ಕೊರೊನಾ ಕಾಲದ ‘ವರ್ಕ್ ಫ್ರಮ್ ಹೋಮ್’ (WFH) ಸಂಸ್ಕೃತಿ ಮತ್ತೆ ಮರಳುವ ಲಕ್ಷಣಗಳು ಕಾಣಿಸುತ್ತಿವೆ. ಈ ಬಾರಿ ವೈರಸ್ ಭಯಕ್ಕಲ್ಲ, ಬದಲಾಗಿ ಗಗನಕ್ಕೇರಿರುವ ಇಂಧನ ಬೆಲೆ (Fuel Costs) ಮತ್ತು ಸಾರಿಗೆ ವೆಚ್ಚವನ್ನು ಸರಿದೂಗಿಸಲು ಕಂಪನಿಗಳು ಈ ನಿರ್ಧಾರಕ್ಕೆ ಮುಂದಾಗುತ್ತಿವೆ ಎಂದು ವರದಿಯಾಗಿದೆ.
ಪಶ್ಚಿಮ ಏಷ್ಯಾದ ಯುದ್ಧದ ಪರಿಣಾಮವಾಗಿ ಕಚ್ಚಾ ತೈಲದ ಬೆಲೆ ಏರಿಕೆಯಾಗಿದ್ದು, ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ದರಗಳು ಸಾರ್ವಕಾಲಿಕ ದಾಖಲೆ ಬರೆದಿವೆ. ಇದರಿಂದ ನೌಕರರಿಗೆ ಪ್ರತಿದಿನ ಕಚೇರಿಗೆ ಬಂದು ಹೋಗುವುದು ಆರ್ಥಿಕವಾಗಿ ಹೊರೆಯಾಗುತ್ತಿದೆ.
ನೌಕರರ ಸಾರಿಗೆ ಭತ್ಯೆ (Travel Allowance) ಹೆಚ್ಚಿಸುವ ಬದಲು, ವಾರದಲ್ಲಿ 3 ರಿಂದ 4 ದಿನ ಮನೆಯಿಂದಲೇ ಕೆಲಸ ಮಾಡಲು ಅವಕಾಶ ನೀಡುವ ಬಗ್ಗೆ ಪ್ರಮುಖ ಐಟಿ ಮತ್ತು ಕಾರ್ಪೊರೇಟ್ ಕಂಪನಿಗಳು ಆಲೋಚಿಸುತ್ತಿವೆ.
ಕಚೇರಿಗಳನ್ನು ಪೂರ್ಣ ಪ್ರಮಾಣದಲ್ಲಿ ನಡೆಸಲು ಬೇಕಾಗುವ ವಿದ್ಯುತ್ ಮತ್ತು ಇತರ ನಿರ್ವಹಣಾ ವೆಚ್ಚಗಳನ್ನು ಉಳಿಸಲು ‘ಹೈಬ್ರಿಡ್’ ಮಾದರಿ (ಕೆಲ ದಿನ ಕಚೇರಿ, ಕೆಲ ದಿನ ಮನೆ) ಅತ್ಯಂತ ಸೂಕ್ತ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಇಂಧನ ಬೆಲೆ ಏರಿಕೆಯಿಂದಾಗಿ ಸಂಬಳದ ಬಹುಭಾಗ ಪ್ರಯಾಣಕ್ಕೇ ಖರ್ಚಾಗುತ್ತಿರುವುದರಿಂದ, ನೌಕರರೇ ಸ್ವತಃ ಡಬ್ಲ್ಯೂಎಫ್ಎಚ್ಗಾಗಿ ಬೇಡಿಕೆ ಇಡುತ್ತಿದ್ದಾರೆ.
