ಅಟ್ಲಾಂಟಾ (ಅಮೆರಿಕ):ವಿಶ್ವದ ಮೊದಲ 24 ಗಂಟೆಗಳ ಸುದ್ದಿ ವಾಹಿನಿ ‘ಸಿಎನ್ಎನ್’ (CNN) ಸ್ಥಾಪಿಸುವ ಮೂಲಕ ಪತ್ರಿಕೋದ್ಯಮದ ಇತಿಹಾಸವನ್ನೇ ಬದಲಿಸಿದ್ದ ಅಮೆರಿಕದ ಖ್ಯಾತ ಉದ್ಯಮಿ ಮತ್ತು ದಾನಿ ಟೆಡ್ ಟರ್ನರ್ (87) ಅವರು ಬುಧವಾರ ನಿಧನರಾದರು. ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಅಟ್ಲಾಂಟಾದ ತಮ್ಮ ನಿವಾಸದಲ್ಲಿ ಕೊನೆಯುಸಿರೆಳೆದಿದ್ದಾರೆ ಎಂದು ಅವರ ಕುಟುಂಬದ ಮೂಲಗಳು ತಿಳಿಸಿವೆ.
1980ರಲ್ಲಿ ಟೆಡ್ ಟರ್ನರ್ ಸಿಎನ್ಎನ್ ಆರಂಭಿಸಿದಾಗ, ದಿನದ 24 ಗಂಟೆಯೂ ಸುದ್ದಿ ಬಿತ್ತರಿಸುವ ಅವರ ಆಲೋಚನೆಯನ್ನು ಅನೇಕರು ಟೀಕಿಸಿದ್ದರು. ಆದರೆ, ಅಲ್ಪಕಾಲದಲ್ಲೇ ಸಿಎನ್ಎನ್ ಜಾಗತಿಕ ಮಟ್ಟದಲ್ಲಿ ಅತ್ಯಂತ ಪ್ರಭಾವಶಾಲಿ ಮಾಧ್ಯಮವಾಗಿ ಬೆಳೆಯಿತು.
ಕೇವಲ ಸುದ್ದಿಯಲ್ಲದೆ, ಕಾರ್ಟೂನ್ ನೆಟ್ವರ್ಕ್ (Cartoon Network) ಮತ್ತು ಟಿಎನ್ಟಿ (TNT) ನಂತಹ ಜನಪ್ರಿಯ ಚಾನೆಲ್ಗಳನ್ನು ಆರಂಭಿಸುವ ಮೂಲಕ ಅವರು ಬೃಹತ್ ಮಾಧ್ಯಮ ಸಾಮ್ರಾಜ್ಯವನ್ನು ಕಟ್ಟಿದ್ದರು.
ಟೆಡ್ ಟರ್ನರ್ ಕೇವಲ ಉದ್ಯಮಿಯಲ್ಲದೆ ದೊಡ್ಡ ದಾನಿಯೂ ಆಗಿದ್ದರು. ವಿಶ್ವಸಂಸ್ಥೆಯ ವಿವಿಧ ಯೋಜನೆಗಳಿಗಾಗಿ ಅವರು ಬರೋಬ್ಬರಿ 1 ಬಿಲಿಯನ್ ಡಾಲರ್ (ಸುಮಾರು 8,000 ಕೋಟಿ ರೂ.) ದೇಣಿಗೆ ನೀಡುವ ಮೂಲಕ ಜಗತ್ತಿನ ಗಮನ ಸೆಳೆದಿದ್ದರು.
ಅಟ್ಲಾಂಟಾ ಬ್ರೇವ್ಸ್ ಬೇಸ್ಬಾಲ್ ತಂಡದ ಮಾಲೀಕರಾಗಿದ್ದ ಅವರು, ಕ್ರೀಡಾ ಕ್ಷೇತ್ರಕ್ಕೂ ಅಪಾರ ಕೊಡುಗೆ ನೀಡಿದ್ದರು.
