ಶಿವಮೊಗ್ಗ: ಸಾಗರದ ಸಿರಿವಂತೆಯ ‘ಚಿತ್ರಸಿರಿ ಪ್ರಶಸ್ತಿ’ ಹೃದಯವಂತಿಕೆಯ ಪ್ರತೀಕ: ಬಿ.ಆರ್. ಜಯಂತ್

ಶಿವಮೊಗ್ಗ: “ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ನೀಡುವ ಪ್ರಶಸ್ತಿಗಳು ವಾರ್ಷಿಕ ವಾಡಿಕೆಯ ಯಾಂತ್ರಿಕ ಕಾರ್ಯಕ್ರಮಗಳಾಗಿರುತ್ತವೆ. ಆದರೆ ಸಾಗರದ ಸಿರಿವಂತೆಯ ‘ಚಿತ್ರಸಿರಿ’ ಸಂಸ್ಥೆಯು ನೀಡುವ ಪ್ರಶಸ್ತಿಗಳು ಅದಕ್ಕಿಂತ ಮಿಗಿಲಾದವು. ಇದು ಕೇವಲ ಪುರಸ್ಕಾರವಲ್ಲ, ಹೃದಯವಂತಿಕೆಯಿಂದ ನೀಡುವ ಶ್ರೇಷ್ಠ ಗೌರವ,” ಎಂದು ಮಲೆನಾಡು ಅಭಿವೃದ್ಧಿ ಪ್ರತಿಷ್ಠಾನದ ಅಧ್ಯಕ್ಷ ಬಿ.ಆರ್. ಜಯಂತ್ ಅಭಿಪ್ರಾಯಪಟ್ಟರು.

ಇಂದು ಶಿವಮೊಗ್ಗ ಜಿಲ್ಲೆಯ ಸಾಗರ ಸಮೀಪದ ಸಿರಿವಂತೆಯಲ್ಲಿ ‘ಚಿತ್ರಸಿರಿ’ ಸಂಸ್ಥೆಯ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸಾಧಕರಿಗೆ ಪ್ರಶಸ್ತಿ ವಿತರಿಸಿ ಅವರು ಮಾತನಾಡುತ್ತಿದ್ದರು.

ನಿಸ್ವಾರ್ಥ ಸೇವೆಯ ಗುರುತಿಸುವಿಕೆ

ಸಂಸ್ಥೆಯ ಚಂದ್ರಶೇಖರ್ ಅವರು ತಮ್ಮ ಪತ್ನಿಯ ನೆನಪಿನಲ್ಲಿ ಪ್ರತಿವರ್ಷ ಸಾಧಕರನ್ನು ಗುರುತಿಸಿ ಗೌರವಿಸುತ್ತಿರುವುದು ಶ್ಲಾಘನೀಯ ಎಂದ ಜಯಂತ್, “ನಮ್ಮ ನಡುವೆ ಇರುವ ಪ್ರತಿಭೆಗಳನ್ನು ಗುರುತಿಸುವುದು ಸಮಾಜದ ಕರ್ತವ್ಯ. ಪ್ರೀತಿ, ವಿಶ್ವಾಸ ಮತ್ತು ಸ್ನೇಹವೇ ಬದುಕಿನ ದೊಡ್ಡ ಸಂಪತ್ತು ಎಂಬುದನ್ನು ಈ ಕಾರ್ಯಕ್ರಮ ಸಾಬೀತುಪಡಿಸಿದೆ. ಯಾವುದೇ ಪ್ರಚಾರದ ಹಪಾಹಪಿ ಇಲ್ಲದೆ, ಪರರ ಭಾವನೆಗಳಿಗೆ ಸ್ಪಂದಿಸುವ ಚಂದ್ರಶೇಖರ್ ಅವರ ಕಾರ್ಯ ಮಾದರಿಯಾದುದು. ದುರ್ಬಲರು ಮತ್ತು ಹಿಂದುಳಿದ ವರ್ಗಗಳ ಪರವಾಗಿ ಧ್ವನಿಯಾಗುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ,” ಎಂದರು.

ಸಾಧಕರ ಮನದಾಳ

‘ಸಿರಿಗೌರಿ’ ಪ್ರಶಸ್ತಿ ಸ್ವೀಕರಿಸಿದ ನ್ಯಾಯವಾದಿ ಮತ್ತು ಸಮಾಜಸೇವಕಿ ಸರೋಜಾ ಚಂಗೊಳ್ಳಿ ಮಾತನಾಡಿ, “ಕುಗ್ರಾಮದಿಂದ ಬಂದ ನಾನು ಬದುಕು ಕಟ್ಟಿಕೊಳ್ಳಲು ಸಾಕಷ್ಟು ಹೋರಾಟ ಮಾಡಬೇಕಾಯಿತು. ಎಂತಹ ಸಂಕಷ್ಟದ ದಿನಗಳಲ್ಲೂ ಅಕ್ಷರ ಕಲಿಸಿದ ಪೋಷಕರ ತ್ಯಾಗ ದೊಡ್ಡದು. ಪತ್ನಿಯ ನೆನಪಿನಲ್ಲಿ ಇಂತಹ ಹೃದಯಸ್ಪರ್ಶಿ ಸಮಾರಂಭ ಆಯೋಜಿಸಿರುವುದು ಎಲ್ಲರಿಗೂ ಮಾದರಿ,” ಎಂದು ಕೃತಜ್ಞತೆ ಸಲ್ಲಿಸಿದರು.

ಸಾಮಾಜಿಕ ಕಾರ್ಯಕರ್ತ ಪ್ರಸನ್ನ ಕೆರೆಕೈ ಮಾತನಾಡಿ, “ಹೋರಾಟದ ಹಾದಿಯಲ್ಲಿ ಕಾಗೋಡು ತಿಮ್ಮಪ್ಪ ಹಾಗೂ ಬಿ.ಆರ್. ಜಯಂತ್ ಅವರ ಬದ್ಧತೆ ನಮಗೆ ಮಾದರಿ. ಶರಾವತಿ ಹಿನ್ನೀರಿನ ಜನರ ದಶಕಗಳ ಹೋರಾಟದ ಫಲವಾಗಿ ಇಂದು ಸೇತುವೆ ನಿರ್ಮಾಣವಾಗಿದೆ. ಯುವಜನತೆ ಇಂತಹ ಸಾಮಾಜಿಕ ಕಾರ್ಯಗಳಲ್ಲಿ ಹೆಚ್ಚು ತೊಡಗಿಸಿಕೊಳ್ಳಬೇಕು,” ಎಂದು ಕರೆ ನೀಡಿದರು.

ಪ್ರಶಸ್ತಿ ಪುರಸ್ಕೃತರು

ಕಾರ್ಯಕ್ರಮದಲ್ಲಿ ವಿವಿಧ ಕ್ಷೇತ್ರದಲ್ಲಿ ಸಾಧನೆ ಮಾಡಿದ ಗಣ್ಯರನ್ನು ಗೌರವಿಸಲಾಯಿತು:

• ಸಿರಿಗೌರಿ ಪ್ರಶಸ್ತಿ: ಸರೋಜಾ ಚಂಗೊಳ್ಳಿ (ನ್ಯಾಯವಾದಿ ಹಾಗೂ ಸಮಾಜಸೇವಕಿ).

• ಚಿಗುರು ಸಿರಿಗೌರಿ ಪ್ರಶಸ್ತಿ: ಕುಮಾರಿ ನಮನಾ (ಅಂತರಾಷ್ಟ್ರೀಯ ಯೋಗಪಟು).

ಅಭಿನಂದನೆ ಸಲ್ಲಿಕೆ: ಬಾಲವಿಜ್ಞಾನಿ ಅಭಿನಂದನ್ ಸಾಗರ, ರಕ್ತದಾನಿ ಹಾಲೇಶ್ ಭದ್ರಾವತಿ, ಸಾಮಾಜಿಕ ಕಾರ್ಯಕರ್ತ ಪ್ರಸನ್ನ ಕೆರೆಕೈ, ಯೋಗ ಶಿಕ್ಷಕ ಶ್ರೀಧರಮೂರ್ತಿ, ಯೋಗಪಟುಗಳಾದ ಶೈಲಜಾ ಮತ್ತು ಜಯಮ್ಮ ಅವರನ್ನು ಇದೇ ಸಂದರ್ಭದಲ್ಲಿ ಸನ್ಮಾನಿಸಲಾಯಿತು.

ಗಮನಸೆಳೆದ ಪ್ರಾತ್ಯಕ್ಷಿಕೆಗಳು

ಕಾರ್ಯಕ್ರಮದಲ್ಲಿ ಕುಮಾರಿ ನಮನಾ ಅವರಿಂದ ಯೋಗ ಪ್ರಾತ್ಯಕ್ಷಿಕೆ ಹಾಗೂ ಬಾಲವಿಜ್ಞಾನಿ ಅಭಿನಂದನ್ ಅವರಿಂದ ರೋಬೋಟ್ ಪ್ರಾತ್ಯಕ್ಷಿಕೆ ನೆರೆದಿದ್ದವರ ಗಮನಸೆಳೆಯಿತು.

ಚಿತ್ರಸಿರಿ ಸಂಸ್ಥೆಯ ಮುಖ್ಯಸ್ಥ ಚಂದ್ರಶೇಖರ್ ಸಿರಿವಂತೆ, ಡಾ. ಪ್ರಸನ್ನ, ಜಗದೀಶ್ ಸಂಪಳ್ಳಿ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು. ಕ್ಷೇತ್ರ ಸಂಪನ್ಮೂಲ ಅಧಿಕಾರಿ ಡಾ. ಅನ್ನಪೂರ್ಣ ಹೆಚ್. ಅಭಿನಂದನಾ ಭಾಷಣ ಮಾಡಿದರು.

ಸಾಗರದಲ್ಲಿ ‘ಕಾಗೋಡು ಚಳುವಳಿ’ಗೆ 75ರ ಸಂಭ್ರಮ: ‘ಬದುಕಿಗಾಗಿ ಭೂಮಿ’ ಹೋರಾಟ ಎಂದಿಗೂ ಪ್ರಸ್ತುತವೆಂದ ಬಿ.ಆರ್.ಜಯಂತ್

ಸಾಗರದ ಮಾರಿಕಾಂಬಾ ರುದ್ರಭೂಮಿಯಲ್ಲಿ ವಿವಿಧ ಸಂಘಟನೆಗಳಿಂದ ಶ್ರಮದಾನ: ಸ್ವಚ್ಛತೆಗೆ ಸಾರ್ವಜನಿಕರಿಗೆ ಮನವಿ