ದಕ್ಷಿಣ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ (USC) ಸಂಶೋಧಕರು ನಡೆಸಿದ ಹೊಸ ಅಧ್ಯಯನದ ಪ್ರಕಾರ, ಹಣ್ಣುಗಳು, ತರಕಾರಿಗಳು ಮತ್ತು ಧಾನ್ಯಗಳನ್ನು ಒಳಗೊಂಡ ಆಹಾರ ಕ್ರಮವು ಧೂಮಪಾನ ಮಾಡದ ಯುವಕರಲ್ಲಿ ಶ್ವಾಸಕೋಶದ ಕ್ಯಾನ್ಸರ್ ಅಪಾಯವನ್ನು ಹೆಚ್ಚಿಸಬಹುದು ಎಂದು ತಿಳಿದುಬಂದಿದೆ.
ಕೀಟನಾಶಕಗಳ ಬಳಕೆ: ಇಲ್ಲಿ ಸಮಸ್ಯೆ ಹಣ್ಣು-ತರಕಾರಿಗಳಲ್ಲ, ಬದಲಿಗೆ ಅವುಗಳನ್ನು ಬೆಳೆಯಲು ಬಳಸುವ ಕೀಟನಾಶಕಗಳ ಅವಶೇಷಗಳು (Pesticide residues) ಎಂದು ಸಂಶೋಧಕರು ಹೇಳಿದ್ದಾರೆ.
ಈ ಅಧ್ಯಯನವನ್ನು 50 ಅಥವಾ ಅದಕ್ಕಿಂತ ಕಡಿಮೆ ವಯಸ್ಸಿನ 187 ಶ್ವಾಸಕೋಶದ ಕ್ಯಾನ್ಸರ್ ರೋಗಿಗಳ ಆಹಾರ ಪದ್ಧತಿ, ಧೂಮಪಾನದ ಇತಿಹಾಸ ಮತ್ತು ಜನಸಂಖ್ಯಾ ಮಾಹಿತಿಯನ್ನು ಆಧರಿಸಿ ಸಿದ್ಧಪಡಿಸಲಾಗಿದೆ. ಇದನ್ನು 2026ರ ಅಮೆರಿಕನ್ ಅಸೋಸಿಯೇಷನ್ ಫಾರ್ ಕ್ಯಾನ್ಸರ್ ರಿಸರ್ಚ್ನ ವಾರ್ಷಿಕ ಸಭೆಯಲ್ಲಿ ಮಂಡಿಸಲಾಯಿತು.
ಆರೋಗ್ಯಕರ ಆಹಾರ ಸೂಚ್ಯಂಕ: ಆಹಾರದ ಗುಣಮಟ್ಟವನ್ನು ಅಳೆಯುವ ‘ಹೆಲ್ತಿ ಈಟಿಂಗ್ ಇಂಡೆಕ್ಸ್’ನಲ್ಲಿ ಈ ರೋಗಿಗಳು 100ಕ್ಕೆ ಸರಾಸರಿ 65 ಅಂಕಗಳನ್ನು ಹೊಂದಿದ್ದರು. ಇದು ಅಮೆರಿಕದ ಸಾಮಾನ್ಯ ಸರಾಸರಿಗಿಂತ (57) ಅಧಿಕವಾಗಿದೆ. ಅಂದರೆ, ಈ ರೋಗಿಗಳು ಸಾಮಾನ್ಯರಿಗಿಂತ ಹೆಚ್ಚು ಹಸಿರು ತರಕಾರಿ ಮತ್ತು ಧಾನ್ಯಗಳನ್ನು ಸೇವಿಸುತ್ತಿದ್ದರು.
“ವಾಣಿಜ್ಯಿಕವಾಗಿ ಬೆಳೆದ (ಸೇಂದ್ರೀಯವಲ್ಲದ) ಹಣ್ಣುಗಳು ಮತ್ತು ತರಕಾರಿಗಳು ಮಾಂಸ ಅಥವಾ ಡೈರಿ ಉತ್ಪನ್ನಗಳಿಗಿಂತ ಹೆಚ್ಚಿನ ಕೀಟನಾಶಕಗಳನ್ನು ಹೊಂದಿರುತ್ತವೆ. ಕೀಟನಾಶಕಗಳಿಗೆ ಒಡ್ಡಿಕೊಳ್ಳುವ ಕೃಷಿ ಕಾರ್ಮಿಕರಲ್ಲಿ ಶ್ವಾಸಕೋಶದ ಕ್ಯಾನ್ಸರ್ ಪ್ರಮಾಣ ಹೆಚ್ಚಿರುವುದು ನಮಗೆ ತಿಳಿದಿದೆ,” ಎಂದು ಸಂಶೋಧನೆಯ ನೇತೃತ್ವ ವಹಿಸಿದ್ದ ಡಾ. ಜಾರ್ಜ್ ನೀವಾ ತಿಳಿಸಿದ್ದಾರೆ.
ಹೆಚ್ಚುತ್ತಿರುವ ಆತಂಕ:
ಧೂಮಪಾನ ಮಾಡದ 50 ವರ್ಷದೊಳಗಿನವರಲ್ಲಿ, ಅದರಲ್ಲೂ ವಿಶೇಷವಾಗಿ ಮಹಿಳೆಯರಲ್ಲಿ ಕ್ಯಾನ್ಸರ್ ಹೆಚ್ಚಾಗಿ ಕಂಡುಬರುತ್ತಿದೆ. “ಈ ರೋಗಿಗಳು ರೋಗ ಪತ್ತೆಯಾಗುವ ಮೊದಲು ಸಾಮಾನ್ಯ ಅಮೆರಿಕನ್ನರಿಗಿಂತ ಹೆಚ್ಚು ಆರೋಗ್ಯಕರ ಆಹಾರವನ್ನೇ ಸೇವಿಸಿದ್ದರು,” ಎಂದು ನೀವಾ ಸೇರಿಸಿದ್ದಾರೆ.
ಗಮನಿಸಬೇಕಾದ ಅಂಶ:
ವಾಯು ಮಾಲಿನ್ಯ ಮತ್ತು ಹಾರ್ಮೋನ್ ವ್ಯತ್ಯಯ ಮಾಡುವ ರಾಸಾಯನಿಕಗಳು ಕ್ಯಾನ್ಸರ್ಗೆ ಕಾರಣ ಎಂದು ಈ ಹಿಂದಿನ ಸಂಶೋಧನೆಗಳು ಹೇಳಿದ್ದವು. ಆದರೆ ಈ ಹೊಸ ಅಧ್ಯಯನವು, ನಾವು ‘ಆರೋಗ್ಯಕರ’ ಎಂದು ಭಾವಿಸುವ ಆಹಾರಗಳ ಮೂಲಕ ದೇಹ ಸೇರುವ ಕೀಟನಾಶಕಗಳೂ ಒಂದು ಪ್ರಮುಖ ಕಾರಣವಿರಬಹುದು ಎಂದು ಸೂಚಿಸಿದೆ.
