಕಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು “ಇನ್ನ ಎರಡರಿಂದ ಮೂರು ವಾರಗಳಲ್ಲಿ” (Two To Three Weeks) ಯುದ್ಧ ಪರಿಸ್ಥಿತಿ ತಿಳಿಯಾಗಲಿದೆ ಮತ್ತು ಅಮೆರಿಕದ ಸೇನೆಯು ಇರಾನ್ನಿಂದ “ಅತೀ ಶೀಘ್ರದಲ್ಲಿ” (Very Soon) ಹೊರಬರಲಿದೆ ಎಂದು ಘೋಷಿಸಿದ್ದಾರೆ.
ಶ್ವೇತಭವನದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಟ್ರಂಪ್, “ನಾವು ಅಲ್ಲಿ ದೀರ್ಘಕಾಲ ಇರಲು ಬಯಸುವುದಿಲ್ಲ. ನಮ್ಮ ಗುರಿ ಸಾಧನೆಯಾಗಿದೆ ಮತ್ತು ಮುಂದಿನ 2-3 ವಾರಗಳಲ್ಲಿ ಪರಿಸ್ಥಿತಿ ಹತೋಟಿಗೆ ಬರಲಿದೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.ಇರಾನ್ ಗಡಿಯಲ್ಲಿ ಮತ್ತು ಪಶ್ಚಿಮ ಏಷ್ಯಾದ ಆಯಕಟ್ಟಿನ ಸ್ಥಳಗಳಲ್ಲಿ ನಿಯೋಜನೆಗೊಂಡಿರುವ ಅಮೆರಿಕದ ಸೈನಿಕರನ್ನು ಶೀಘ್ರದಲ್ಲೇ ವಾಪಸ್ ಕರೆಯಿಸಿಕೊಳ್ಳಲಾಗುವುದು. ಇದು ಅಮೆರಿಕದ ಹಿತಾಸಕ್ತಿ ಮತ್ತು ಜಾಗತಿಕ ಶಾಂತಿಯ ದೃಷ್ಟಿಯಿಂದ ಅಗತ್ಯವಾಗಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ಯುದ್ಧವನ್ನು ನಿಲ್ಲಿಸಲು ಇರಾನ್ ಜೊತೆಗೆ ತೆರೆಮರೆಯ ಮಾತುಕತೆಗಳು ಯಶಸ್ವಿಯಾಗಿವೆ ಎನ್ನಲಾಗುತ್ತಿದ್ದು, ಶಾಶ್ವತ ಶಾಂತಿ ಸ್ಥಾಪನೆಗೆ ಅಮೆರಿಕ ಕೆಲವು ಕಠಿಣ ಷರತ್ತುಗಳನ್ನು ವಿಧಿಸಿದೆ.ಟ್ರಂಪ್ ಅವರ ಈ ಒಂದು ಹೇಳಿಕೆಯಿಂದಾಗಿ ಜಾಗತಿಕ ಷೇರು ಮಾರುಕಟ್ಟೆಗಳಲ್ಲಿ ಸಂಭ್ರಮ ಮನೆಮಾಡಿದ್ದು, ಕಚ್ಚಾ ತೈಲ ಬೆಲೆಗಳು (Crude Oil Prices) ಇಳಿಕೆಯಾಗುವ ಮುನ್ಸೂಚನೆ ಸಿಕ್ಕಿದೆ. ಇದು ಭಾರತಕ್ಕೂ ದೊಡ್ಡ ಸಮಾಧಾನ ತರಲಿದೆ.
