ನವದೆಹಲಿ:ಭಾರತದ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪನೆಯಾಗಿದೆ. ಬೆಂಗಳೂರು ಮೂಲದ ‘ಗ್ಯಾಲಕ್ಸ್ಐ’ ಎಂಬ ಸ್ಟಾರ್ಟ್ಅಪ್ ನಿರ್ಮಿಸಿದ ‘ಮಿಷನ್ ದೃಷ್ಟಿ’ ಉಪಗ್ರಹವು ಭಾನುವಾರ (ಮೇ 3) ಕ್ಯಾಲಿಫೋರ್ನಿಯಾದಿಂದ ‘ಫಾಲ್ಕನ್ 9’ ರಾಕೆಟ್ ಮೂಲಕ ಯಶಸ್ವಿಯಾಗಿ ಉಡಾವಣೆಯಾಗಿದೆ.
ಈ ಬಗ್ಗೆ ಸಾಮಾಜಿಕ ಜಾಲತಾಣ ‘X’ ನಲ್ಲಿ ಪೋಸ್ಟ್ ಮಾಡಿರುವ ಪ್ರಧಾನಿ ನರೇಂದ್ರ ಮೋದಿ, “ಗ್ಯಾಲಕ್ಸ್ಐ ಸಂಸ್ಥೆಯ ‘ಮಿಷನ್ ದೃಷ್ಟಿ’ ನಮ್ಮ ಬಾಹ್ಯಾಕಾಶ ಪಯಣದಲ್ಲಿ ಒಂದು ಪ್ರಮುಖ ಸಾಧನೆಯಾಗಿದೆ. ವಿಶ್ವದ ಮೊದಲ OptoSAR ಉಪಗ್ರಹ ಮತ್ತು ಭಾರತದ ಅತಿದೊಡ್ಡ ಖಾಸಗಿ ನಿರ್ಮಿತ ಉಪಗ್ರಹದ ಯಶಸ್ವಿ ಉಡಾವಣೆಯು, ನಮ್ಮ ಯುವಜನತೆಯ ಆವಿಷ್ಕಾರದ ಹಸಿವು ಮತ್ತು ರಾಷ್ಟ್ರ ನಿರ್ಮಾಣದ ಉತ್ಸಾಹಕ್ಕೆ ಸಾಕ್ಷಿಯಾಗಿದೆ,” ಎಂದು ಬಣ್ಣಿಸಿದ್ದಾರೆ. ಸಂಸ್ಥೆಯ ಸ್ಥಾಪಕರು ಮತ್ತು ಇಡೀ ತಂಡಕ್ಕೆ ಅವರು ಅಭಿನಂದನೆ ಸಲ್ಲಿಸಿದ್ದಾರೆ.
ಒಂದೇ ಪ್ಲಾಟ್ಫಾರ್ಮ್ನಲ್ಲಿ ಆಪ್ಟಿಕಲ್ (EO) ಮತ್ತು ಸಿಂಥೆಟಿಕ್ ಅಪರ್ಚರ್ ರಾಡಾರ್ (SAR) ಸಂವೇದಕಗಳನ್ನು ಒಳಗೊಂಡಿರುವ ವಿಶ್ವದ ಮೊಟ್ಟಮೊದಲ ಉಪಗ್ರಹ ಇದಾಗಿದೆ.160 ಕೆಜಿ ತೂಕದ ಈ ಉಪಗ್ರಹವು ಭಾರತದಲ್ಲಿ ಖಾಸಗಿಯಾಗಿ ನಿರ್ಮಿಸಲಾದ ಅತಿದೊಡ್ಡ ಮತ್ತು ಅತ್ಯಂತ ಸ್ಪಷ್ಟವಾದ (Highest Resolution) ಚಿತ್ರಗಳನ್ನು ನೀಡುವ ಉಪಗ್ರಹವಾಗಿದೆ.
ರಕ್ಷಣೆ, ಕೃಷಿ, ವಿಪತ್ತು ನಿರ್ವಹಣೆ, ಸಮುದ್ರ ಕಣ್ಗಾವಲು ಮತ್ತು ಮೂಲಸೌಕರ್ಯ ಯೋಜನೆಗಳಿಗೆ ಪೂರಕವಾಗಿ ಕೆಲಸ ಮಾಡಲಿದೆ.
2021 ರಲ್ಲಿ IIT ಮದ್ರಾಸ್ನ ಎಂಜಿನಿಯರ್ಗಳಿಂದ ಸ್ಥಾಪಿತವಾದ ಈ ಸಂಸ್ಥೆಯು ಭೂ-ಪರಿವೀಕ್ಷಣಾ ತಂತ್ರಜ್ಞಾನದಲ್ಲಿ ಕ್ರಾಂತಿ ಮಾಡಲು ಮುಂದಾಗಿದೆ. ಸಾಂಪ್ರದಾಯಿಕ ಉಪಗ್ರಹಗಳಿಂದ ಸಾಧ್ಯವಾಗದ ಸ್ಪಷ್ಟ ಚಿತ್ರಣಗಳನ್ನು ಈ ‘OptoSAR’ ತಂತ್ರಜ್ಞಾನ ನೀಡಲಿದೆ ಎಂದು ಸಂಸ್ಥೆ ತಿಳಿಸಿದೆ. 2029 ರ ವೇಳೆಗೆ ಇಂತಹ 8 ರಿಂದ 10 ಉಪಗ್ರಹಗಳನ್ನು ಉಡಾವಣೆ ಮಾಡುವ ಗುರಿಯನ್ನು ಈ ಸ್ಟಾರ್ಟ್ಅಪ್ ಹೊಂದಿದೆ.
