ಬೆಂಗಳೂರು : ಮೊದಲೆಲ್ಲ ಯಾವುದೇ ಆಹಾರ ಪದಾರ್ಥ ಆಗಿರಲಿ ಅಂದೇ ಬೇಯಿಸಿ ಅಂದೇ ತಿನ್ನುವ ರೂಢಿ ಇತ್ತು. ಕಾಲ ಬದಲಾದಾಂತೆಲ್ಲ ಆಧುನಿಕ ಜಗತ್ತಲ್ಲಿ ಆಹಾರ ಕೆಡಬಾರದು ಎಂದು ಫ್ರಿಡ್ಜ್ ನಲ್ಲಿ ಇಟ್ಟು ತಿನ್ನೋದು ಶುರುವಾಗಿದೆ. ಇದೀಗ ಫ್ರಿಜ್‌ನಲ್ಲಿ ಇಟ್ಟಿದ್ದ ಹಳೆಯ ವಾಂಗಿಬಾತ್ ಸೇವಿಸಿದ 5 ವರ್ಷದ ಮಗುವೊಂದು ಆಹಾರ ವಿಷವೇರಿಕೆಯಿಂದ ಮೃತಪಟ್ಟಿರುವ ಘಟನೆ ಬೆಂಗಳೂರಿನ ಕೆ.ಪಿ. ಅಗ್ರಹಾರದ ಭುವನೇಶ್ವರಿ ನಗರದಲ್ಲಿ ನಡೆದಿದೆ.
ಹೌದು 2024ರ ಅಕ್ಟೋಬರ್ 7ರಂದು ನಡೆದ ಈ ಘಟನೆಯಲ್ಲಿ, ಆನ್‌ಲೈನ್‌ನಿಂದ ತಂದ ಕೇಕ್‌ ತಿಂದು ಮಗು ಸಾವನ್ನಪ್ಪಿತು ಎಂದು ಆರಂಭದಲ್ಲಿ ಭಾವಿಸಲಾಗಿತ್ತು. ಆದರೆ, ವಿಧಿ ವಿಜ್ಞಾನ ಪ್ರಯೋಗಾಲಯ (FSL) ಮತ್ತು ಆಹಾರ ಸುರಕ್ಷತೆ ಹಾಗೂ ಗುಣಮಟ್ಟ ಇಲಾಖೆಯ ತನಿಖೆಯಿಂದ ಬೇರೆಯದೇ ಸತ್ಯ ಬಯಲಿಗೆ ಬಂದಿದೆ. ಮಗು ಫ್ರಿಜ್‌ನಲ್ಲಿ ಇಟ್ಟಿದ್ದ ಹಳೆಯ ವಾಂಗಿಬಾತ್ ತಿಂದಿದ್ದು, ಇದರಿಂದ ಆಹಾರ ವಿಷವೇರಿಕೆ ಉಂಟಾಗಿ ಮೃತಪಟ್ಟಿದೆ ಎಂದು ವರದಿಯಾಗಿದೆ.
ಈ ವಾಂಗಿಬಾತ್ ಫ್ರಿಜ್‌ನಲ್ಲಿ ದೀರ್ಘಕಾಲ ಇಡಲಾಗಿತ್ತು, ಇದರಿಂದ ಬ್ಯಾಕ್ಟೀರಿಯಾ ಬೆಳವಣಿಗೆಯಾಗಿ ವಿಷಕಾರಿಯಾಗಿತ್ತು. ಫ್ರಿಜ್‌ನಲ್ಲಿ ಆಹಾರವನ್ನು ಶೇಖರಿಸಿಡುವುದು ಆಧುನಿಕ ಜೀವನದ ಅವಿಭಾಜ್ಯ ಭಾಗವಾಗಿದೆ. ಆದರೆ, ದೀರ್ಘಕಾಲ ಫ್ರಿಜ್‌ನಲ್ಲಿ ಇರಿಸಿದ ಆಹಾರದಲ್ಲಿ ಹಾನಿಕಾರಕ ಬ್ಯಾಕ್ಟೀರಿಯಾಗಳಾದ ಲಿಸ್ಟೀರಿಯಾ ಅಥವಾ ಸಾಲ್ಮೊನೆಲ್ಲಾ ಬೆಳೆಯಬಹುದು. ಇದು ಆಹಾರವನ್ನು ವಿಷಕಾರಿಯನ್ನಾಗಿ ಮಾಡುತ್ತದೆ.
ಅದರಲ್ಲೂ ಅನ್ನ, ಸಾಂಬಾರು, ದೋಸೆ ಹಿಟ್ಟು ಮುಂತಾದವು ತ್ವರಿತವಾಗಿ ಕೆಡಬಹುದು. ವೈದ್ಯರ ಪ್ರಕಾರ, ಫ್ರಿಜ್‌ನಲ್ಲಿ ಇಡುವ ಆಹಾರವನ್ನು 24-48 ಗಂಟೆಗಳ ಒಳಗೆ ಸೇವಿಸಬೇಕು. ಜೊತೆಗೆ, ಆಹಾರವನ್ನು ಮತ್ತೆ ಬಿಸಿಮಾಡುವಾಗ 165°F (74°C) ತಾಪಮಾನದವರೆಗೆ ಚೆನ್ನಾಗಿ ಕಾಯಿಸಬೇಕು. ಇದರಿಂದ ಬ್ಯಾಕ್ಟೀರಿಯಾಗಳು ನಾಶವಾಗುತ್ತವೆ.
