ಬ್ರಿಟಿಷ್ ಸಂಸದ ರೂಪರ್ಟ್ ಲೊವ್ ಅವರ ಇತ್ತೀಚಿನ ಭಾಷಣವು ಯುನೈಟೆಡ್ ಕಿಂಗ್ಡಮ್ನಾದ್ಯಂತ ಹಲವಾರು ಪ್ರದೇಶಗಳಲ್ಲಿ “ಗುಂಪು ಆಧಾರಿತ ಮಕ್ಕಳ ಲೈಂಗಿಕ ಶೋಷಣೆ”ಯಲ್ಲಿ ತೊಡಗಿರುವ ಕುಖ್ಯಾತ “ಗ್ರೂಮಿಂಗ್ ಗ್ಯಾಂಗ್ಗಳ” (ಲೈಂಗಿಕ ಶೋಷಣೆಗಾಗಿ ಬಾಲಕಿಯರನ್ನು ಸೆಳೆಯುವ ಗುಂಪುಗಳು) ಸುತ್ತಲಿನ ಚರ್ಚೆಯನ್ನು ಮತ್ತೆ ಕೆರಳಿಸಿದೆ.
ಈ ಗ್ಯಾಂಗ್ಗಳ ಕುರಿತಾದ ಬ್ರಿಟಿಷ್ ಸರ್ಕಾರದ ತನಿಖೆಯಲ್ಲಿ, ಸಂಘಟಿತ ಮಕ್ಕಳ ಲೈಂಗಿಕ ದೌರ್ಜನ್ಯದ ಅಪರಾಧಿಗಳು ಹೆಚ್ಚಾಗಿ “ಪಾಕಿಸ್ತಾನಿ ಮೂಲದ ಟ್ಯಾಕ್ಸಿ ಚಾಲಕರು ಮತ್ತು ಮಾರುಕಟ್ಟೆ ವ್ಯಾಪಾರಿಗಳು” ಎಂಬುದು ಕಂಡುಬಂದಿದೆ.
ರೂಪರ್ಟ್ ಲೊವ್ ಅವರು ಬ್ರಿಟಿಷ್ ಸಂಸತ್ತಿನಲ್ಲಿ ತಮ್ಮ ಇತ್ತೀಚಿನ ಭಾಷಣದಲ್ಲಿ ಸಂತ್ರಸ್ತೆಯರ ಭೀಕರ ಸಾಕ್ಷ್ಯಗಳನ್ನು ಓದಿದರು. ಇವುಗಳಲ್ಲಿ ವಿಪರೀತ ಲೈಂಗಿಕ ದೌರ್ಜನ್ಯ, ಮಕ್ಕಳ ಗರ್ಭಧಾರಣೆ, ಬೆದರಿಕೆ, ಪೊಲೀಸರ ಕರ್ತವ್ಯಲೋಪ ಮತ್ತು ಸಾಂಸ್ಥಿಕ ವೈಫಲ್ಯಗಳ ವಿವರಗಳಿವೆ. ಲೊವ್ ಅವರ ಸ್ವತಂತ್ರ ವಿಚಾರಣೆಯ ಸಂದರ್ಭದಲ್ಲಿ ಈ ಸಾಕ್ಷ್ಯಗಳನ್ನು ಸಂಗ್ರಹಿಸಲಾಗಿತ್ತು.
”ಈ ಧೈರ್ಯಶಾಲಿ ಸಂತ್ರಸ್ತೆಯರ ಸಾಕ್ಷ್ಯಗಳನ್ನು ಕೇಳಲು ಮತ್ತು ಅಂತಿಮವಾಗಿ ಕ್ರಮ ಕೈಗೊಳ್ಳಲು ನಾನು ಈ ಸಂಸತ್ತನ್ನು ಕಳಕಳಿಯಿಂದ ಒತ್ತಾಯಿಸುತ್ತೇನೆ” ಎಂದು ಬ್ರಿಟಿಷ್ ಸಂಸದರು ಹೇಳಿದ್ದಾರೆ.
ಸಂತ್ರಸ್ತೆಯರ ಸಾಕ್ಷ್ಯಗಳು
ಲೊವ್ ಉಲ್ಲೇಖಿಸಿದ ಸಾಕ್ಷ್ಯಗಳಲ್ಲಿ ಹಿಂಸೆ ಮತ್ತು ಲೈಂಗಿಕ ದೌರ್ಜನ್ಯದ ಆಘಾತಕಾರಿ ವಿವರಗಳಿವೆ. ಓರ್ವ ಸಂತ್ರಸ್ತೆ, ಒಬ್ಬ ಅಪರಾಧಿ “ಮದ್ಯದ ಬಾಟಲಿಯನ್ನು ನನ್ನ ಗುಪ್ತಾಂಗದೊಳಗೆ ತುರುಕಿದ” ಎಂದು ತಿಳಿಸಿದ್ದಾಳೆ. “ಅವನು ಅದನ್ನು ಮಾಡುತ್ತಿದ್ದಾಗ ಬಾಟಲಿ ಒಡೆದು ಹೋಯಿತು. ಆಗ ನನಗೆ ಸುಮಾರು 12 ಅಥವಾ 13 ವರ್ಷ” ಎಂದು ಆಕೆ ಹೇಳಿದ್ದಾಳೆ.
ಒಬ್ಬ ಮಹಿಳೆ, ದೌರ್ಜನ್ಯದ ಅವಧಿಯಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ಅನೇಕ ಪೊಲೀಸ್ ಅಧಿಕಾರಿಗಳಿಂದಲೇ ಅತ್ಯಾಚಾರಕ್ಕೊಳಗಾಗಿದ್ದೆ ಎಂದು ಆರೋಪಿಸಿದ್ದಾಳೆ. ಮತ್ತೊಬ್ಬಳು ತನ್ನ 13ನೇ ವಯಸ್ಸಿನಲ್ಲಿ ದೌರ್ಜನ್ಯ ಶುರುವಾಯಿತು ಎಂದು ನೆನಪಿಸಿಕೊಂಡಿದ್ದಾಳೆ. “ನಾನು ಮೂರು ವರ್ಷಗಳಲ್ಲಿ ಸುಮಾರು 600 ಅಥವಾ 700 ವಿವಿಧ ಪುರುಷರಿಂದ ಅತ್ಯಾಚಾರಕ್ಕೊಳಗಾಗಿದ್ದೆ” ಎಂದು ಆಕೆ ತಿಳಿಸಿದ್ದಾಳೆ.
ಮತ್ತೊಬ್ಬ ಸಂತ್ರಸ್ತೆ, “ನನ್ನ ಗುಪ್ತಾಂಗ ಮತ್ತು ಹಿಂಭಾಗದಿಂದ ರಕ್ತಸ್ರಾವವಾಗುತ್ತಿತ್ತು ಮತ್ತು ಎಷ್ಟು ಊದಿಕೊಂಡಿತ್ತು ಎಂದರೆ ನನಗೆ ಕುಳಿತುಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ನನ್ನ ಪಾನೀಯದಲ್ಲಿ ಅಮಲು ಪದಾರ್ಥ ಬೆರೆಸಲಾಗಿತ್ತು ಎಂದು ನಾನು ಆಸ್ಪತ್ರೆಯ ಸಿಬ್ಬಂದಿಗೆ ಹೇಳಿದೆ, ಆದರೆ ಸತ್ಯ ಹೇಳಲು ಹೆದರಿದ ಕಾರಣ ನನಗೆ ಏನು ನಡೆಯಿತು ಎಂದು ಗೊತ್ತಿಲ್ಲ ಎಂದಿದ್ದೆ. ಅವರು ಯಾವುದೇ ಪ್ರಶ್ನೆಗಳನ್ನು ಕೇಳಲಿಲ್ಲ. ನನಗೆ ಮಾತ್ರೆಗಳನ್ನು ಕೊಟ್ಟು ಮನೆಗೆ ಕಳುಹಿಸಿದರು. ಆಗ ನನಗೆ 15 ವರ್ಷ” ಎಂದು ಹೇಳಿದ್ದಾಳೆ.
ಕೆಲವು ಸಂತ್ರಸ್ತೆಯರು, ದೌರ್ಜನ್ಯವು ಮೃಗೀಯ ಹಂತಕ್ಕೆ ತಲುಪಿತ್ತು ಮತ್ತು ತಮ್ಮನ್ನು ಪ್ರಾಣಿಗಳಂತೆ ನಡೆಸಿಕೊಳ್ಳಲಾಗುತ್ತಿತ್ತು ಎಂದು ತಿಳಿಸಿದ್ದಾರೆ. “ಒಬ್ಬ ವ್ಯಕ್ತಿ ವ್ಯಾನ್ನ ಹಿಂಭಾಗವನ್ನು ತೆರೆದಾಗ, 15 ರಿಂದ 20 ಬಾಲಕಿಯರನ್ನು ನಾಯಿಗಳ ಪಂಜರದಲ್ಲಿ ಬಂಧಿಸಿರುವುದನ್ನು ನಾನು ಕಂಡೆ” ಎಂದು ಓರ್ವ ಮಹಿಳೆ ಹೇಳಿದ್ದಾಳೆ. ಮತ್ತೊಬ್ಬಳು ನಾಯಿಗಳನ್ನು ತರಲಾಗಿತ್ತು ಮತ್ತು ನನಗೆ ಚಲಿಸಲು ಜಾಗವಿರಲಿಲ್ಲ ಎಂದು ವಿವರಿಸಿದ್ದಾಳೆ. “ನನ್ನನ್ನು ನಾಯಿಯೊಂದಿಗೆ ಅತ್ಯಾಚಾರ ಮಾಡಿಸಬಹುದೇ ಎಂದು ಬೆಟ್ಟಿಂಗ್ ಕಟ್ಟುತ್ತಾ, ನಗುತ್ತಾ, ವಿಡಿಯೋ ಮಾಡುತ್ತಿದ್ದ ಪುರುಷರು ನನ್ನ ಸುತ್ತಲಿದ್ದರು. ಹೌದು, ನಾಯಿಯಿಂದ ನನ್ನ ಮೇಲೆ ಅತ್ಯಾಚಾರವಾಯಿತು” ಎಂದು ಆಕೆ ಹೇಳಿದ್ದಾಳೆ.
ಕಳೆದ ವರ್ಷ, ಲೊವ್ ನೇತೃತ್ವದ ಖಾಸಗಿ ತನಿಖೆಯು ಯುಕೆನ ಕನಿಷ್ಠ 85 ಪ್ರದೇಶಗಳಲ್ಲಿ “ಗುಂಪು ಆಧಾರಿತ ಮಕ್ಕಳ ಲೈಂಗಿಕ ಶೋಷಣೆ”ಯನ್ನು ಗುರುತಿಸಿದೆ. ಕಳೆದ ಆಗಸ್ಟ್ನಲ್ಲಿ ಲೊವ್ ನೀಡಿದ ಹೇಳಿಕೆಯ ಪ್ರಕಾರ, ಪಾಕಿಸ್ತಾನಿ ಮೂಲದ ಪುರುಷರೇ ಹೆಚ್ಚಾಗಿರುವ ಈ “ರೇಪ್ ಗ್ಯಾಂಗ್ಗಳು” ದಶಕಗಳಿಂದ ಸಕ್ರಿಯವಾಗಿವೆ ಮತ್ತು ಇದು “ಊಹಿಸಿದ್ದಕ್ಕಿಂತ ಹೆಚ್ಚು ವ್ಯಾಪಕವಾಗಿದೆ” ಎಂದು ತನಿಖೆ ತಿಳಿಸಿದೆ.
ಈ ಹಗರಣವು ಒಂದು ದಶಕದ ಹಿಂದೆ ಯಾರ್ಕ್ಶೈರ್ನ ರೋದರ್ಹ್ಯಾಮ್ ನಗರದಲ್ಲಿ ಬೆಳಕಿಗೆ ಬಂದಿತು. 2001ರ ಸುಮಾರಿಗೆ ಅಲ್ಲಿನ ಬಾಲಕಿಯರ ಮೇಲೆ ವ್ಯವಸ್ಥಿತ ದೌರ್ಜನ್ಯ ನಡೆಯುತ್ತಿರುವುದು ಅಧಿಕಾರಿಗಳ ಗಮನಕ್ಕೆ ಬಂದಿತ್ತು. ಆದರೆ, 2010ರಲ್ಲಿ ಮೊದಲ ಬಾರಿಗೆ ಅಪರಾಧಿಗಳಿಗೆ ಶಿಕ್ಷೆಯಾಯಿತು. ರೋಚ್ಡೇಲ್, ಆಕ್ಸ್ಫರ್ಡ್, ಟೆಲ್ಫೋರ್ಡ್ ಮತ್ತು ಬ್ರಿಸ್ಟಲ್ ಸೇರಿದಂತೆ ಯುಕೆನ ಸುಮಾರು 50 ನಗರಗಳಲ್ಲಿ ಇದೇ ಮಾದರಿಯ ದೌರ್ಜನ್ಯಗಳು ಕಂಡುಬಂದವು.
ಪ್ರೊಫೆಸರ್ ಅಲೆಕ್ಸಿಸ್ ಜೇ ಅವರ 2014ರ ವರದಿಯ ಪ್ರಕಾರ, ಕೇವಲ ರೋದರ್ಹ್ಯಾಮ್ನಲ್ಲೇ 1997 ರಿಂದ 2013ರ ನಡುವೆ 1,400ಕ್ಕೂ ಹೆಚ್ಚು ಮಕ್ಕಳು ಲೈಂಗಿಕ ದೌರ್ಜನ್ಯಕ್ಕೆ ಒಳಗಾಗಿದ್ದರು. ಅನೇಕ ಸಂತ್ರಸ್ತೆಯರನ್ನು ಅಪಹರಿಸಿ, ಅತ್ಯಾಚಾರ ಎಸಗಿ, ಕಳ್ಳಸಾಗಣೆ ಮಾಡಲಾಗಿತ್ತು. “ಜಾತಿವಾದಿ” ಎಂದು ಕರೆಯಲ್ಪಡುವ ಭಯದಿಂದ ಅಧಿಕಾರಿಗಳು ಹೆಚ್ಚಾಗಿ ಮಧ್ಯಪ್ರವೇಶಿಸಿರಲಿಲ್ಲ.
ಚೈಲ್ಡ್ ಸೆಕ್ಷುಯಲ್ ಎಕ್ಸ್ಪ್ಲೊಯಿಟೇಶನ್ ಟಾಸ್ಕ್ಫೋರ್ಸ್ನ ಇತ್ತೀಚಿನ ವರದಿಯ ಪ್ರಕಾರ, 2023ರಲ್ಲಿ ಯುಕೆನಲ್ಲಿ ಮಕ್ಕಳ ಮೇಲಿನ ಲೈಂಗಿಕ ಅಪರಾಧದ 1.15 ಲಕ್ಷ ಪ್ರಕರಣಗಳು ವರದಿಯಾಗಿವೆ. ಇದರಲ್ಲಿ 4,228 (ಶೇ. 3.7) ಪ್ರಕರಣಗಳು ಗುಂಪು ಆಧಾರಿತ ಅಪರಾಧಗಳಾಗಿವೆ. 2024ರಲ್ಲಿ ಮ್ಯಾಂಚೆಸ್ಟರ್ನಲ್ಲಿ ನಡೆದ ಸ್ವತಂತ್ರ ಪರಿಶೀಲನೆಯು, 2004 ರಿಂದ 2012ರ ಅವಧಿಯಲ್ಲಿ ರೋಚ್ಡೇಲ್ನಲ್ಲಿ ಸಂಘಟಿತ ಲೈಂಗಿಕ ಶೋಷಣೆ ನಡೆದಿರುವುದನ್ನು ದೃಢಪಡಿಸಿದೆ. 2012ರ ‘ಆಪರೇಷನ್ ಸ್ಪಾನ್’ ನಂತರ ಒಂಬತ್ತು ಮಂದಿ ಅಪರಾಧಿಗಳಿಗೆ ಶಿಕ್ಷೆಯಾಗಿದ್ದು, ಅವರಲ್ಲಿ ಎಂಟು ಮಂದಿ ಬ್ರಿಟಿಷ್-ಪಾಕಿಸ್ತಾನಿ ಪುರುಷರಾಗಿದ್ದರು. ಅಂದಿನಿಂದ, ನೂರಾರು ಮಂದಿ ಬಂಧನಕ್ಕೊಳಗಾಗಿದ್ದಾರೆ ಮತ್ತು ಶಿಕ್ಷೆಗೀಡಾಗಿದ್ದಾರೆ.
