ಜಪಾನ್ ಹವಾಮಾನ ಸಂಸ್ಥೆ (JMA) ನೀಡಿರುವ ಮಾಹಿತಿಯ ಪ್ರಕಾರ, ಶುಕ್ರವಾರ ಸಂಜೆ ಉತ್ತರ ಜಪಾನ್ನಲ್ಲಿ ರಿಕ್ಟರ್ ಮಾಪಕದಲ್ಲಿ 6.3 ರಷ್ಟು ಪ್ರಾಥಮಿಕ ತೀವ್ರತೆಯ ಪ್ರಬಲ ಭೂಕಂಪ ಸಂಭವಿಸಿದ್ದು, ತೋಹೊಕು (Tohoku) ವಲಯದ ಬಹುತೇಕ ಭಾಗಗಳು ನಡುಗಿವೆ.
ಆದರೆ, ಈ ಭೂಕಂಪದಿಂದಾಗಿ ಸುನಾಮಿ ಉಂಟಾಗುವ ಯಾವುದೇ ಅಪಾಯವಿಲ್ಲ ಮತ್ತು ತಕ್ಷಣಕ್ಕೆ ಯಾವುದೇ ಸಾವು-ನೋವು ಅಥವಾ ಭಾರಿ ಹಾನಿಯಾದ ಬಗ್ಗೆ ವರದಿಯಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸ್ಥಳೀಯ ಸಮಯ ರಾತ್ರಿ 8:22 ಕ್ಕೆ ಮಿಯಾಗಿ ಪ್ರಾಂತ್ಯದ (Miyagi Prefecture) ಕರಾವಳಿಯ 50 ಕಿಲೋಮೀಟರ್ ಆಳದಲ್ಲಿ ಈ ಭೂಕಂಪ ಸಂಭವಿಸಿದೆ. ಜಪಾನ್ನ ಭೂಕಂಪನ ತೀವ್ರತೆಯ ಮಾಪಕದಲ್ಲಿ (seismic intensity scale) ತೋಮೆ, ಒಸಾಕಿ ಮತ್ತು ಇಶಿನೋಮಾಕಿ ನಗರಗಳಲ್ಲಿ ಇದರ ತೀವ್ರತೆಯು ‘ಲೋವರ್ 5’ (lower 5) ರಷ್ಟಾಗಿ ದಾಖಲಾಗಿದೆ. ಇನ್ನು ಮಿಯಾಗಿ ಮತ್ತು ನೆರೆಯ ಇವಾಟೆ ಪ್ರಾಂತ್ಯದ (Iwate Prefecture) ಹಲವು ಪ್ರದೇಶಗಳಲ್ಲಿ ತೀವ್ರತೆಯ ಮಟ್ಟ 4 ರಷ್ಟು ನಡುಕ ದಾಖಲಾಗಿದೆ.
ಈ ಭೂಕಂಪವು ಇಡೀ ಪ್ರದೇಶದಾದ್ಯಂತ ತುರ್ತು ಮುನ್ನೆಚ್ಚರಿಕೆಯನ್ನು ಪ್ರಚೋದಿಸಿದ್ದು, ಹಲವು ಪ್ರಾಂತ್ಯಗಳಲ್ಲಿ ಪ್ರಬಲ ನಡುಕ ಉಂಟಾಗಿದೆ. ಭೂಕಂಪದ ಹಿನ್ನೆಲೆಯಲ್ಲಿ ರೈಲು ಸೇವೆಗಳಿಗೂ ಅಡ್ಡಿಯಾಗಿದೆ.
ಜೆಆರ್ ಈಸ್ಟ್ (JR East) ಪ್ರಕಾರ, ಮುನ್ನೆಚ್ಚರಿಕೆ ಕ್ರಮವಾಗಿ ತೋಹೊಕು ಶಿಂಕನ್ಸೆನ್ ಲೈನ್ (Tohoku Shinkansen Line) ಬುಲೆಟ್ ರೈಲು ಸೇವೆಯನ್ನು ಟೋಕಿಯೋ ಮತ್ತು ಶಿನ್-ಅಮೊರಿ ನಿಲ್ದಾಣಗಳ ನಡುವೆ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿತ್ತು. ನಂತರ ರಾತ್ರಿ 10:40 ರ ಸುಮಾರಿಗೆ ಸೇವೆಗಳನ್ನು ಪುನರಾರಂಭಿಸಲು ನಿರ್ಧರಿಸಲಾಯಿತಾದರೂ, ಕೆಲವು ಯಮಗಾತಾ ಶಿಂಕನ್ಸೆನ್ ರೈಲುಗಳ ಸಂಚಾರ ಸ್ಥಗಿತವಾಗಿಯೇ ಇತ್ತು.
